_ გასული დღეების განმავლობაში ვრცელდებოდა ინფორმაცია, რომ ახალი მერი თანამშრომელთა მასიურ დათხოვნას სწორედ დღეს, 17 ივნისს აპირებდა, თუმცა, როგორც აღმოჩნდა, საკადრო წმენდა დროებით გადაიდო ან საერთოდ არ იგეგმება.
“გურია ნიუსი” ინფორმაციის გადასამოწმებლად ქუთაისის კულტურის სამსახურის უფროსს, თემურ ცამციშვილს დაუკავშირდა. გავრცელებული ინფორმაციის თანახმად, მერიის სამსახურის უფროსებს გათავისუფლების ბრძანებები, რამდენიმე დღის უკან მიუვიდათ. როგორც ცამციშვილი აღნიშნავს, მასთან ამ დრომდე არანაირი სახის ბრძანება არ მისულა, თუმცა, შესაძლოა, დღის განმავლობაში რამე შეიცვალოს.
“მე ვერც ერთი თანამშრომლის ნაცვლად ვერ გაგცემთ პასუხს. ამ ეტაპზე არავითარი გათავისუფლების მოთხოვნა ჩემამდე არ მოსულა. თუ დღის განმავლობაში მსგავსი რამე იქნება, აუცილებლად შეგატყობინებთ,” _ განაცხადა თემურ ცამციშვილმა “გურია ნიუსთან” საუბრისას.
შეგახსენებთ, რომ ქუთაისის ახალი მერი დიმიტრი კოპალიანი, მოვალეობის შესრულებას აღნიშნულ თანამდებობაზე მიმდინარე წლის 10 ივნისს შეუდგა. ამ დროიდან მოყოლებული, ვრცელდებოდა ინფორმაცია, რომ ქალაქის მერიაში დიდი საკადრო წმენდა იგეგმებოდა. თუმცა ამ დროისთვის ყველა სამსახურის უფროსი და სპეციალისტი თანამდებობას ინარჩუნებს.
