1. საჭირო მასალა: 2 ცალი საშუალო ზომის ხახვი, 800 გრამი მაგარი ყველი, შეიძლება სულგუნიც, 2 ცალი პომიდორი, 4 ცალი კიტრი, 200 გრამი ზეთისხილი, ერთი ცალი ლიმონი.
მომზადების წესი: ზეთში მოვშუშოთ ხახვი ისე, რომ ფერი არ შეიცვალოს. გავაგრილოთ. შემდეგ დავაყაროთ პატარა კუბიკებად დაჭრილი ყველი, პომიდორი და კიტრი. ვუყოთ გემოვნებით მარილი. ავურიოთ. ზემოდან მოვაწყოთ თხელ ფირფიტებად დაჭრილი ლიმონი და კურკაგამოცლილი, მრგვალად დაჭრილი ზეთისხილი. სალათი მზადაა.
2. საჭირო მასალა: 500 გრამი კიტრი, 2 ჭიქა მოხარშული ბრინჯი, ერთი კონა სალათის ფურცლები, ერთი კონა მწვანე ხახვი, შავი პილპილი, მაიონეზი ან ზეთი, ძმარი.
მომზადების წესი: კიტრი და ხახვი დავჭრათ კუბიკებად. სალათის ფურცლები წვრილად დავხიოთ (დაჭრილი ულაზათოა). დავაყაროთ მოხარშული, გაწურული ბრინჯი, ცოტა შავი პილპილი, ცოტა ძმარი. ამის შემდეგ ზეთი ან მაიონეზი მოვასხათ და ავურიოთ. ორივე არ მოასხათ.
3. საჭირო მასალა: 500 გრამი ბოლოკი, 300 გრამი უცხიმო ძეხვი, ერთი კონა ცერეცო, 4 ცალი საშუალო ზომის კიტრი, ერთი კონა მწვანე ხახვი (თუ არ გვექნება, 2 თავი ხახვით ჩავანაცვლოთ), ერთი პაკეტი მაიონეზი.
მომზადების წესი: მსხვილ სახეხზე გავხეხოთ ბოლოკი, წვრილ კუბიკებად დავჭრათ ძეხვი, კიტრი და ხახვი. ვუყოთ მარილი და შავი წიწაკა გემოვნებით და ავურიოთ მაიონეზთან ერთად.
4. საჭირო მასალა: სამი-ოთხი ცალი ვაშლი, ოთხი ცალი კვერცხი, ერთი ცალი მოზრდილი ხახვი, სამი ცალი პომიდორი, ერთი კონა ცერეცო, ერთი პაკეტი მაიონეზი.
მომზადების წესი: ვაშლი გავხეხოთ მსხვილ სახეხზე. კიტრი, პომიდორი და ხახვი დავჭრათ მსხვილ კუბიკებად. დავუმატოთ მარილი და შავი პილპილი გემოვნებით, მაიონეზი და ავურიოთ.
5. ავიღოთ 500 გრამი მიწის ვაშლი (ტოპინამბური), გავხეხოთ მსხვილ სახეხზე, დავამატოთ კუბიკებად დაჭრილი ნახევარი კილო კიტრი და ორი თავი ხახვი, შემდეგ კი წვრილად დაჭრილი თითო კონა ცერეცო და ოხრახუში. ვუყოთ წიწაკა და მარილი გემოვნებით და ავურიოთ მაიონეზთან ერთად. მიაქციეთ ყურადღება, _ ტოპინამბურით ანუ მიწავაშლათი გაკეთებული სალათი მდიდარია ვიტამინებით.
6. ერთი კილო ბადრიჯანი დავჭრათ კუბიკებად. ჩავყაროთ ანადუღებ ცხელ წყალში და ცოტა ხანს გავაჩეროთ. მერე ამოვწუროთ კარგად. ზეთში ჩავშუშოთ ორი თავი წვრილად დაჭრილი ხახვი და შემდეგ დავაყაროთ ბადრიჯანი. ვურიოთ დროგამოშვებით, არ დაგვეწვას. შემდეგ დავამატოთ ერთი ჭიქა მოხარშული ბრინჯი და წვრილად დაჭრილი ორი კონა ქინძი. შავი წიწაკა და მარილი გემოვნებით.
7. მოვხარშოთ ხუთი კვერცხი. სალათისთვის მხოლოდ ცილას ვიყენებთ, რომელიც უნდა დავჭრათ კუბიკებად. დავაყაროთ ორი ჭიქა მოხარშული ბრინჯი და წვრილად დაჭრილი თითო კონა ხახვი და ცერეცო, მარილი და შავი პილპილი გემოვნებით. შემდეგ ავურიოთ მაიონეზთან ერთად.
