“გამოვაცხადოთ გურია უღატაკეს რეგიონად!”

დაიწყო ხელმოწერების შეგროვება, გამოკრულია შემდეგი სახის მოთხოვნები: “გამოცხადდეს გურიის რეგიონი უბედურებისა და სტიქიით განადგურების ზღვარზე მყოფ რეგიონად!” “SOS!” “რა მიგაჩნიათ პრიორიტეტად: სოფლის აღორძინება, ბიზნესის დაფინანსება, სამუშაო ადგილების შექმნა თუ ლანჩხუთის “გურიას ” ფეხბურთელთა გუნდის დაფინანსება უმაღლეს ლიგაში”?!” და ა.შ.

შუადღისთვის 117 მოქალაქის ხელმოწერა შეგროვდა. როგორც აქციის ორგანიზატორმა, ჯონი ფირცხალაიშვილმა გვითხრა, ის ხელმოწერების შეგროვებას გააგრძელებს მანამდე, სანამ არ იქნება საკმარისი რაოდენობა, რათა შემდგომ ეს წინადადებები წარედგინოს საქართველოს პრემიერ მინისტრს.

ჯონი ფირცხალაიშვილი: “გუშინ დავაანონსეთ, რომ დღეს ჩატარდებოდა აქცია, რომელიც შეეხება შემდეგ საკითხს: გურიის რეგიონი მისულია სიღატაკის ზღვარზე. რატომ გავხდით იძულებული გადაგვედგა გამოიწვია მსგავსი ნაბიჯი? 9 თვე გავიდა მას შემდეგ, რაც ხელისუფლებაში მოვიდა ” ქართულმა ოცნება”. ეს ცხრა თვე მოლოდინის რეჟიმში ვართ _ გვპირდებიან მდგომარეობის გამოსწორებას დღეს არა, ხვალ, ხვალ არა _ ზეგ და მოლოდინიც ასე გაგველია ხელში. “გურია ნიუსში” ერთხელ უკვე გამოქვეყნდა წერილი ჩემს შესახებ სათაურით: “პოლიტიკური ორიენტაციის გამო დაზარალებული ფერმერი წიწილებს შემოდგომაზე მაინც დაითვლის”. მასში დასახელებულია პრობლემები, რომელიც მე შემიქმნა ყოფილმა ხელისუფლებამ. ლანჩხუთის მაჟორიტარი დეპუტატი თემურ ჩხაიძე თავად მახლდა თბილისში “ქართუ ბანკის ” დირექტორთან იმ მოთხოვნით, რომ ერთ-ერთ პრიორიტეტულ დარგს ლანჩხუთში _ მეფრინველეობას, გაეწიოს დახმარება და დააფინანსონ გრძელვადიანი სესხით. რაიონის გამგებელი მოწადინებულია, რომ გაკეთდეს რაღაც, მაგრამ ამაოდ. ვერ მივაღწიეთ ვერაფერს, ვერ მოვნახეთ საშუალება, რომ დავუკავშირდებით პრემიერმინისტრს. ამიტომ, რომ მივიქციოთ მისი ყურადღება, დავიწყეთ ხელმოწერების შეგროვება. ჩვენ ვითხოვთ მიაქციონ ყურადღება ჩვენს რაიონს, საერთოდ, გურიას რეგიონს. სცნონ ეს რეგიონი უღატაკეს რეგიონად, მას მიზნობრივად გამოეყოს გარკვეული თანხა, რომელსაც განკარგავს ადგილობრივი ხელისუფლება და მისცემს იმას, ვისაც ეკუთვნის და შეუძლია რამე სარგებელი მოუტანოს გურიას. რაც შეეხება სესხს, რომლის გაცემას მთავრობა გეგმავს, არაა ჩვენზე მორგებული, ვინაიდან ლანჩხუთელ მეწარმეს არ აქვს იმის საშუალება, რომ პროცენტები იხადოს. მე უკრაინაში ვცხოვრობდი, დავიჯერე სააკაშვილის მატყუარა დაპირებები და წამოვედი. ჩემი ფულით ავაშენე მეფრინველეობის საწარმო _ ჩავდე 150 000 ლარი, მაგრამ არაფერი გამოვიდა. საწარმოს ამუშავების შემთხვევაში, შემიძლია დავასაქმო 50 ადამიანი, ჩემნაირი ბიზნესმენი კი საკმაოდ ბევრია ლანჩხუთში, რომლებიც, დაფინანსების შემთხვევაში, 50-50 ადგილობრივ დაასაქმებენ. რა იქნება ამაზე კარგი საქმე რაიონისთვის?

არ ვართ არანაირად ფეხბურთის წინააღმდეგი, მაგრამ რა ხდება დღეს? მიდის მსჯელობა იმაზე, თუ როგორ მოხდეს ლანჩხუთის “გურიას ” დაფინანსება, რისთვისაც საჭიროა 2 მილიონი ლარი. არიან პირები, რომლებიც იბრძვიან ამ თანხის შესაგროვებლად. მე მინდა ის ადამიანი დავინახო, ვინც იქნება ბიზნესის აღორძინების თანხის მოძიებაში ჩართული. რატომ ვებრძოდით და ვლანძღავდით სააკაშვილის რეჟიმს? აშენებდნენ შადრევნებს, ძეგლებს… ჩვენ კი არ ვამბობთ, რომ შადრევანი არ მოგვწონს, მაგრამ როცა სახლში ცოლ-შვილი მშიერი მყავს, შადრევანი არ მინდა. ახლა იგივე მეორდება _ ოღონდ ფეხბურთის კუთხით. ის თუ შეუძლია ვინმეს, ამდენი თანხა გამონახოს, როცა მოედანზე წამსვლელი არაა, რაღაც თანხა ფეხბურთის სკოლისთვის გამოვყოთ, დამწყები თაობისთვის, რასაც ბევრად ნაკლები თანხა დაჭირდება, ვიდრე ჩამოყვანილი, დაქირავებული ფეხბურთელების რჩენას. მერე ჩვენი გაზრდილი სპორტსმენები სხვა, მდიდარ კლუბებში გავყიდოთ, სოფლის მეურნეობას მივხედოთ! თუ პური არ გვექნა, რად გვინდა ფეხბურთი? ადამიანს როცა არ შია, მაშინ უნდა ფეხბურთიც და ხელოვნებაც,” _ გვითხრა აქციის ორგანიზატორმა ჯონი ფირცხალაიშვილმა.