ამის მიზეზი, იქვე, გვერდით პოლიციის შენობის მშენებლობაა. როგორც ამბობენ, “გამჭვირვალე” ოფისის ხედს ძეგლი დაფარავს და დაჩრდილავს.
არადა, ამ ძეგლის გადატანა პოსტშევარდნაძისეულ ეპოქაში რამდენჯერმე სცადეს, მაგრამ ვერ მოახერხეს. ჩვენ ჯერ კიდევ თვეების წინ ვწერდით, რომ ქალაქის ცენტრში მდებარე ყოფილ სასტუმრო “გურიაში” განთავსებულ ორგანიზაციებს (ავტოსადგური, ქალაქის რამდენიმე სამსახური, ორიოდე კერძო ობიექტი და უმოქმედო კაფე, სასტუმრო) სპეციალური ფორმის შევსება მოთხოვეს, თუ რამდენი კვადრატული მეტრი ფართი უკავიათ და როდიდან არიან აღნიშნულ შენობაში. ოთხსართულიან შენობას სარდაფიც აქვს, სადაც ერთ დროს სახელგანთქმული რესტორანი “ქვესკნელი” იყო განთავსებული და ბოლო დრომდე გამვლელთათვის ტუალეტად იყო ქცეული. ტუალეტის თემა ამ შენობისთვის მეტად ყბადაღებულია. ქალაქის საკრებულოს ექს-თავმჯდომარე დავით წულაძე წამდაუწუმ აყენებდა შენობაში ტუალეტის მოწყობის საკითხს ან აქ მომუშავეებს პამპერსები დაგვირიგეთო. სასტუმრო 80-იანი წლების მეორე ნახევარში კეთილმოეწყო და როგორც ლანჩხუთში არსებული ყოველგვარი “ცივილიზაცია”, ისიც “გურიის” წარმატებებს უკავშირდებოდა _ უმაღლესი ლიგის გუნდს უმაღლესი (!) კლასის სასტუმრო სჭირდებოდა. ათ წელზე მეტია, შენობამ თავისი ფუნქცია დაკარგა. ამჟამად იგი ეკონომიკის სამინისტროს ბალანსზეა და კარგა ხანია საუბრობენ, რომ გასაყიდადაა გამზადებული.
ბოლო ორი წელია სერიოზულად მიდის საუბრები მისი გაყიდვის სურვილზე _ ქალაქის ცენტრში, ყველაზე პრესტიჟულ ადგილზე არსებულ ფართს, რა თქმა უნდა, ბევრი მსურველი ჰყავს. არაერთ ლანჩხუთელ ჩინოსანზე, ბიზნესმენსა და ცნობილ სპორტსმენზე იყო საუბარი, ყველაზე დიდი ხმაური კი “ცენტრ პოინტს” უკავშირდებოდა. “ცენტრ პოინტის” ლანჩხუთში შემოსვლა ქალაქისთვის (რომელიც ბოლო დრომდე თავს გადამწვარი მთავარი შენობის ხედით “იწონებდა”) ნამდვილად სასიამოვნო სიახლე იქნებოდა, მაგრამ აქვე პირველად მაშინ ითქვა ისიც, რომ ლანჩხუთის სიმბოლოდ ქცეული აჯანყებული გურულის ძეგლი სასტუმროს მიმდებარე ტერიტორიიდან უნდა გაეტანათ, ასეთი იყო სავარაუდო მყიდველთა მოთხოვნაო. ძეგლი დღევანდელი პარლამენტარის, ხათუნა ოჩიაურის მამის, გიორგი ოჩიაურის ნამუშევარია და 30 წლისაა. სხვათა შორის, ქალბატონმა ხათუნამ, წინასაარჩევნოდ ლანჩხუთში სტუმრობისას აღნიშნა _ რა ვიცი, გურულებს თუ არ მოგწონთ, გადაიტანეთ და მამაჩემს სხვა გავაკეთებინოთო. ვერ გეტყვით, რატომ თქვა ასე მაშინ ჯერ კიდევ მომავალმა პარლამენტარმა. ყოველ შემთხვევაში, გურულები ძეგლით ამაყობენ და ქალაქის სიმბოლოდ თვლიან, იქაა პოლიტიკური თუ სხვა საპროტესტო გამოსვლის ეპიცენტრი. 2002 წელს სწორედ აჯანყებულ, სხვა ვერსიით _ “გადარეულ გურულთან” სურათის გადაღება მიხეილ სააკაშვილს თხოვეს, თუმცა, ხუმრობით იუარა _ შევარდნაძეს არ ვათქმევინებ, სურათი ორ გადარეულს ერთად გადაუღიაო. საპრეზიდენტო არჩევნების წინ, ძეგლზე სააკაშვილის სურათები გააკრეს, რაზეც აქაურები ხუმრობენ _ გურულს ეტყობა ჩეეძინა და აი სურათები მაშინ გუუკრესო.
“მე ნამდვილად არ ვარ ინფორმირებული. პრესსამსახურს დაურეკეთ, ძალიან დიდი ბოდიში, თუ დამავალებთ _ იქ უკეთ გეტყვიან. ლანჩხუთისადმი მე დიდი პატივისცემის მიუხედავად, არა მგონია, ეს რეალური იყოს, რომ ამ ეტაპზე ლანჩხუთში სასტუმრო გავაკეთოთ,” _ აცხადებდა მაშინ ჩვენთან საუბარში პარლამენტის ვიცე-სპიკერი და “ცენტრ პოინტის” დამფუძნებელი რუსუდან კერვალიშვილი, როცა მას ძეგლის აღებისა და ყოფილი სასტუმროს შენობის ყიდვის შესახებ ფაქტის კომენტირება ვთხოვეთ.
რაც შეეხება ყოფილ სასტუმროს, არაერთგზის მცდელობისა, “გურია ნიუსმა” ვერ შეძლო გაერკვია, თუ ვის ბალანსზეა ეს შენობა და ვისთან შეიძლება ფართის დროებით დაკავების შემთხვევაში, ხელშეკრულების გაფორმება. რამდენიმე თვის წინ კი, იქ განთავსებულ ორგანიზაციებს სპეციალური ფორმის შევსება მოთხოვეს. “ჩვენ ამ ფორმის შევსება ქონების მართვის სამსახურმა გვთხოვა, რადგან ეს შენობა ეკონომიკის სამინისტროს ეკუთვნის. ამ შენობაში ქალაქის თვითმმართველობის ორგანოც არის და ჩვენც ვავსებთ ფორმას. აქ საუბარი არ არის მხოლოდ ამ შენობაზე _ ითხოვენ, რაც ეკონომიკის სამინისტროს ბალანსზეა ყველა შენობის მონაცემს. ვერაფერს გეტყვით, ყოველივე რა მიზნით ხდება _ ქონება ეკონომიკის სამინისტროს ეკუთვნის და მისი პრეროგატივაა, რა ფორმა შეგვავსებინოს. არა მგონია, შენობის დაცლაზე იყოს საუბარი, თუმცა დაზუსტებით ვერაფერს გეტყვით. შესაძლოა, ხელშეკრულებები გაფორმდეს,” _ ეს იყო მაშინდელი ოფიციალური კომენტარი, თუმცა დღეს აშკარაა, რომ სასტუმროს შენობას “ვიღაცას” უთავისუფლებენ _ იქ არსებული სახელმწიფო საწარმოები მას შემდეგ, რაც პოლიციას ახალი შენობა ექნება, პოლიციის ყოფილ შენობაში გადავლენ.
სულ მალე გამოჩნდება ისიც, რას ემსახურება “მონაცემების შეგროვება” და “მზადება;” როგორც ჩანს, “აჯანყებულ გურულსაც” აადგმევინებენ ფეხს და პოპულარულ, ლანჩხუთის სავიზიტო ბარათად ქცეულ ძეგლს პოლიციის შუშის შენობას და ყოფილი სასტუმროს ახალ მეპატრონეს “ამ გადარეულს არ დააჩაგვრინებენ”!
გავრცელებული ინფორმაციით, ძეგლი გამგეობა-საკრებულოს შენობის წინ მდებარე სკვერის ბოლოში “გადავა”, სადაც კომუნისტების დროს ლენინის ძეგლი იდგა. წინასწარ რომ ხალხს არავინ არაფერს დაეკითხება, ცხადია; გაუგებარია ისიც, რა საჭიროა ამდენი ხარჯის გაწევა ძეგლების “სატარებლად”, თუმცა, ამ კითხვებზე პასუხისთვის თავს, სავარაუდოდ, არავინ შეიწუხებს!
დასასრულ, გთავაზობთ, თუ რას წერენ “ფეისბუქზე” სპეციალურად ამ თემაზე გახსნილ ფორუმზე:
_ მართლა იღებენ???
_ კი, გადააქვთო.
_ და რას დგამენ თუ იცი აჯანყებული გურულის მაგივრად? დაჩმორებული გურულის ძეგლს? ისე, ხედს აფუჭებსო ვერ იტყვიან, უკან რომ კორპუსი დგას, ის ხო ხატავს ქალაქს:)
_ აუ, ეს რა არტეფაქტები ყოფილა ჩვენ ქვეყანაში კიდევ:)
_ წინ პოლიციის გამჭვირვალე შენობას აშენებენო და ფონად აჯანყებული არ უხდებაო:)
_ პოლიციელის ფორმა რომ ჩააცვან აჯანყებულ გურულს? დახატავს!!!!
_ ხო, ვარდის სურნელმა ნახეთ რა გვიან ჩამოაღწია გურიაში:)
_ ბიჭო, სტადიონს მიხედეთ თუ შეგიძლიათ:) რას ჰგავს მართლა, სირცხვილია:) რას დასდევთ ამ თავგზააბნეულის “ძეგლს”
_ ეგ რა არის, რაჭაში, ჩემ სოფელში ბევრს არ სცოდნია, შევარდნაძე რომ აღარ არის ბოსი.
_ სტადიონს და გუნდს მიხედოს უმშვენიერესმა ვერონიკამ, (რომელსაც დიდი კბილები აქვს), მაგის ბალანსზეა ორივე:) არ ხსნის ბალანსიდან ცოცხალი თავით!
_ დიდი კბილები აქვსო რა პონტში თქვა? ტვ-ებს აღარ ვუყურებ, “დაჟე” “მაესტროს” ღამის გამოშვებასაც შევეშვი:(
_ “თავიდანვე ვაფრთხილებდი ყველას, არ მოტყუებულიყვნენ ვერა ქობალიას სანდომიანი გარეგნობით, რადგან კბილები მას იმაზე დიდი აქვს, ვიდრე, დელფინს, რომელსაც ხახაში ჩავუყავი თავი” _ ავტორი სესნას შეუდარებელი პილოტი და არქიტექტორი მიხეილ სააკაშვილია…
_ ვაიმე, ფრაზა უფრო მაგარი ყოფილა, ვიდრე ველოდი:)
_ წავიღე სიგნიჩად ფორუმზე:) აუ, ტანკეს რა მამალ ფრაზებს ველევი ამის გულისთვის…
_ “აჯანყებული გურულის” ძეგლი გახსნილა ლანჩხუთში 1981 წელს, მოქანდაკე _ ირაკლი ოჩიაური (პარლამენტარ ხათუნა ოჩიაურის მამა).
