ამ შეხვედრით კოალიცია “ევრაზიული არჩევანი _ საქართველო” ქვეყნის ევრაზიულ კავშირში გაწევრიანების თემაზე საჯარო კონსულტაციებს იწყებს.
შეხვედრას წინ უძღოდა კოალიციაში შემავალი “ერეკლე მეორის საზოგადოების” თავმჯდომარის არჩილ ჭყოიძის “თაიმერის” პრესკლუბში ჟურნალისტებთან შეხვედრა. მისი განცხადებით კოალიციის წევრები იმყოფებოდნენ ქუთაისში, კახეთში, გორში და ადგილობრივი მოსახლეობის პრობლემებს ეცნობოდნენ.
არჩილ ჭყოიძე: :მოსახლეობა პროდუქციის რეალიზაციას ვერ ახერხებს, რადგან ახალი მთავრობის წინასაარჩევნო დაპირების მიუხედავად, რუსეთის ბაზარი ქართველი გლეხისთვის ამ დრომდე დაკეტილია. ამას გარდა, აზერბაიჯანულმა მხარემ საქართველოს პროდუქციის გატანაზე ბაჟი დაუწესა, რამაც ვითარება კიდევ უფრო დაამძიმა.
რას ფიქრობს ხალხი ქართულ-რუსულ ურთიერთობებზე, რას ფიქრობენ ევრაზიულ კავშირზე? მათ მწირი ინფორმაცია აქვთ ამ კავშირზე, რადგან ეს ორგანიზაცია სააკაშვილის მთავრობის მიერ 9 წლის მანძილზე იბლოკებოდა. კახეთის მოსახლეობის უმეტესობა ამბობს, რომ ჩვენ იმიტომ მივეცით ბიძინა ივანიშვილს ხმა, რომ იმედი გვქონდა, რუსეთის ბაზარი აღდგებოდაო. მათი დიდი ნაწილი ნაწილი რუსეთთან ურთიერთობის მომხრეა, აინტერესებთ ევრაზიული კავშირი და არიან უარყოფითად განწყობილები ნატოს და ევროკავშირის მიმართ. გორში მრგვალი მაგიდის ჩატარება იმიტომ გადავწყვიტეთ, რომ გორის გვერდით არის ცხინვალი, სამაჩაბლო, ერთ-ერთი ყველაზე რთული და მტკივნეული თემა საქართველოსთვის. ქართულ-ოსურ ურთიერთობების შესახებ ჩვენ საუბრებს ვისმენთ ყველგან, გარდა გორისა _ ჟენევაში, ამერიკაში და ა.შ. საუბრობენ ისეთი ადამიანები, რომლებსაც არანაირი შეხება არ აქვთ იქ ადგილობრივ მოსახლეობასთან, რეალურად კი არაფერი კეთდება მდგომარეობის გასაუმჯობესებლად. ყველაზე კარგად ადგილობრივმა მოსახლეობამ იცის, რა ხდება რეალურად იქ და რა პრობლემებია. ჩვენმა კოალიციამ საჭიროდ ჩათვალა, რომ აუცილებელია მსგავსი ტიპის შეხვედრა გორში გაიმართოს, რათა მოსახლეობისგან გავიგოთ, თუ რას ფიქრობენ ცხინვალში და ასევე, რას ფიქრობს ჩვენი მოსახლეობა მათზე. ასევე იქნება დისკუსია იმაზე, თუ როგორ უნდა მოხდეს მშვიდობიანად საქართველოს ტერიტორიული მთლიანობის აღდგენა”.
შეხვედრაში პარლამენტის ყოფილი წევრი პეტრე მამრაძე, “ერეკლე მეორეს საზოგადოების” თავმჯდომარე არჩილ ჭყოიძე, არასამთავრობო ორგანიზაციის “ევრაზიული არჩევანი _ საქართველო” წარმომადგენლები და სხვა დაინტერესებული პირები მონაწილეობდნენ.
ღონისძიების მსვლელობისას საუბარში ინტერნეტის მეშვეობით “ევრაზიული მოძრაობის” ლიდერი ალექსანდრე დუგინი ჩაერთო. მისი განცხადებით, “პროდასავლური კურსის გაგრძელების შემთხვევაში შესაძლოა, საქართველოს სადღეისოდ არსებული საზღვრებიც კითხვის ნიშნის ქვეშ დადგეს”.
კოალიციის წევრებმა საზოგადოებას და მედიის წარმომადგენლებს საქართველოს უშიშროების ყოფილი მინისტრის ვალერი ხაბურძანიას მიმართვაც გააცნეს.
არასამთავრობო ორგანიზაცია “ევრაზიული არჩევანი – საქართველოს” თავმჯდომარე მაია ხინჩაგაშვილმაგორში გამართულ ღონისძიებას გამოეხმაურა ედპ-ს ლიდერი, ბაჩუკი ქარდავა:
“ჯანსაღად მოაზროვნე ქართულ საზოგადოებას კარგად ახსოვს 2008 წლის აგვისტოს ომის დღეებში კრემლის მთავარი იდეოლოგის ალექსანდრე დუგინის მიერ გამოთქმული უკმაყოფილება რუსეთის ხელისუფლებისდამი, თუ რატომ არ მოხდა რუსული ტანკების შესვლა საქართველოს დედაქალაქში, და რომელიც პირდაპირ მოუწოდებდა რუსეთს საქართველოს წინააღმდეგ სამხედრო აგრესიისკენ.
უკვე მერამდენედ, ადგილი აქვს საქართველოში ხან ევრაზიულ კავშირად შეფუთული საბჭოთა კავშირის და ხან ერთმორწმუნე ძმის პროპაგანდას, რომლის უკანაც რეალურად, ის რუსული იმპერია დგას, რომელიც ჯერ დამოუკიდებლობას გვტაცებდა და შემდეგ მონასტრებსაც გვიღებავდა ქართული კვალის წასაშლელად.
ბლეფია იმ ადამიანების მცდელობა, რომლებიც დასავლური ლიბერალური იდეოლოგიის ქართველების მტრის ხატად წარმოჩენას ცდილობენ, ხოლო თავად რუსული შოვინიზმის სამსახურში ჩაეწერნენ. მინდა მათ შევახსენო, რომ ისტორიულად, ყველა პატრიოტი ქართველი ქვეყნის ხსნას სწორედ დასავლურ სამყაროში ხედავდა.
თავმოყვარე და ღირსების მქონე ქართველისთვის სირცხვილია, როცა გორში, იმ ქალაქში, რომლის მშვიდობიანი მოსახლეობა, რამდენიმე წლის უკან, რუსული სამხედრო თვითმფრინავების მიერ იბომბებოდა, იწვევდე და უსმენდე შენი ქვეყნის ოკუპაციის ერთ-ერთ მთავარ იდეოლოგს. სირცხვილია და იმ ქართველი ჯარისკაცების შეურაცხყოფაა, რომლებმაც საკუთარი სიცოცხლე შესწირეს საქართველოს ტერიტორიულ მთლიანობას.
როგორც ჩანს, ზოგიერთი არაჯანსაღი ქართველისთვის სირცხვილად აღარ ითვლება რუსეთის სპეცსამსახურებთან ღია თანამშრომლობა, როგორც სჩანს კარგი დრო დაუდგათ პუტინისა და მისი იდეოლოგის დუგინის “შნირებს” საქართველოში, მაგრამ ნუ დაავიწყდებათ, რომ ეს დროებითია,” _ განაცხადა ქარდავამ.
