“მკვდარი, “მიწაში ჩადებული” “ნაციონალური მოძრაობა” გავაცოცხლეთ და ვაფიქსირებთ ოპოზიციურ ძალად!”

უფრო და უფრო მეტ ნაბიჯებს ვდგამთ იმ მიმართულებით, რომ საქართველო გახდეს დამოუკიდებელი ტერიტორია და არა სახელმწიფო. არ შეიძლება სახელმწიფო დამოუკიდებლად ვერანაირ გადაწყვეტილებას ვერ იღებდეს, თუნდაც ქვეყნის შიგნით სასამართლო რეფორმის ჩატარებაზე, ან იმ ადამიანების დასჯაზე, რომლების 12 822 ადამიანის პირად ცხოვრებაში შეიჭრა, ვინც ასობით ადამიანი გააუპატიურა ციხეში. ამას ვერ იძიებდე ხელისუფლება და სხვა ქვეყნისკენ იყურებოდე, ეს ნიშნავს იმას, რომ ჩვენ არ ვართ დამოუკიდებლები.” _ აცხადებს “გურია ნიუსისთვის” მიცემულ ინტერვიუში პრეზიდენტობის კანდიდატი ნინო ბურჯანაძე.

_ “ნაციონალური მოძრაობა დანაშაულებრივი ორგანიზაციაა და ის უნდა აიკრძალოს. უნდა დადგეს მისი პოლიტიკური და სამართლებრივი აკრძალვის საკითხი” _ ეს თქვენი ციტატაა. როგორ ფიქრობთ, დემოკრატიული ინსტიტუტები და საერთაშორისო თანამეგობრობა პრეზიდენტობის კანდიდატისგან გაკეთებულ ამ სახის განცხადებას ოპოზიციურ პარტიაზე ზეწოლად არ მიიჩნევენ? არაა გამორიცხული,  ამის გამო თქვენ ძალიან გაგაკრიტიკონ.

_  იცით რა, მე კრიტიკის რომ შემშინებოდა, არც ხელისუფლებაში ვიქნებოდი და არც ოპოზიციაში. აქ მნიშვნელოვანია ის, რომ ჩემს მიერ ნათქვამი სიტყვები სწორად იქნას მიტანილი როგორც ქვეყნის შიგნით, ისე საერთაშორისო საზოგადოებამდე.

მე არსად მითქვამს და არც ვამბობ, რომ “ნაციონალური მოძრაობა” უნდა აიკრძალოს ან დანაშაულებრივ ორგანიზაციად ჩაითვალოს იმიტომ, რომ  ასე უნდა ბურჯანაძეს. მე ვამბობ: უნდა ჩატარდეს ობიექტური, სრულყოფილი, მასშტაბური გამოძიება “ნაციონალური მოძრაობის” მოქმედებების, იმ რეპრესიების, მასობრივი წამების  ფაქტებზე, რომელთა შესახებაც ჩვენ ყოველდღიურად ვიგებთ.  ობიექტური გამოძიების შედეგად, მე შინაგანად ამაში დარწმუნებული ვარ, დამოუკიდებელი სასამართლო აუცილებლად გამოიტანს გადაწყვეტილებას, რომელიც მიმართული იქნება “ნაციონალური მოძრაობის” ხელისუფლების უმაღლესი პირების პასუხისმგებლობის დაყენების და ნაციონალური მოძრაობის აკრძალვის. მე ამ სქემაზე ვსაუბრობ, რომელსაც ვერ შეედავება და ვერ გააკრიტიკებს ვერცერთი დასავლეთელი პოლიტიკოსი და ვერცერთი ადამიანი, რომელსაც დემოკრატიაზე ელემენტარული პრეტენზია აქვს.

თუ ობიექტური გამოძიება და სასამართლო იტყვის, რომ “ფრთიანი ანგელოზები” იყვნენ “ნაციონალები და ჩვენ ყველას გვეჩვენება ის, რაც დაემართა საქართველოს მოსახლეობის დიდ ნაწილს, ასეთ შემთხვევაში გასაგები იქნება რაშია საქმე.

ჯერ ერთი, ძალიან ზედმეტად ვაკეთებთ აპელირებას დასავლეთის პოზიციებზე. დასავლეთი თავის მოსაზრებას გამოთქვამს, თავის რეკომენდაციას  გასცემს, მაგრამ ყველა დამოუკიდებელმა ქვეყანამ გადაწყვეტილება უნდა მიიღოს არსებული რეალობიდან გამომდინარე. უკაცრავად რა, დასავლეთი არ იყო პინოჩეტი რომ გაასამართლებინა ჩილეს?  არცერთმა ქვეყანამ რომ არ მიიღო დიდი ბრიტანეთის გარდა და 90 წლის კაცი გაასამართლეს, ეს არ იყო დემოკრატიული დასავლეთი?

დასავლური მხარდაჭერა არ ჰქონდა მუბარაქის გასამართლებას?

_ დასავლეთმა არ იცის, რა ხდებოდა საქართველოში? ისინი ხომ ძალიან ყურადღებით აკვირდებიან მიმდინარე მოვლენებს?

_ იცით, როგორ არის საქმე? თუ ვიქნებით ამ კოჰაბიტაციის ხიბლში, დასავლეთი, რა თქმა უნდა, ვერასდროს გაიგებს რას ვერჩით იმ ხალხს,  რომელმაც  დემოკრატიული  არჩევნებით “გადმოგვცა” ხელისუფლება, რომლებიც ვითომდა ხელს უწყობენ ახალ ხელისუფლებას, იქ კონსტიტუციაზე  მოგვცეს ხმა და ასე შემდეგ. დასავლეთს თუ არ ავუხსნით ამ ყველაფრის უკან რა დგას, რა თქმა უნდა, ვერასდროს გაიგებენ ვის რას ვერჩით.

მართლა ყველაფერს ხომ  აქვს საზღვარი? ვითმენთ იმას, რომ თბილისს “ნაციონალური მოძრაობა” მართავს, ვითმენთ იმას, რომ  გავაცოცხლეთ მკვდარი, მიწაში ჩადებული “ნაციონალური მოძრაობა და შესაძლებლობას ვაძლევთ, დაფიქსირდეს ერთ-ერთ მთავარ ოპოზიციურ ძალად.

არ შეიძლება სახელმწიფო დამოუკიდებლად ვერანაირ გადაწყვეტილებას ვერ იღებდეს, თუნდაც ქვეყნის შიგნით სასამართლო რეფორმის ჩატარებაზე, ან იმ ადამიანების დასჯაზე, რომლებიც 12 822 ადამიანის პირად ცხოვრებაში შეიჭრნენ, ვინც ასობით ადამიანი გააუპატიურა ციხეში. ამას ვერ იძიებდე ხელისუფლება და სხვა ქვეყნისკენ იყურებოდე, ეს ნიშნავს იმას, რომ ჩვენ არ ვართ დამოუკიდებლები.