ოზურგეთის მუნიციპალიტეტის საკრებულოს სხდომა გამორჩეული იყო იმით, რომ ამ დღეს ოზურგეთის მუნიციპალიტეტის საკრებულოს სხდომას ოზურგეთის მაჟორიტარი დეპუტატი ზვიად კვაჭანტირაძე და მოწვეული სტუმრები: პარლამენტის ვიცე სპიკერი მანანა კობახიძე და პარლამენტის წევრი გია ცაგარეიშვილი სტუმრობდნენ.
საკრებულოს თავმჯდომარის პოსტზე ორი კანდიდატურა დასახელდა _ პარტია “თავისუფალი დემოკრატების” ოზურგეთის რაიონული ორგანიზაციის თავმჯდომარე დიმიტრი კვერღელიძე, რომელიც როგორც აღვნიშნეთ, ოზურგეთის მაჟორიტარი დეპუტატის ზვიად კვაჭანტირაძის ფავორიტია და ჭანიეთის მაჟორიტარი დეპუტატი ავთანდილ სურგულაძე, რომელსაც ოზურგეთის გამგებელი კონსტანტინე შარაშენიძე და მისი მომხრე დეპუტატები უჭერდნენ მხარს.
ოზურგეთში, კარგა ხანია, საუბრობენ ზვიად კვაჭანტირაძესა და კოტე შარაშენიძეს შორის გართულებულ ურთიერთობაზე და ამბობენ, რომ მათ შორის დაძაბულობამ უკვე პიკს მიაღწია.
კითხვა, რომელსაც იქ შეკრებილი საზოგადოების ნაწილი სვამდა, ასეთი იყო: “საინტერესოა, თუკი თავმჯდომარის ამრჩევი “ნაციონალების” დროინდელი საკრებულოა, რატომ უნდა ყოფილიყო ამ დეპუტატების მიერ არჩეული თავმჯდომარე “კარგი”, თუ ეს კვერღელიძე იქნებოდა და რატომ არის “ცუდი”, როცა ეს ავთანდილ სურგულაძეა? ერთი დეტალიც _ დიმიტრი კვერღელიძე გამგებელს უკანონოდ დანიშნულს უწოდებს და დღემდე ისმის მისი მისამართით ბრალდებები, რომ შარაშენიძე იმ საკრებულომ აირჩია, რომელიც “ნაციონალებისაა”. ეს იგივე საკრებულო არაა, ის დეპუტატები არ არიან, რომლებსაც ასევე ერთხმად უნდა დაემტკიცებინათ საკრებულოს თავმჯდომარედ დიმიტრი კვერღელიძე?” _ აცხადებენ “გურია ნიუსთან” საჯარო მოხელეები.
საკრებულოს სხდომა ორშაბათს, 12.15 საათზე დაწყო, რომელიც თავმჯდომარის მოვალეობის შემსრულებელმა ავთანდილ მექვაბიშვილმა წარმართა. დღის წესრიგით გათვალისწინებული პირველი საკითხი საკრებულოს თავმჯდომარის ალეკო მამეშვილის გადადგომას შეეხებოდა. იმ დეპუტატებმა, რომლებმაც სამი წლის წინ ერთხმად დაამტკიცეს ალეკო მამეშვილი საკრებულოს თავმჯდომარედ, ახლა მის გადადგომას ერთხმად მისცეს ხმა. საკრებულოს 37 დეპუტატიდან 35 ესწრებოდა, სხდომაზე არ იმყოფებოდა ფრაქცია “ქრისტიან-დემოკრატების” თავმჯდომარე კახა ღლონტი და თავად ალეკო მამეშვილი.
სხდომის დაწყებამდე ფრაქცია “ნაციონალური მოძრაობის” წევრებმა უარი განაცხადეს კენჭისყრის პროცესში მონაწილეობაზე, თუმცა, შემდეგ გადაიფიქრეს. გადაწყვეტილების შეცვლის მიზეზს ისინი არ ასახელებენ.
სხდომამდე რამდენიმე საათით ადრე, ადმინისტრაციული შენობის წინ და შენობაში მობილიზებული იყვნენ შსს გურიის სამხარეო მთავარი სამმართველოს თანამშრომლები. სხდომა ჩვეულებრივ რეჟიმში და მშვიდობიანად მიმდინარეობდა.
კენჭისყრის პროცესი გამჭვირვალედ წარიმართა და ავთანდილ მექვაბიშვილმა ავთანდილ სურგულაძე გამარჯვებულად გამოაცხადა.
ხმების რაოდენობა ასე გადანაწილდა: ავთანდილ სურგულაძე _ 20 ხმა, დიმიტრი კვერღელიძე _ 7 ხმა, ბათილი _ 5 ბიულეტენი.
საკრებულოს ახალი თავმჯდომარის დამტკიცების შემდეგ, ოზურგეთის მუნიციპალიტეტის შენობასთან საპროტესტო აქცია გაიმართა.
აქციის მონაწილეები, ოზურგეთის მუნიციპალიტეტის საკრებულოს თავმჯდომარედ ავთანდილ სურგულაძის არჩევას აპროტესტებდნენ. ისინი “გურია ნიუსთან” აცხადებდნენ, რომ საკრებულოს თავმჯდომარის პოსტზე დიმიტრი კვერღელიძის კანდიდატურას უჭერდნენ მხარს.
სხდომის დასრულების შემდეგ, საკრებულოს თავმჯდომარის პოსტზე წარდგენილმა ერთ-ერთმა კანდიდატმა დიმიტრი კვერღელიძემ ჟურნალისტების თანდასწრებით ოზურგეთის მუნიციპალიტეტის გამგებელს კოტე შარაშენიძეს მიმართა და განაცხადა: “ყველას გპირდებით, რომ ეს კაცი, კოტე შარაშენიძე ძალიან მალე “ქართული ოცნების” წევრი არ იქნება.” მისივე განცხადებით, “შარაშენიძე საკრებულოს დეპუტატებზე ზეწოლას ახდენდა, ეს გადაწყვეტილება, რომ მიეღოთ.”
რამდენიმე წუთში რამდენიმე ადამიანმა, ოზურგეთის ადმინისტრაციული შენობის პიკეტირება მოაწყო. ისინი ადმინისტრაციული შენობის კიბესთან დასხდნენ და შიმშილობა დაიწყეს.
“გურია ნიუსის” კითხვაზე, რამდენი ხანი აპირებდნენ პროტესტს, განაცხადეს: “სანამ ცენტრალური ხელისუფლებიდან არ მივიღებთ პასუხს და არ მოიკვლევენ გამგებლის, კოტე შარაშიძის საქმიანობას, მანამდე მუნიციპალიტეტის შენობაში დავრჩებით.”
ოზურგეთის მუნიციპალიტეტის გამგებელი, კოტე შარაშენიძე უსაფუძვლოს უწოდებს საპროტესტო აქციის მონაწილეების ბრალდებას და “გურია ნიუსთან” აცხადებს: “მათი ბრალდება უსაფუძვლოა. ჩემი მხრიდან არანაირი ზეწოლა არ ყოფილა დეპუტატებზე.”
შარაშენიძის თქმით, ის წარმოადგენს პარტია “ქართული ოცნება _ დემოკრატიულ საქართველოს” და მასზე დაკისრებულ მოვალეობას პირნათლად ასრულებს.
აქციის მონაწილეები შიმშილობის აქციას აგრძელებენ და აცხადებენ: “არ გვინდა ისეთი საკრებულოს თავმჯდომარე, რომლის პარტიაც ხალხს ცოცხებით აუპატიურებდა”, თუმცა, არაფერს ამბობენ იმაზე, თუკი თავმჯდომარის არჩევნებში დიმიტრი კვერღელიძე გაიმარჯვებდა, მაშინ მისი ამრჩევი დეპუტატები იქნებოდნენ თუ არა “ცოცხებით გამაუპატიურებელი” პარტიის წევრები.
