_ საქართველოს ფეხბურთის ფედერაციის ყოფილი პრეზიდენტისა და ამჟამად ჰოლანდიური “ვიტესის” მფლობელ მერაბ ჟორდანიას ქართული საფეხბურთო საზოგადოებისთვის მიმართვა გავრცელდა: “ბატონებო! ქართულ ფეხბურთში განვითარებულმა უკანასკნელმა მოვლენებმა და საქართველოს ჩემპიონატის უმაღლესი ლიგის საფეხბურთო კლუბების განცხადებამ, გადამაწყვეტინა მომემართა თქვენთვის! ქართული ფეხბურთის დღევანდელი მდგომარეობა, ობიექტური და სუბიექტური მიზეზების გამო, არ პასუხობს ქვეყნის ეროვნულ ინტერესებს, ქართველი გულშემატკივრის ისტორიულ (ტრადიციულ) ამბიციას! ამ მიზეზებს ემატება ერთ-ერთი უმთავრესი პრობლემა _ ფეხბურთის სპეციალისტების დაქსაქსულობა, რომელთაც გარკვეულწილად ძალუძთ იტვირთონ ლიდერის როლი და ქართული ფეხბურთის განვითარებაში უმნიშვნელოვანესი წვლილი შეიტანონ საკუთარი შესაძლებლობების და ძალისხმევის გაერთიანების შემთხვევაში. საკუთარ თავთან მართალი რომ ვიყოთ, უნდა ვაღიაროთ _ ქვეყანაში 2012 წლის ოქტომბრამდე არსებული რეჟიმის პირობებში, წარმოუდგენელი იყო რომელიმე ორგანოს დემოკრატიული არჩევა. გამონაკლისი არც საქართველოს ფეხბურთის ფედერაციაა. საქართველოს ფეხბურთის ფედერაციის მოქმედი პრეზიდენტი, რომლის საქმიანობას მე და იმედია, თქვენც დადებითად აფასებთ, შექმნილი სისტემის მძევალია. ის არ არის პასუხისმგებელი უალტერნატივო არჩევნებზე. მსჯელობა ამ თემაზე დღეს არ დამიწყია, უკანასკნელი 8 წლის განმავლობაში ჩემს ერთადერთ სატელევიზიო ინტერვიუშიც მქონდა საუბარი ამ მტკივნეულ საკითხზე,” _ აღნიშნულია წერილში.
სფფ-ის ექს-შეფის განცხადებითვე, “დღეს, როდესაც ქართული საზოგადოება განთავისუფლდა შიშისგან, ძალადობისგან, პრინციპულობა და სამართლიანობა ცხოვრების წესად უნდა იქცეს თითოეული ჩვენთაგანისთვის. ჩემი პოზიციიდან გამომდინარე, მოგმართავთ თქვენ _ ერთიანი ძალისხმევით გამოვიდეთ ჩიხიდან, რომელშიც ქართული ფეხბურთი იმყოფება. საქართველოს ფეხბურთის ფედერაციის მორიგი ყრილობის დღის წესრიგში აუცილებელია ნდობის საკითხის დაყენება! ამით ამჟამინდელ მენეჯმენტს ლეგიტიმაციის და ქართული ფეხბურთის მმართველი ორგანოს ხელმძღვანელობის პრეტენდენტებს ამბიციის გაცხადებისა და საკუთარ პრეტენზიებზე ამომწურავი პასუხის მიღების საშუალება მიეცემათ. ასეთი წინაპირობით ჩატარებული ყრილობის გადაწყვეტილებები უაპელაციოდ (შეუქცევადად) უნდა მიიღოს საქართველოს ფეხბურთის ფედერაციის ყველა სუბიექტმა. რამდენადაც ჩემთვის ცნობილია, ფიფა-უეფა-ს რეაქცია, საკითხის აღნიშნული ფორმით გადაწყვეტის შემთხვევაში, მხოლოდ დადებითი იქნება. ამასთან, ახალი არჩევნები, მისი ჩატარების შესახებ გადაწყვეტილების მიღების შემთხვევაში, უკანასკნელი ორი არჩევნებისგან განსხვავებით, ალტერნატიულ, კონკურენტულ გარემოსა და საფეხბურთო სამყაროსთვის აღიარებული “ფეირ პლეის” (სამართლიანი თამაში) კანონების დაცვით უნდა გაიმართოს. ასეთი არჩევნების გარანტად, წესდების თანახმად, საქართველოს ფეხბურთის ფედერაციის აღმასკომი და პრეზიდენტი არიან. ამგვარი არჩევნები უკანასკნელად 2002 წელს ჩატარდა. მოვლენათა ასეთი განვითარების შემთხვევაში, მე აუცილებლად ვიფიქრებ იმაზე, თუ რა ფორმით და პროგრამით დავბრუნდე ქართულ ფეხბურთში. დღესდღეობით ჩემი სახელი გარკვეულწილად ორი უცხოური კლუბის წარმატებებთან არის ასოცირებული. მინდა დავარწმუნო ქვეყნის საფეხბურთო საზოგადოება, რომ დაუფიქრებლად გავცვლიდი ამ კლუბების დღევანდელ მიღწევებს ქართული ფეხბურთის სამომავლო წარმატებებში. საქართველოს ფეხბურთის ფედერაციისა და სხვადასხვა ქვეყნის კლუბებში მუშაობის გამოცდილება, ბატონ ბიძინა ივანიშვილის ახლო წარსულის, ჩემთვის ცნობილი, არარეალიზებული წინადადებები (სფფ-ს მოქმედი მენეჯმენტი აქ არაფერ შუაშია) და მისი დღევანდელი დამოკიდებულება ფეხბურთისადმი, მაიმედებს, რომ ქართული საფეხბურთო საზოგადოება მიიღებს სწორ გადაწყვეტილებას, რომელიც მისცემს საშუალებას ქართულ ფეხბურთს, ღირსეული ადგილი დაიმკვიდროს მსოფლიო საფეხბურთო ოჯახში!”
როგორც წერილიდან ჩანს, “ვარდების მთავრობისგან” დევნილი და ორჯერ დაპატიმრებული ჟორდანია მზადაა, ქართული ფეხბურთის სათავეში დაბრუნდეს და ჰოლანდიაში მშვიდი სამსახური დატოვოს. რატომ გააკეთებს ამას ჟორდანია? მით უფრო, ის სფფ-ის მოქმედ თავკაც დომენტი სიჭინავას არ აკრიტიკებს და პირიქით, როგორც ამბობენ, მას უეფაში მხარსაც უჭერს. თუმცა, როგორც ჩანს, სიჭინავა თავად აპირებს წასვლას. შესაძლოა, ეს დაგეგმილ ან ვადამდელ არჩევნებზე მოხდეს. ყოველ შემთხვევაში, თუ სიჭინავა არ იქნება თანახმა, ჟორდანია არ არის ის ადამიანი, პირში აქოს და მას “ნაცხელისუფლებასავით” მოექცეს.
ამასთან, ვინც ჟორდანიას იცნობს, იცის, რომ მიზანსწრაფული ადამიანია, რომელიც წაგებას ვერ იტანს. იგი პრინციპულობითაც გამოირჩევა და ყველა დარწმუნებული იყო, რომ “ნაცხელისუფლებას” სერიოზულ პრობლემებს შეუქმნიდა, თანამდებობიდან რომ არ გადამდგარიყო. გავიხსენოთ, როგორც დატუქსა ფიფა-უეფამ საფრანგეთის პრეზიდენტი ნიკოლა სარკოზი ფედერაციის საქმიანობაში ჩარევის გამო და ხომ წარმოგიდგენიათ, რას უზამდნენ სააკაშვილის ხელისუფლებას. მაგრამ ჟორდანიას სხვა მნიშვნელოვანი საქმე ჰქონდა _ მიშელ პლატინის 15 “საბჭოთა” ხმას ციხეში მყოფი ვერ დაუბევებდა. მაშინ პლატინიმ უეფას არჩევნები 3 ხმით მოიგო და თუ რას ნიშნავდა 15-ივე პოსტსაბჭოთა სივრცის ხმა, იოლი მისახვედრია.
მაშინ უცხოურ მედიაშიც გაჟღერდა, რომ ქართველმა ფრანგს 15 ხმა გაუხერხა. საინტერესოა ის დეტალიც, რომ ყველაზე საეჭვო ქართული ხმა იყო, რადგან ნოდარ ახალკაცი უეფას არჩევნებში პლატინის კონკურენტს უჭერდა მხარს. თუმცა, მაშინ შიგასახელისუფლო-საფეხბურთო დაპირისპირებაში ახალკაც-უმცროსს პლატინის მხარდაჭერა ღიად დააფიქსირებინეს, რითაც მას ფრანგის კონკურენტებთან მისასვლელი გზა მოუჭრეს.
ახლაც მერაბ ჟორდანიას, გარდა იმისა, რომ ქართული ფეხბურთის წინსვლაში დახმარების სურვილს ამჟღავნებს და სიმართლე ვთქვათ, ფიფა-უეფას მხარდაჭერას მასზე უფრო ქართველთაგან ვერავინ მიიღებს (რადგან ის მეგობრობს ფიფა-უეფას ბოსებთან), ამას გარდა, ხმები ისევ უნდა დაუბევოს მეგობარ პლატინის, რომელიც ახლა უკვე ფიფას პრეზიდენტობას დაუმიზნებს. პრინციპში, ამ ხმებზე დახმარებას ჟორდანია ჰოლანდიაში ყოფნითაც გაუწევს, მაგრამ აქ მეორე ვარიანტია _ ჟორდანია უნდა გახდეს უეფას ვიცე-პრეზიდენტი! ამისთვის კი საჭიროა იყოს სფფ-ის თავკაცი.
როგორც ცნობილია და ეს ჟორდანიამაც დაადასტურა, მიშელ პლატინის ჯერ კიდევ წლების წინ სურდა ჟორდანია მოადგილედ, მაგრამ ნოდარ ახალკაცის ფედერაციამ მისი კანდიდატურა არ წარადგინა უეფას ვიცე-პრეზიდენტის პოსტზე. ამასწინათ კი სავარაუდოდ, სფფ-ში საპატიო პრეზიდენტის პოსტი სწორედ ჟორდანიასთვის შემოიღეს, რათა შემდეგ იგი უეფაში წარედგინათ. მაგრამ სულ სხვაა ფედერაციის პრეზიდენტი და სულ სხვა _ საპატიო პრეზიდენტი და კლუბის მეპატრონე. ეს უკანასკნელი პოსტი უეფას ვიცე-პრეზიდენტმა მაინც უნდა დატოვოს. სხვათა შორის, უეფამ ახლახანს ვიცე-პრეზიდენტად უკრაინელი გრიგორი სურკისი აირჩია, რომელიც ასევე ჟორდანიას უახლოესი მეგობარია. პლატინის უეფაში თავისი კაცის დატოვება აუცილებლად დასჭირდება და ფრანგი ლეგენდა რომ აქცენტს ყოველთვის ჟორდანიაზე აკეთებდა თუნდაც იქიდანაც ჩანს, რომ პლატინი მასთან ხან გრეჰეტბოლს თამაშობდა, ხანაც _ “ვარდოსნებს” თხოვდა, ჟორდანიასთვის არაფერი დაეშავებინათ. მაშინ სააკაშვილმა სიტყვაში მოატყუა უეფას ბოსი _ არ შეეხო ჟორდანია-სფფ-ის პრეზიდენტს და დაიჭირა ჟორდანია-“დინამოს” ექს-პრეზიდენტი, რის გამოც ფრანგი გაბრაზებული იყო და მას შემდეგ სააკაშვილს აღარ შეხვედრია. არადა, სულ პირველად, ჯერ კიდევ პირველი პატიმრობიდან ახალგათავისუფლებულ ჟორდანიასთან ერთად იმგზავრა სააკაშვილმა საფრანგეთამდე, სადაც სფფ-ის თავკაცმა ქვეყნის პირველ პირს ფრანგი ლეგენდა გააცნო.
სხვათა შორის, პლატინი აპრილის ბოლოსაც იყო საქართველოში ჩამოსული და მოვლენათა განვითარება და ჟორდანიას წერილი კიდევ უფრო გვარწმუნებს იმაში, რომ უეფას ბოსმა ახლა უკვე საქართველოს ახალ მთავრობას შესთავაზა ჟორდანიას ქართულ ფეხბურთში დაბრუნება. პლატინი ფუტზალის ტურნირს დაესწრო, თუმცა, ეჭვგარეშეა, პლატრინი-ივანიშვილის შეხვედრაზე სხვა “მნიშვნელოვან” საკითხზე იმსჯელებდნენ და ერთ-ერთი მათგანი ჟორდანიას ქართულ ფეხბურთში დაბრუნება იქნებოდა.
როგორც ჩანს, ჟორდანიას ქართულ ფეხბურთთან დაკავშირებით დიდი პროექტი აქვს, რითაც შეეცდება, ის კითხვები გადაფაროს, რაც მის პერსონასთან დაკავშირებით საქართველოში არსებობს. 90-იანი წლების გამო, მას ბევრი აკრიტიკებს, თუმცა, წმინდა საფეხბურთო ასპექტებით, “დინამოც” და ეროვნული ნაკრებიც გამორჩეული სწორედ ჟორდანიას ხანაში იყვნენ. მაშინ ჟორდანიამ შეცდომებიც დაუშვა, თუმცა, ახლა მას საფეხბურთო წრეებში უდიდესი გამოცდილება და ფიფა-უეფას პრეზიდენტებთან მეგობრობა უმაგრებს ზურგს. ცნობილი ფაქტია, რომ პლატინის მსგავსად, ჟორდანიასთან მსოფლიო ფეხბურთის პირველი პირი, ზეპ ბლატერიც მეგობრობს, რომელთან ერთადაც საჩვენებელი ფეხბურთიც უთამაშია, ხოლო როცა შევარდნაძის ხელისუფლებაში მას პრობლემები შეექმნა, ფიფას პირველმა პირმა ქართველი თავისთან იხმო, აეროპორტში საკუთარი მანქანა დაახვედრა და ფიფას შტაბ-ბინაზე საქართველოს დროშაც გამოფინა. დაგვეთანხმებით, ასეთი პატივი წამყვანი ქვეყნების წარმომადგენლებთაგანაც იშვიათად აქვთ.
ქართველი ასევე მეგობრობს ინგლისური გრანდის მფლობელ რომან აბრამოვიჩთან. კულუარებში ამბობენ, რომ “ვიტესი” ჟორდანიამ სწორედ მისი ფულითYშეიძინა. ასეა თუ ისე, როცა სფფ-ის ექს-ბოსმა უცხოური კლუბი შეიძინა, “ნაცმთავრობის” ის ფრთა, რომელიც მას ებრძოდა, ჰოლანდიამდეც მისწვდა და იქაური პრესა ჟორდანიას ქართული წარსულით აქტიურად დაინტერესდა. მაშინ არნემში ბევრს ეჭვობდნენ, მაგრამ ჟორდანიამ ჰოლანდიური ელიტლიგის მაჩანჩალა “ვიტესი” ქვეყნის ერთ-ერთ წამყვან კლუბად აქცია. ჰოლანდიის სამეფო ოჯახმა კი ახლახანს ფეხბურთის განვითარებაში შეტანილი წვლილისთვის (11 მილიონ ევროდ ღირებული ბაზა გაუკეთა კლუბს) ჟორდანიას მადლობაც გადაუხადა.
როდის მოხდება ჟორდანიას ქართულ ფეხბურთში დაბრუნება, ამის თქმა უახლოეს დღეებში დანიშნული სფფ-ის ყრილობის შემდეგ შეგვეძლება. ჟორდანიას განცხადებას მოქმედი პრეზიდენტი დადებითად გამოეხმაურა _ სიჭინავამ “ვიტესის” მფლობელს მადლობა გადაუხადა მისი საქმიანობის კარგად შეფასებისთვის, მიუხედავად იმისა, რომ ჟორდანიამ წერილში ვადამდელ არჩევნებზე მიანიშნა. გამოდის, რომ ეს უკანასკნელი მოქმედი პრეზიდენტის წინააღმდეგ არ წავა _ სიჭინავას ახალკაცისგან განსხვავებით უეფაც რომ კარგი თვალით უყურებს, ამაშიც ჟორდანიას წვლილს ხედავენ.
