მინდა, დიდი მადლობა გადაგიხადოთ სოფლის მეურნეობის სამინისტროსთან დაკავშირებული მემორანდუმისათვის, რომელიც ჩვენი შეხვედრის შემდეგ, ივნისში გამომიგზავნეთ.
დაკვირვებით შევისწავლე აღნიშნული დოკუმენტი და კვლავ არ ვარ დარწმუნებული, რომ ეს არის მყარი საქმე მათ წინააღმდეგ, ვინც ეჭვმიტანილად სცნეს.
თუმცა, ეს წერილი ეხება წინასწარი დაკავების გაგრძელებას იმ ხუთი პირისას, რომელთაც კვლავ აღკვეთილი აქვთ თავისუფლება.
როგორც მოგეხსენებათ, წინასწარი დაკავება მხოლოდ ისეთ გარემოებებში გამოიყენება, როცა არ არსებობს სხვა გზა, როდესაც არსებობს საფრთხე იმისა, რომ პირმა შესაძლოა თავი აარიდოს ან გაანადგუროს მტკიცებულება (აგრეთვე პოტენციურ მოწმეზე ზეწოლის შესაძლებლობა).” _ ასე იწყება თომას ჰამარბერგის წერილი, რომელიც მან გენერალური პროკურორის მოადგილეს, ლაშა ნაცვლიშვილს სოფლის მეურნეობის სამინისტროს დაკავებულ მაღალჩინოსნებსა და ე.წ “ტრაქტორების საქმეზე” დაკავებულ სხვა პირებთან დაკავშირებით მიწერა.
ჰამარბერგის თქმით, ის ვერ ხედავს ამ პირებისთვის თავისუფლების შეზღუდვის გაგრძელების მიზეზს. “თუ გაქვთ მათთან დაკავშირებული სხვა კითხვები, შეგიძლიათ, დაუსვათ მათ შემდეგ დაკითხვაზე, რაც არ მოითხოვს დაკავებას”. _ ნათქვამია წერილში, რომელსაც ხელს აწერს საქართველოში ევროკავშირის სპეციალური მრჩეველი კონსტიტუციური რეფორმებისა და ადამიანის უფლებათა საკითხებში თომას ჰამარბერგი.
ყოფილი ევროკომისარი ადამიანის უფლებათა საკითხებში, რომელიც საქართველოში პრემიერ-მინისტრის მოწვევით ჩამოვიდა, წერილში აღნიშნავს, რომ მან ეს საქმე სიღრმისეულად შეისწავლა და ამის შესახებ პრემიერ-მინისტრსაც აცნობა.
“ვაცნობე პრემიერ მინისტრს ჩემი შეშფოთება ამ საქმის თაობაზე და ჩემი აზრით, ეს 5 დაკავებული ადამიანი დაუყოვნებლივ უნდა გათავისუფლდეს.”
ჰამარბერგის განცხადებით, ის ამგვარ რეკომენდაციას საქართველოს მართლმსაჯულების სისტემის რეპუტაციის პატივისცემის ინტერესით გასცემს.
პროკურატურა ჯერჯერობით, ამ წერილთან დაკავშირებით კომენტარს არ აკეთებს. “გურია ნიუსი” დაუკავშირდა მთავარი პროკურატურის საზპგადოებასთან ურთიერთობის სამსახურს, სადაც აცხადებენ, რომ კომენტარს მოგვიანებით გააკეთებენ.
ფაქტია, რომ ორ კვირაზე მეტია, ლაშა ნაცვლიშვილი დუმს. “გურია ნიუსი” ასევე დაუკავშირდა პრემიერ-მინისტრის მრჩეველს ადამიანის უფლებებისა და დემოკრატიული რეფორმების საკითხებში, თამარ ჩუგოშვილს. მან ჩვენს სატელეფონო ზარებს არ უპასუხა. როგორც კი დავუკავშირდებით, შემოგთავაზებთ მის კომენტარსაც.
შეგახსენებთ, რომ პოლიტოლოგმა სოსო ცისკარიშვილმა “რუსთავი 2”-ის ეთერით, გადაცემა “პოსტსკრიპტუმში” სკანდალური განცხადება გაავრცელა ე. წ “ტრაქტორების საქმესთან” დაკავშირებით და პირველად სწორედ მაშინ განაცხადა ჰამარბერგის ამ რეკომენდაციის შესახებ.
“თომას ჰამერბერგმა 13 ივლისსაც გაუგზავნა პირადად ბატონ ნაცვლიშვილს წერილი იმის თაობაზე, რომ მისი წარმოდგენით სასწრაფოდ უნდა გათავისუფლდნენ პატიმრობაში მყოფი (საუბარია ე. “ტრაქტორების საქმეზე” დაკავებულ პირებზე. ავტ) ადამიანები, რადგან არ არსებობს არანაირი საფუძველი მათი დაკავებისა და რომ იგი ეთანხმება ამერიკის სახელმწიფო დეპარტამენტის ანალოგიურ დასკვნას ამ საქმის თაობაზე.
კიდევ ერთი საინტერესო დეტალი:
28 ივლისს, მოულოდნელად, კვირა დღეს, საქალაქო სასამართლოში სასამართლო პროცესი გაიმართა აღკვეთის ღონისძიების შეცვლის შესახებ, რომელიც ეხებოდა შპს “მექანიზატორის” საქმეზე დაკავებულ ორ პირს ტექნიკურ მეცნიერებათა დოქტორებს _ ოთარ ქარჩავას და ზაზა მახარობლიძეს.
საინტერესოა ის ფაქტი, რომ აღკვეთის ღონისძიების შეცვლის შუამდგომლობა ბრალდების მხარემ დააყენა. პროკურორის განცხადებით, “რადგან საგამოძიებო მოქმედებები უკვე ამოწურულია და არ არსებობს მტკიცებულებების განადგურების საშიშროება, აქედან გამომდინარე აღნიშნული პირები ხელს არ შეუშლიან გამოძიებას, რაც შეიძლება საფუძვლად დაედოს აღკვეთი ღონისძიების შეცვლას”.
ზაზა მახარობლიძის აღკვეთის ღონისძიების შეცვლის საკითხს მოსამართლე ლია ორკოდაშვილი იხილავდა. მან პროკურატურის შუამდგომლობა დააკმაყოფილა, მაგრამ ცვლილებით. მოსამართლის გადაწყვეტილებით პროკურატურის მოთხოვნილი 5 000 ლარიანი გირაოს ნაცვლად მახარობლიძეს 3500 ლარის გირაო შეეფარდა.
პროკურატურის შუამდგომლობის საფუძველზე აღმკვეთი ღონისძიება შეეცვალა ამავე საქმეში მონაწილე კიდევ ერთ პირს, ოთარ ქარჩავას. რომელიც მიწვეული სპეციალისტის რანგში ჰყავდათ დაქირავებული სოფლის მეურნეობის სამინისტროს.
პატიმრობაში კიდევ ორი პირი რჩება…
