მას მაშინ შევხვდით, როდესაც ოზურგეთის მუნიციპალიტეტის გამგებლის მოვალეობის შემსრულებლის მოადგილის, ირაკლი სირაძის კაბინეტი დატოვა. ქალბატონი ზოია და მისი შვილი აღელვებულები ჩანდნენ.
_ ვიცი, რომ ჟურნალისტი ბრძანდებით. აღარ ვიცი, რა ვქნა, ძალიან მიჭირს, _ გვითხრა ახალგაზრდა ქალბატონმა.
ზოია როყვა: _ მესაჭიროება მარცხენა ფეხის ენდოპროტეზირება. არ მოვხვდი საყოველთაო დაზღვევაში, არ მაქვს არანაირი ფინანსური შესაძლებლობები, რომ გადავიხადო ოპერაციის ფული. მივმართე ოზურგეთის მუნიციპალიტეტის გამგეობას და არანაირი დახმარება არ აღმომიჩინეს. მითხრეს, არ გვაქვს ფინანსური საშუალება, 500 ლარითაც ვერ დაგეხმარებითო. მყავს ორი შვილი, 28 წლისაა უფროსი, 20 წლის კი _ უმცროსი, არცერთი არ მუშაობს. არანაირი დახმარება არ მაქვს, არავინ ყურადღებას არ მაქცევს, ოჯახში პენსიონერი მყავს და მის კმაყოფაზე ვარ. ამ შენობაში რომ შემოხვალ, სამართალს ვერ ნახავთ. კი, ქვემოთ მიგიღებენ კარგად, გამოგიშვებენ მეორე სართულზე, მაგრამ რად გინდა, დახმარებით არავინ გეხმარება. რაც იყო სააკაშვილის მთავრობა, იმაზე უარესი მთავრობა არის მოსული. ირაკლი სირაძესთან ვიყავით და მითხრა, რაც იყო გამოყოფილი სოციალურად დაუცველებისთვის, უკვე დაილია დახმარებაო, თქვენისთანა გაჭირვებული ბევრი მოვიდა და არანაირი საშუალება არ გვაქვს დახმარებისო. ვერ ვმოძრაობ ნორმალურად. დიდი ხანია ვითხოვ დახმარებას, სადაზღვევო კომპანიებშიც გავაგზავნე წერილები, მაგრამ არანაირი პასუხი არ მიმიღია.
ირაკლი სირაძე “გურია ნიუსთან” საუბრის დროს ამბობს: _ ეს ქალბატონი ჩემთან იმყოფებოდა, მას ახლდა შვილი. ჭირდება ოპერაცია და თანხა _ 5 600 ლარი, რომ ეს ოპერაცია გაიკეთოს. კარგად მოგეხსენებათ, რომ 5 600 ლარს სამედიცინო გადარიცხვაზე ვერ გავაკეთებთ იმიტომ, რომ ამას წესი კრძალავს და ჩვენ გვაქვს დებულება, სადაც გაწერილია, ვის როგორ ვეხმარებით. გაგიგიათ, ჩვენგან სამედიცინო დახმარებისთვის 500 ლარზე მეტი გადარიცხულიყო?
_ ქალბატონი ზოია ამბობს, რომ 500 ლარითაც არ ეხმარება გამგეობა.
_ მას ვუთხარი, რომ ჩვენ გავუკეთებდით 500-ლარიან საგარანტიო წერილს, ამ წერილს მოქმედების ვადა აქვს ერთი თვის მანძილზე. ქალბატონ ზოიას ვუთხარი, დანარჩენი 5 100 ლარი გაქვთ, რომ საგარანტიო წერილი ახლა გაგიკეთო,-მეთქი? მან მითხრა, რომ არ აქვს ამის საშუალება. როდესაც მოემზადება საოპერაციოდ, ჩვენ აუცილებლად დავეხმარებით საგარანტიო წერილით, როგორც შევპირდით.
_ ეს ქალბატონი ასევე აცხადებს, რომ ბიუჯეტში უკვე ამოწურულია სოციალურად შეჭირვებული ადამიანებისთვის დახმარების თანხა.
_ მე მივეცი მას განმარტება, თანხა ამოწურული არის, მაგრამ მიუხედავად ამისა, სარეზერვო ფონდიდან გამოვუყოფთ 500 ლარს, ოღონდ დანარჩენი თანხა მან უნდა მოაგროვოს.
_ არც საყოველთაო დაზღვევით შეუძლია გაიკეთოს ოპერაცია?
_ მე დავუკავშირდი წარმომადგენელს, დავით მახარაძეს და მან მითხრა, რომ ეს ოპერაცია ამ პროგრამით არ არის გათვალისწინებული. ძალიან კარგი პაკეტია, ძალიან ბევრ რამეში დაეხმარება ადამიანს, მაგრამ ეს პაკეტი ვერ უზრუნველყოფს სამედიცინო კუთხით არსებულ ყველა მოთხოვნებს, ეს გამორიცხულია, ამხელა ბიუჯეტი არ აქვს, _ გვითხრა ირაკლი სირაძემ.
სტატიები მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
