კოალიცია “ქართულ ოცნებაში” შემავალმა პარტიებმა 25 ივნისს ერთობლივი ბრიფინგი გამართეს. მთავარი თემა ოზურგეთის საკრებულოს თავმჯდომარის გუშინდელი არჩევნები იყო.
შეხვედრა დამარცხებულმა კანდიდატმა დიმიტრი კვერღელიძემ გახსნა და ზემოაღნიშნული ციტატაც სწორედ მას ეკუთვნის.
“კლანური მმართველობის ხელშემწყობ” და “ბიზნესებში ხელისმოფათურე” “ეპითეტების” ადრესატი კი “გურია ნიუსის” ჟურნალისტი გახლავთ.
_ ვისზეა საუბარი? აგერ ბრძანდება ქალბატონი ჟანა (ვიგულისხმები მე. ავტ) მე მეკითხება და ერთ-ერთი ფირმის მეპატრონეს… რა თქვენი საქმეა ქალბატონო ჟანა, მე რა ურთიერთობა მაქვს უცხოურ ფირმასთან? რა ხდება ორ კომერციულ ფირმას შორის, ორ სუბიექტს შორის, ეს არ არის საჯარო ინფორმაცია ჯერ ერთი რა… (ასეთ კომენტარს აკეთებს საჯარო მოხელე, საკრებულოს წევრი და საკრებულოს თავმჯდომარეობის კანდიდატი. ავტ)
ფირმის დირექტორის პოსტი, რომელზეც დიმიტრი კვერღელიძე საუბრობს, მას 2013 წლის 20 ივნისამდე ეკავა. 4 დღით ადრე, საკრებულოს თავმჯდომარის არჩევნებამდე).
აქვე იმასაც დავძენთ, რომ ფირმის მეპატრონე, რომელსაც კვერღელიძე ნაცვალსახელით მოიხსენიებს, მისი დის ქმარი, გოჩა ჩხაიძეა, რომელიც ამჟამად საფრანგეთში ცხოვრობს.
დიმიტრი კვერღელიძემ იმის თაობაზე, რომ მასალას ვამზადებდით, გუშინ ჩვენი სატელეფონო ზარის შემდეგ შეიტყო, როდესაც მას კომენტარზე დავურეკეთ. აქვე განვმარტავთ, რომ კვერღელიძეს საკრებულოს სხდომის დაწყებამდე დავუკავშირდით. მასალის გამოქვეყნება კი იმ მიზეზით გადაიდო, რომ მეორე მხარის ადვოკატის _ ვლადიმერ სანიკიძის კომენტარებს ველოდებოდით, რომელიც სატელეფონო საუბრისას დაგვთანხმდა, შემდეგ კი მთელი ორი დღის განმავლობაში ჩვენს სატელეფონო ზარებსა და ტექსტურ შეტყობინებებს აღარ პასუხობდა.
ამ ფაქტის განმარტება მიზანშეწონილად ჩავთვალეთ, რათა მკითხველს წარმოდგენა ჰქონდეს იმ განცხადებებზე, რომელიც კვერღელიძემ “გურია ნიუსის” მისამართით გააჟღერა.
რაც შეეხება მასალას, რომლის გამოც დამარცხებული კანდიდატი გამოქვეყნებამდე გაღიზიანდა, მას და თავისი დის ქმარს, გოჩა ჩხაიძის ბიზნესსაქმიანობას ეხება.
“გურია ნიუსი” დიმიტრი კვერღელიძის საქმიანობით მას შემდეგ დაინტერესდა, რაც ის საჯარო მოხელე გახდა და საპარლამენტო არჩევნების შემდეგ ოზურგეთის საკრებულოში “თავისუფალი დემოკრატების” ერთ-ერთი ლიდერის, თემურ სალუქვაძის ადგილი დაიკავა. ძალიან მალევე მას პრეტენზია საკრებულოს თავმჯდომარეობაზე გაუჩნდა, რასაც ღიად აფიქსირებდა კიდეც.
დიმიტრი კვერღელიძე, ოზურგეთში, სოფელ ოზურგეთში მდებარე შპს “ლაბას” დირექტორი იყო. საჯარო რეესტრში არსებული მონაცემების მიხედვით, ის 2013 წლის 20 ივნისს გათავისუფლდა შპს “ლაბას” დირექტორობიდან, რომლის ერთადერთი დამფუძნებელი და 100%-იანი წილის მფლობელი მისი სიძე გოჩა ჩხაიძეა. ჩხაიძე ამჟამად საფრანგეთში, ლიონში ცხოვრობს, როგორც “ნაციონალური” ხელისუფლებისგან პოლიტდევნილი. თუმცა, საქართველოში არც “ნაციონალების” დამარცხების შემდეგ დაბრუნებულა.
არსებობს ოზურგეთის რაიონული სასამართლოს 2010 წლის 19 ნოემბრის განჩინება და ამავე რიცხვით დათარიღებული სააღსრულებლო ფურცელი შპს “ლაბას” ბალანსზე რიცხულ უძრავ (მიწა, შენობა-ნაგებობა) და მოძრავ (22 ტონა დარჩეული თხილი) ქონების დაყადაღების შესახებ. აღნიშნულის საფუძველია ლონდონში რეგისტრირებული ერთ-ერთი ფირმის წარმომადგენლის მოთხოვნა. ლონდონური ფირმის მოთხოვილი თანხა 180 000 აშშ დოლარს შეადგენდა, ვალდებულების შესრულებამდე ყოველთვიური 2%-ის გადახდის დაკისრებით. ესე იგი, თავდაპირველი მოლაპარაკების თანხა 150 000 აშშ დოლარი იყო.
სასამართლო განჩინებაში აღნიშნულია, რომ მოსარჩელემ 2009 წლის ოქტომბერში გადაუხადა თანხა შპს “ლაბას” 30 000 კგ თხილის გულის მიწოდებაზე, მაგრამ ეს პირობა ერთი წლის თავზეც არ შესრულებულა.
უფრო მეტიც, როგორც აღნიშნულ განჩინებაში ვკითხულობთ, შპს “ლაბა, რომლის დირექტორიც დიმიტრი კვერღელიძე გახლდათ, წერილობით თავიდან ითხოვდა თანხას იმ 22 ტონა თხილზე, რომელიც აღნიშნული შპს-ს საწყობში უნდა ყოფილიყო და რომლის თანხაც ერთი წლის წინ გადაიხადა მოსარჩელემ.
სასამართლომ მართლაც დააყადაღა უძრავი ქონება და 22 ტონა თხილი.
ამბობენ, რომ ამ ამბის გაგრძელება სიძე-ცოლისძმამ ყველაზე უკეთ იცის და კიდევ იმ ლონდონურმა ფირმამ, რომელიც ალბათ, ქართული ბიზნესით “მოხიბლული” აქეთ “პირს აღარ იზამს”.
განჩინების თანახმად, უზრუნველყოფის ღონისძიების გამოყენების თაობაზე მოსარჩელის განცხადება დაკმაყოფილდა.
ყადაღა დაედო მოპასუხე, შპს “ლაბას” საკუთრებაში არსებულ უძრავ ქონებას, მათ შორის საამქრო-საწყობში არსებულ საქონელს _ 22 ტონა თხილს.
აღნიშნულ საკითხთან დაკავშირებით დავუკავშირდით (საკრებულოს სხდომამდე) დიმიტრი კვეღელიძეს, რომელიც კითხვის დასმამ გააღიზიანა და აქეთ გვკითხა:
_ ვინ გითხრათ მაგი? ვინ გითხრათ?
_ ვინ გვითხრა და საიდან მოვიძიეთ ინფორმაცია, ეს არ არის მთავარი…
_არანაირი ყადაღა არ არსებობს, ეს არის კომერციული ორ კერძო პირს შორის ურთიერთობა და არავის საქმე არ არის ეგ რა. როცა არ იცემა კომპანიის მფლობელებზე საქმე, არანაირი ინფორმაცია არ გაიცემა მაშინ რა! ეს უნდა იცოდეთ თქვენ ძალიან კარგად რა!
_ ბატონო დიმიტრი, ჩვენ გესაუბრებით სასამართლოს განჩინებაზე…
_არანაირ აღსრულებაზე და სასამართლოზე არაა საუბარი, ჩვენ ვართ შეთანხმებულები, ეგ სხვისი საქმე არაა რა! მე ახლა შეხება არ მაქვს აღნიშნულ კომპანიაზე….
_ დიახ, ვიცით უკვე ამ წლის 20 ივნისს გათავისუფლდით შპს “ლაბას” დირექტორობიდან….
_ რა გაინტერესებთ თქვენ ბოლოს და ბოლოს? ეს არის კომერციული საიდუმლოება, ჩემო კარგო და ინფორმაციის გაცემის უფლება არა მაქვს.
კარგად ბრძანდებოდეთ გვითხრა კვერღელიძემ და ტელეფონი გაგვითიშა.
კითხვები გოჩა ჩხაიძესაც გავუგზავნეთ, თუმცა მან პასუხი არ გაგვცა….
