საქართველოს სხვადასხვა რეგიონში, საოლქო-საარჩევნო კომისიების ტრენერების ნაწილი კონტროლის პალატის თანამშრომლებისგან დაკომპლექტდა. მათ შორის კონტროლის პალატის იურიდიული დეპარტამენტის უფროსის მოადგილე ივანე პეტრიაშვილი, “შემთხვევით” იმ რაიონში აღმოჩნდა, სადაც თავისი ზემდგომი, ლევან ბეჟაშვილი მაჟორიტარად იყრიდა კენჭს. ამ ყველაფრის გვირგვინს კი წარმოადგენდა ეგრეთწოდებული “საქმიანობა”, რომელიც ცალსახა პოლიტიკური დაკვეთისა და მიკერძოების ნიშნით აწარმოვა 2012 წლის წინასაარჩევნო პერიოდში აუდიტის სამსახურის პოლიტიკური პარტიების ფინანსური მონიტორინგის სამსახურმა.” _ აღნიშნულია დროებითი საგამოძიებო კომისიის ანგარიშში, რომელმაც კონტროლის პალატის 2012 წლის საქმიანობა შეისწავლა.
ერთ დროს “ნაციონალური მოძრაობის” ლობისტი აუდიტის სამსახური ბოლო პერიოდში “სხვა მიმართულებით” გააქტიურდა. ამას შედეგად მოყვა ის, რომ “ნაციონალური მოძრაობის” 2012 წლის დარღვევები ახლახანს “აღმოაჩინეს”. ახლა გაახსენდათ, რომ შსს-ს შემოწმებაც შეიძლებოდა და მისი ცენტრალური აპარატისაც. პირველად, ამ 9 წლის განმავლობაში, კონტროლის პალატამ ივანე მერაბიშვილის სახელი ახსენა და ინფორმაცია გაასაჯაროვა.
“სახელმწიფო აუდიტის სამსახურმა ჩაატარა საქართველოს შინაგან საქმეთა სამინისტროს ცენტრალური აპარატის 2011 და 2012 წლების ფინანსური და შესაბამისობის აუდიტი.
აუდიტის შედეგად გამოვლინდა “სახელმწიფო შესყიდვების შესახებ” საქართველოს კანონისა და შესაბამისი კანონქვემდებარე ნორმატიული აქტების მოთხოვნების დარღვევის ფაქტები.
გარკვეული შესყიდვები კერძო კომპანიებისგან განხორციელებულია გამარტივებული შესყიდვის გზით, რის მიზეზადაც სახელდებოდა შესყიდვის გადაუდებელი აუცილებლობა, მაშინ როდესაც რეალურად ასეთი გადაუდებელი აუცილებლობა არ არსებობდა.
კერძოდ, 2011 წლის ნოემბერში შპს “ალგორითმისგან“, ერთ პირთან მოლაპარაკების გზით, სამინისტრომ შეისყიდა 5,000 ცალი პლანშეტური კომპიუტერი 2,775,000 ლარად. ასევე, 2012 წლის იანვარში გამოცხადებულ ტენდერში გაიმარჯვა შპს “ალგორითმმა”, რომელიც იყო ერთადერთი პრეტენდენტი და ამ შემთხვევაში მისგან შეძენილია 2,000 ცალი პლანშეტური კომპიუტერი 1,100,000 ლარად. შპს “ალგორითმმა” შინაგან საქმეთა სამინისტროს პროდუქცია მიჰყიდა 30%-იანი ფასნამატით, რამაც ჯამურად შეადგინა 749,000 ლარი.
ასევე, შინაგან საქმეთა სამინისტრომ 2012 წლის ივლისში, ერთ პირთან მოლაპარაკების გზით, შპს “საქართველოს ფოსტისგან” შეისყიდა 981,000 ლარის ღირებულების ავტოსატრანსპორტო საშუალებების სათადარიგო ნაწილები. შპს “საქართველოს ფოსტის” მიერ წარმოდგენილი დოკუმენტებიდან გაირკვა, რომ ფასნამატმა აღნიშნულ შესყიდვაზე შეადგინა 360,000 ლარი. აუდიტის შედეგად დადგინდა სხვა შესყიდვებიც, როდესაც შესყიდულ საქონელზე ფასნამატი იყო არაგონივრულად მაღალი. მაგალითად, 2011 წლის სექტემბერში შპს “მეჯიქ კომპანისგან” შესყიდულია სიჩქარის საზომი რადარები 2,049,900 ლარად, სადაც შპს “მეჯიქ კომპანისთვის” ფასნამატის სახით გადახდილია 551,800 ლარი.
ამრიგად, აღნიშნული ფაქტების გათვალისწინებით, შინაგან საქმეთა სამინისტროს მიერ არაეკონომიურად გახარჯულია 1,660,800 ლარი. სახელმწიფო აუდიტის სამსახური აუდიტის მასალებს შემდგომი მოკვლევისათვის გადაუგზავნის სამართალდამცავ ორგანოებს.” _ ნათქვამია აუდიტის სამსახურის მიერ გავრცელებულ ინფორმაციაში.
აუდიტის სამსახურის ხელმძღვანელი ლაშა თორდია “გურია ნიუსთან” აცხადებს, რომ ყველაფერს გააკეთებს აუდიტის სამსახურის შელახული იმიჯის აღსადგენად, თუმცა არც ის და არც ლევან ბეჟაშვილი ამ “შელახულ იმიჯზე” პასუხისმგებლობას არ იღებენ მიუხედავად იმისა, რომ ყველაფერი მათი ხელმძღვანელობის პერიოდში ხდებოდა.
ლაშა თორდიას თავისი “მოღვაწეობის” მანძილზე ჟურნალისტებისთვის (ამ დრომდე) ერთი შეხვედრაც არ გაუმართავს. აუდიტის სამსახურის მთავარი საქმე “ქართული ოცნების” შემომწირველთა დაჯარიმება იყო და მთავარი ფუნქციის, აუდიტის ჩასატარებლად, “დრო არ ყოფნიდათ”, რასაც მოწმობს შემდეგი სტატისტიკა.
2012 წელს სულ მომზადდა 45 აუდიტის ანგარიში, რაც 20-ჯერ ნაკლებია 2006 წლის ანალოგიურ მონაცემებთან შედარებით – 883 აქტი; სამართალდამცავებს გადაეგზავნა მხოლოდ სამი დანაშაულის ნიშნების შემცველი კანონდარღვევის ფაქტი, რაც 69-ჯერ ნაკლებია 2006 წლის ანალოგიურ მონაცემებთან შედარებით – 208 მასალა,
დროებითი საპარლამენტო კომისიის თავმჯდომარე ნოდარ ებანოიძე “გურია ნიუსთან“ აუდიტის სამსახურის დანაშაულებრივი სქემებზე საუბრობს და ამბობს, რომ ამ საჯარო უწყებაში პრივილეგირებულ თანამშრომელთა სია არსებობდა, რომლებიც ყოფილ მმართველ პოლიტიკურ ძალასთან იყვნენ დაახლოებულნი და მათი ხელფასები თუ პრემიები გაცილებით აღემატებოდა იმ პირების ყოველთვიურ შემოსავალს, რომლებიც უშუალოდ აუდიტს აწარმოებდნენ.
მისივე თქმით, სახელმწიფო აუდიტის სამსახური მთელი ამ წლების განმავლობაში მმართველი პოლიტიკური ძალის დაკვეთებს ასრულებდა, რის გამოც სამსახურმა ფუნქცია სრულიად დაკარგა. დროებითი საგამოძიებო კომისიის თავმჯდომარე ფიქრობს რომ ანგარიშის მომზადებისას ბევრი ისეთი საკითხი გამოიკვეთა რაზეც გამოიძიება აუცილებლად უნდა დაიწყოს.
პარლამენტის საფინანსო – საბიუჯეტო კომიტეტის თავმჯდომარე, დავით ონოფრიშვილი ჩვენთან საუბრისას აცხადებს:
“სამსახური, რომელიც სამაგალითო უნდა იყოს ქვეყანაში თავისი გამჭირვალობით, კანონის და დაკისრებული ვალდებულების ზედმიწევნით აღსრულებით და პროფესიონალიზმით, ფაქტობრივად, მთელი წლის განმავლობაში გადასული იყო ოპოზიციის პოლიტიკურ დევნაზე. საქმისთვის, როგორ ჩანს, ნაკლებად ეცალათ, რადგანაც მთელი ამ პერიოდში უბრალოდ 57 დასკვნა არის გაკეთებული მხოლოდ და მხოლოდ, როცა წინა წლებში, მაგალითად 2011 წელს, 100-ზე მეტი იყო, უფრო ადრე _ კიდევ უფრო მეტი.
წლებია არ შემოწმებულა ისეთი მნიშვნელოვანი ხარჯვითი ერთეულები, როგორიცაა თავდაცვის სამინისტრო, რეგიონული განვითარებისა და ინფრასტრუქტურის სამინისტრო, კულტურის სამინისტრო, უშიშროების საბჭო, რამდენიმე წელია არ შემოწმებულა საქართველოს პრეზიდენტის ადმინისტრაცია, უზენაესი სასამართლო, იუსტიციის სამინისტრო, სოფლის მეურნეობის სამინისტრო…
ეს არის ის პოლიტიკა, რაც ტარდებოდა ბოლო პერიოდში მიხეილ სააკაშვილის და “ნაციონალური მოძრაობის” ხელმძღვანელობით. ქართველ ხალხს, საზოგადოებას არ უნდა ცოდნოდა, რაში და როგორ იხარჯება ის ფული, რომელიც ბიუჯეტით იყო გათვალისწინებული”.
“კომისია მაქსიმალურად შეეცადა განრიდებოდა დასკვნის სხვადასხვა თავებში პოლიტიკური დატვირთვის მქონე შეფასებებსა და განცხადებებს, მიუხედავად ამისა, ობიექტური რეალობა მოითხოვს აღინიშნოს, რომ 2007 წლის მაისიდან პალატა სრულად იქნა დაქვემდებარებული ყოფილი მმართველი პარტიის კონტროლს, 2007 წლიდან პროფესიონალ და გამოცდილ მოსამსახურეებს მასობრივად აიძულებდნენ განცხადებების დაწერას, დაითხოვეს წლების მანძილზე დიდი შრომით ჩამოყალიბებულ კვალიფიციურ ხელმძღვანელთა და აუდიტორთა კადრები.” _ნათქვამია საპარლამენტო კომისიის მიერ მომზადებულ ანგარიშში.
როგორც ჩანს, აუდიტის სამსახური, რომელშიც ისევ ძველი შემადგენლობა რჩება, შელახული რეპუტაციის აღდგენას ახლა უკვე იმ პოლიტიკური ძალის დარღვევების “გამომზეურებით” ცდილობს, რომელსაც აქამდე დაუფარავად ლობირებდა… ამის მაგალითად ისიც კი საკმარისია, რომ პერსონალურ ინფორმაციად “ასაღებდა” “ნაცმოძრაობის” დაჯარიმებულ შემომწირველთა ვინაობას და ნათია მოგელაძის თანამშრომელთა სახელობით სიას, აღარაფერს ვამბობთ იმ სადამსჯელო ღონისძიებებზე, რასაც “ქართული ოცნების” შემომწირველთა მისამართით ახორციელებდა…
