ჩვენს შეკითხვებს სალომე ზურაბიშვილი პასუხობს.
_ ქალბატონო სალომე, როგორც ჩვენთვის არის ცნობილი, ძალიან მალე თქვენ ოფიციალურად განაცხადებთ, რომ საპრეზიდენტო არჩევნებში მიიღებთ მონაწილეობას, როგორც საპრეზიდენტო კანდიდატი.
_ ვინც კითხულობს ჩემს განცხადებებს და ინტერვიუებს, მგონი ყველამ გაიგო კარგად ჩემი განზრახვა … დამალული არც არაფერი ყოფილა… ერთადერთი, მიმაჩნია, რომ სანამ პროცესი დაწყებული არ იყო, არ იყო არჩევნები დანიშნული და არცერთი კანდიდატი ოფიციალურად დარეგისტრირებული, ჩემი მხრიდანაც არ იქნებოდა სწორი ოფიციალური განცხადებების კეთება და არ არსებული კამპანიის ნაადრევად დაწყება. როგორც იქნა, გავიგეთ თარიღი არჩევნებისა (და მინდა ვიფიქრო რომ ჩემმა დაუყონებლივ პროტესტმაც განაპირობა სააკაშვილის მიერ ადრე გამოცხადებული თარიღის შეცვლა, რომელიც პირდაპირ ქართველ ემიგრანტების უფლებების აბუჩად აგდებას ნიშნავდა!) და გადავედით მეორე ეტაპზე, ანუ ხელმოწერების შეგროვებაზე. ამ კამპანიაში ყველა ჩემი მხარდამჭერს შეუძლია თავისუფლად ჩაერთოს და კიდევაც ბევრი უკვე არის ჩართული. ბოლო ეტაპი იქნება ოფიციალური დარეგისტრირება და მხოლოდ ამის მერე ის, რასაც ქვია საარჩევნო კამპანია!
_ რატომ გადაწყვიტეთ, რომ არჩევნებში მიგეღოთ მონაწილეობა?
_ იმიტომ, რომ საქართველოში დადგა დრო, რომ ახალი კონსტიტუციის თანახმად ახალი მმართველობის ფორმა მივიღოთ, სადაც უფლებების და ძალაუფლების რეალურად გადანაწილება და სამივე შტოს დაბალანსების გარანტორი გახდება სწორედაც პრეზიდენტი. არა თვითონ სრულუფლებიანი და კვაზი დიქტატორი არამედ ქვეყნის სტაბილურობის და სუვერენობის სიმბოლო და დამცველი! პრეზიდენტი ბევრ ახალ ფუნქციებს იძენს, თუმცა კარგავს უშუალოდ მართვის სადავეებს. ადამიანის უფლებების გარანტორი, საერთაშორისო თანამეგობრობის წინაშე ქვეყნის ინტერესების გამტარებელი და სახე ქვეყნისა. ასევე ეკისრება მას ფუნქცია ქვეყნის გამაერთიანებლისა, საზოგადოების პოლიტიკურ დაპირისპირების მიუხედავად. ახალმა პრეზიდენტმა უნდა შესძლოს და დაასრულოს ქვეყანაში ამდენი წლის სიძულვილი და ერთმანეთის აუტანლობა და გაუტანლობა! ასეთი ახალი შემწყნარებელი მიდგომა, რომელიც ვერცერთ პარტიიდან ვერ წარმოიშობა, აუცილებლად და სასიცოცხლოდ მეჩვენება დღევანდელი საქართველოს საზოგადოებისათვის, რომლის გაჯანსაღება ასეთ ახალ მიდგომაზეა ანუ ზეპარტიულ, მიუკერძოებელ პრეზიდენტზეა დამოკიდებული. მე დარწმუნებული ვარ იმაში, რომ ამ როლს ვერ შეასრულებს დისკრედიტირებული ნაციონალური მოძრაობის კანდიდატი. საწინააღმდეგო მიზეზის გამო, ასევე არა სასურველად მეჩვენება ქვეყნის პოლიტიკურ განვითარებისათვის ოცნების კანდიდატის გამარჯვება. ზედმეტად გამარჯვებულის კიდევ გამარჯვება ბალანს და ზომიერებას ვერ შემოიტანს!
კანდიდატი, რომელსაც უკვე გამარჯვებული ძალა უალტერნატივოდ მიიჩნევს და როცა გამარჯვებული ძალის ხელშია აღმასრულებელი ხელისუფლება, საკანონმდებლო უმრავლესობა და ცოტა ხანში სასამართლო ხელისუფლებაზე გარკვეული გავლენა, წარმოადგენს საფრთხეს, რომ ხელახლა ერთმა ძალამ მოიპოვოს ისეთი პოლიტიკური უპირატესობა რომელიც ქვეყანაში ვერც ბალანს შემოიტანს, ვერც დემოკრატიას დაამკვიდრებს და ვერც სიწყნარეს დაუბრუნებს ერს!
მიმაჩნია, რომ პრეზიდენტი უნდა ასრულებდეს დამბალანსებლის და გამაერთიანებლის როლს, უნდა იყოს დამოუკიდებელი პიროვნება, რომელიც თუ არა ყველა ძალისთვის, ყოველ შემთხვევაში, პიროვნულად საქართველოს ყველა მოქალაქისათვის მისაღები იქნება.
და კიდევ ერთი და შესაძლოა მთავარი არგუმენტი: ღმერთმა დაგვიფაროს და ისევ აღმოჩნდეს საქართველო ავტორიტარიზმის საფრთხის, ან ძალაუფლების მიკერძოების საფრთხის წინაშე ან კიდევ თავის სტრატეგიული ორიენტაციის და დამოუკიდებლობის დაკარგვის საფრთხის წინაშე, ან კიდევ საქართველოს მოქალაქეებს ემუქრებოდეს კიდევ ერთხელ ადამიანის ღირსების შემლახველი პირობები, პრეზიდენტი უნდა იყოს ის პიროვნება რომელსაც გააჩნია პირადი ავტორიტეტი, გამბედაობა, შინაგანი მკვეთრად გამოყოფილი პრინციპულობა, რომელიც ხელისუფლებას წინ გადაუდგება და თავის სიტყვას იტყვის.
პრეზიდენტი უნდა იყოს წარსულის და აწმყოს შემაერთებელი, გარეთ მყოფ ქართველების და შიგნით დარჩენილ თანამემამულეებს შორის ხიდი და გასაგები ხედვის მატარებელი… ეს არის ის კონცეფცია, რის გამოც მიმაჩნია, რომ დღეს საქართველოს სჭირდება სრულიად განსხვავებული პრეზიდენტი.
_ თქვენი აზრით, საქართველოს მომავალი პრეზიდენტი ქალი იქნება?
_ სხვა ქვეყნის მაგალითზე თუ ვიმსჯელებთ, ეს უკვე გავრცელებული ტენდენციაა. მითუმეტეს საქართველოს ისტორიას, ასევე ჩვენ უახლოეს გავლილ გზას თუ დავეყრდნობით, უთუოდ ამისი დროც დადგა და საჭიროებაც…
