_ მოვლენები ასე მას შემდეგ განვითარდა, რაც ოზურგეთის მუნიციპალიტეტის საკრებულოს თავმჯდომარედ ავთანდილ სურგულაძე აირჩიეს და არა კოალიცია “ქართული ოცნების” კანდიდატი დიმიტრი კვერღელიძე.
საკრებულოს დეპუტატების გადაწყვეტილება საზოგადოებას საკრებულოს დეპუტატმა, ლელა ნაცვალაძემ გააცნო და პროტესტიც გამოხატა:
_ ვაპროტესტებ ამ ყველაფერს, არ ვიცი, ახლა რა პროცედურები იქნება, მაგრამ ვალდებული ვარ, საზოგადოებას ვუთხრა… ნუ იმალები შარაშენიძე (საუბარია ოზურგეთის მუნიციპალიტეტის გამგებლის მოვალეობის შემსრულებელზე, კონსტანტინე შარაშენიძეზე, ავტ). პასუხი გაეცი ხალხს!
კონსტანტინე შარაშენიძე: _ ენა გააჩერე!
ლელა ნაცვალაძე: _ ენა გააჩერე, არ უნდა მაგას. შენ დაგეგმე ზუსტად ეს ყველაფერი. კაკო სიხარულიძე (სახელმწიფო უსაფრთხოების სააგენტოს გურიის სამსახურის უფროსი. ავტ.) წავიდა აქედან, აღარ არის შენობაში?
ეს იყო “ნაციონალების” პროექტი, ეს იყო ნაციონალიზაციის გაღრმავება ოზურგეთში, ეს არის ჩემი შეფასება. ყველა მავანმა ზეწოლა მოახდინა დეპუტატებზე, 20 ხმით გაამარჯვებინეს იმ ადამიანს, რომელმაც “ქართულ ოცნებას” საპარლამენტო არჩევნები წააგებინა მის სოფელში, ჭანიეთში. დანარჩენი რაც მოხდება, ეს არის საზოგადოებაზე დამოკიდებული. ეს არის ფარსი, ერთკვირიანი თამაში და ვერ გაუძლეს ზეწოლას ოზურგეთის მუნიციპალიტეტის საკრებულოს დეპუტატებმა, რადგან ცხრა წლის განმავლობაში ემონებოდნენ “ნაცმოძრაობას” და დღეს ეს ასე არ უნდა დასრულდეს. მე გაძლევთ პირობას, რომ ეს ასე არ დასრულდება.
ნუგზარ გიორგაძე, “ქართული ოცნების” მხარდამჭერი: _ არ გაპატიებთ, ბიძინა ივანიშვილს გადაუარეთ თავზე! თქვენ ხართ გარეწრები.
ვასილ გობრონიძე, “ქართული ოცნების” მხარდამჭერი: _ მონებო, მონებო! გამოდი, კოტე შარაშენიძე, გარეთ და ხალხს შეხვდი!
ზვიად კვაჭანტირაძე, ოზურგეთის მაჟორიტარი დეპუტატი: _ ტენდენცია კარგად არის ორგანიზებული “ერთიანი ნაციონალური მოძრაობის” მხრიდან, ძალიან სერიოზულად მომზადებულია “ნაცმოძრაობიდან” და მისი ნარჩენების მხრიდან. ეს მართული პროცესია; ეს არის, პირდაპირი გაგებით, მოტყუება, მაპატიეთ ამ სიტყვებისთვის, “გადაგდება” და ასე შემდეგ. მაგრამ უნდა ვთქვათ ერთი რამ: არჩევნები ჩატარდა ძალიან გამჭვირვალედ და მას ესწრებოდნენ არასამთავრობო და მედიის წარმომადგენლები, ხმის დათვლის პროცესში არანაირი გაუგებრობა არ ყოფილა. მთავარია, როგორ იყო ეს შედეგი მიღწეული და რა ზემოქმედება იყო ამ ადამიანებზე გაწეული არჩევნებამდე.
მე მაქვს საფუძვლიანი ეჭვი, რომ იყო ჩატარებული ძალიან დიდი მუშაობა იმ კანდიდატურის საწინააღმდეგოდ, რომელიც სრული პასუხისმგებლობით ვაცხადებ, პირადად ჩემ მიერ იყო შეთანხმებული კოალიციაში შემავალი ყველა პარტიის ლიდერთან.
მე მაქვს კიდევ ბევრი საფუძვლიანი ეჭვი, რომელმაც იმუშავა ჩვენს შიგნით, ჩვენი გადაწყვეტილების წინააღმდეგ. მიუხედავად ყველაფრისა, ეს უნდა იყოს ძალიან სერიოზული გაკვეთილი ჩემთვისაც. მე ვალდებული ვარ, როგორც საქართველოს პარლამენტის წევრი, ვითანამშრომლო იმ საკრებულოსთან, რომელიც ახლა გვყავს, მაგრამ საზოგადოებას ვაძლევ პირობას, რომ ათასჯერ მეტ საპარლამენტო კონტროლს გავახორციელებ ოზურგეთის საკრებულოზე, დავესწრები ყველა სხდომას და მაქსიმალურად ვეცდები გავაკონტროლო პროცესები, რომელიც აქ მიდის და ამაში საზოგადოებას ვთხოვ აქტიურ მხარდამჭერას.
საინტერესოა ერთი დეტალი: ზვიად კვაჭანტირაძე, რომელიც მოქმედ გამგებელთან “სამკვდრო-სასიცოცხლოდ” დაპირისპირებულ დიმიტრი კვერღელიძეს უჭერდა მხარს, ასევე, აქტიური მხარდამჭერი იყო კოტე შარაშენიძისა, როდესაც ამ უკანასკნელს გამგებლად ირჩევდნენ.
“გურია ნიუსის” ვებგვერდზე 2012 წლის 10 დეკემბერს გამოქვეყნებულ სტატიაში _ “ზვიად კვაჭანტირაძე: “გამგებელი უნდა გამოცვლილიყო და ასეც მოხდა”, დეპუტატი აცხადებს: “ოზურგეთის ახალი გამგებლის კოტე შარაშენიძის დანიშვნა ცენტრალური ხელისუფლების გეგმების და ამოცანების გადასაჭრელად სერიოზული დასაყრდენია.
ჩემი აზრით, საკრებულო მაქსიმალურად უნდა დაუდგეს გვერდით ახალ გამგებელს და დაეხმაროს მას საქმიანობაში. ამ მიზნით, კიდევ დამატებითი პოლიტიკური მექანიზმების შექმნა შიგნით საკრებულოში, რომელიც ერთმნიშვნელოვნად გახდებოდა ახალი ცენტრალური ხელისუფლების მხარდამჭერი ძალა, მისასალმებელი საქმე იქნებოდა. ვგულისხმობ, თუნდაც “ქართული ოცნების” მხარდამჭერი კოალიციური ფრაქციების გაძლიერებას და თუნდაც კიდევ ახალი ფრაქციის შექმნას, რაც დამატებით ინსტრუმენტს გააჩენდა მთავრობის მხარდამჭერი გადაწყვეტილებების მიღებისას.
მე მახარებს, რომ საკრებულოს დღევანდელი შემადგენლობა ადეკვატურ პოზიციაზე შეჯერდა. მათ ცვლილებას მხარი დაუჭირეს”.
საქართველოს პარლამენტის ვიცე-სპიკერმა მანანა კობახიძემ სხდომის შემდეგ ასეთი კომენტარი გააკეთა: _ მე მხოლოდ იმას ვიტყვი, რომ 2014 წლის თვითმმართველობის არჩევნები ძალიან ბევრ რამეს შეცვლის არა მხოლოდ ოზურგეთში, არამედ საქართველოში. დღეს გვაქვს ის რეალობა, რომ საკრებულოებში, პრაქტიკულად, არიან იმ არჩევნების შედეგად მოსული ადამიანები, რომლებსაც საზოგადოების ძალიან დიდი ნაწილი, სამწუხაროდ, არ ენდობა. რეალობა შეიცვალა ცენტრალური ხელისუფლების დონეზე, პარლამენტის დონეზე, მაგრამ ადგილებზე კი ვიცით, რაც ხდება. ამიტომ, არჩევნები იტყვის თავის სათქმელს. დიდი დრო არ არის დარჩენილი 2014 წლის არჩევნებამდე და ხალხი, პირველ რიგში, ოზურგეთელი ამომრჩეველი თავის ნებას დემოკრატიულად და თავისუფლად დააფიქსირებს.
“რესპუბლიკელმა” მარინა სუნგულიამ მანანა კობახიძეს უთხრა, რომ პროკურატურაში შეტანილი აქვს სოფლის მხარდამჭერი პროგრამების შესწავლის შესახებ განცხადება, მაგრამ ჯერჯერობით პასუხი არ მიუღია: _ სოფელ ნატანებში 78 000 ლარი არის გამქრალი საქორწინო სახლის გასაკეთებლად, თუმცა, არც დაწყებულა ეს მშენებლობა. ათი თვეა დაწერილი მაქვს ამის შესახებ განცხადება. #1 საჯარო სკოლა თავზე დაგვანგრიეს, სადაც ექვთიმე თაყაიშვილი და ნოე ჟორდანია სწავლობდნენ, მაგრამ ხელშეუხებელია ეს საკითხი. ეს სარჩელები შეტანილი მაქვს პროკურატურაში, მაგრამ პასუხი არ არის. სამართლიანობის აღდგენას ვითხოვთ.
მიუხედავად საკრებულოს სააქტო დარბაზს გარეთ განვითარებული მძიმე ვითარებისა, გამარჯვებულმა კანდიდატმა, ავთანდილ სურგულაძემ მცირე კომენტარი სააქტო დარბაზში გააკეთა: _ ამ ემოციური ფონზე ვერაფერს გეტყვით. პრესის წარმომადგენლებს და ყველას შევხვდები, აუცილებლად გავაკეთებ შეხვედრას და დაწვრილებით ვისაუბრებთ. დიდი მადლობა, მე ხელს ჩამოვართმევ ჩემს კონკურენტ დიმიტრი კვერღელიძეს და ჩვენ აუცილებლად გავაგრძელებთ მუშაობას.
დიმიტრი კვერღელიძე, კოალიცია “ქართული ოცნება”: _ ეს ურთიერთობა გაგვიჭირდება, არანაირი სურვილი არ მაქვს თანამშრომლობის. დეპუტატები არიან სრული “ნაციონალები” გამგებლის ჩათვლით. გამგებლის მოვალეობის შემსრულებელი დღეს კოალიციის საწინააღმდეგოდ მოქმედებდა და პირველმა მან მიულოცა გამარჯვებულს “ოცნების” კანდიდატის დამარცხება. მე დავაყენებ საკითხს, კოტე შარაშენიძე გარიცხული იქნას “ქართული ოცნებიდან”. რაც შეეხება საკრებულოს, მას კიდევ ერთხელ მიეცა შანსი, ეთანამშრომლა ახალ მთავრობასთან. ასევე, შეეძლო არ ეთანამშრომლა. ეს რა თქმა უნდა, დეპუტატების უფლებაა, _ გასცა პასუხი ავთანდილ სურგულაძეს დიმიტრი კვერღელიძემ.
