ძლიერმა წვიმამ წალენჯიხის რაიონში წყალდიდობა გამოიწვია. სტიქიამ წალენჯიხის მუნიციპალიტეტის 10 სოფელს შუქმნა პრობლემები. ადიდებულმა ღელეებმა და მდინარე ინწირამ წალენჯიხის რაიონის ორ სოფელში, ჯგალსა და საჩინოში საცხოვრებელი სახლების პირველი სართული მთლიანად დატბორა. მთლიანად განადგურდა ერთწლიანი ნარგავები.
რთული სიტუაციაა წალენჯიხის ცენტრალური საავადმყოფოს შენობაშიც, სადაც სოციალურად დაუცველი ოჯახები ცხოვრობენ.
წალენჯიხის მუნიციპალიტეტის საკრებულოში აცხადებენ, რომ „19 ივლისს უხვმა ნალექმა მნიშვნელოვნად დააზარალა წალენჯიხის მუნიციპალიტეტი. ძლიერი წვიმის შედეგად 10-მდე თემში დატბორილია გზები და საცხოვრებელი სახლები. რამოდენიმე ადგილზე ჩამოწვა მეწყერი, განადგურებულია საკარმიდამო ნაკვეთები, ყანები და დახოცილია შინაური ფრინველები. ძლიერი წვიმის შედეგად ფაქტობრივად მწყობრიდანაა გამოსული ჯვარი-ჩქვალერის დამაკავშირებელი მაგისტრალი. ადგილზე მობილიზებულია ტექნიკა და მიმდინარეობს აღდგენითი სამუშაოები ადგილობრივი ხელისუფლებისა და სტიქიის სალიკვიდაციო კომისიის ერთობლივი ძალისხმევით“.
სტიქიას ებრძვიან ზუგდიდშიც _ ჯიხაშკარში, ცაიშში, ოქტომბერსა და თარგამულში ადიდებულმა მდინარეებმა და ღელეებმა ადგილობრივ მოსახლეობას დიდი ზარალი მიაყენა. მთლიანად განადგურებულია ერთწლიანი ნარგავები და დახოცილია შინაური ფრინველი. განსაკუთრებით რთული მდგომარეობაა ზუგდიდის რაიონის სოფელ დიდინეძში, სადაც მდინარე ჯუმი ადიდდა და ადგილობრივი მოსახლეობის კარ-მიდამოები დატბორა.
ადგილზე ჩავიდნენ ზუგდიდის მუნიციპალიტეტის გამგებლის შემსრულებელი ედიშერ თოლორაია და მისი მოადგილეები. სოფელ დიდინეძში მობილიზებულია სამეგრელო-ზემო სვანეთის მხარის სამაშველო რაზმები, რომლებიც ამინდის გაუარესების გამო ღამით მდგომარეობის გართულებას ელოდებიან. სამაშველო რაზმები სოფელ დიდინეძში მთელი ღამის განმავლობაში დარჩებიან.
გარემოს ეროვნული სააგენტოს ინფორმაციით დასავლეთ საქართველოში ძლიერი წვიმა გაგრძელდება, რასაც შესაძლოა ელჭექი და სეტყვა დაერთოს. ქართველი სინოპტიკოსები გამოდარებას 28 ივლისიდან ვარაუდობენ, როდესაც ჰაერის ტემპერატურა პლუს 30 გრადუსამდე გათბება.
