თბილისში, სამგორის რაიონის ნორიოს დასახლება წინუბანში, სადაც დაახლოებით 400 კომლი ცხოვრობს, მოსახლეობა წლებია სასმელ წყალზე ოცნებობს. ადგილობრივების განცხადებით, წინუბნის ზემო დასახლებაში გაყვანილია სასმელი წყლის მილი და გაკეთებულია ონკანი, სადაც ბოლო 2 წელია, წყალი იშვიათად მოდის. ტანს წვიმის წყლით იბანენ, ათასში ერთხელ მოსულ წყალს კი ჭიები, ბაყაყები და ათასგვარი ქვეწარმავალი მოყვება. უხარისხო წყლის გამო, იმატა ინფექციურმა დაავადებებმა.
როდის მოგვარდება წყლის პრობლემა და როდის გვექნება ხარისხიანი წყალი, ამის გარკვევა რეგიონული განვითარებისა და ინფრასტრუქტურის მინისტრთან, დავით ნარმანიასთან ვცადეთ.
_ ბატონო დავით, ძალიან ხშირად ისმის პრეტენზიები უწყლობასა და სასმელი წყლის ხარისხთან დაკავშირებით. რამდენიმე დღის წინ ნორიოს დასახლებაში ვიყავი და ნამდვილად კატასტროფული მდგომარეობაა. წვიმის შემდეგ წყალს სიბინძურეები მოჰყვება. რაც ვნახეთ, ყველაფერია სასმელი წყლის გარდა. ამის გამო, რამდენიმე ბავშვი მოიწამლა. როგორ აპირებთ წყალთან დაკავშირებული პრობლემების მოგვარებას?
_ პირველ რიგში უნდა ითქვა, რომ წყალმომარაგების სისტემა ძალიან ბევრ მუნიციპალიტეტში ამორტიზირებულია. 2013 წლის 6 თვის განმავლობაში 12 500-მდე გამოძახება იყო და მოხდა დაზიანების შეკეთება. ეს ნიშნავს იმას, რომ ძალიან ბევრი ავარიული სიტუაცია არის. პირველი, რასაც ჩვენ ვაკეთებთ, ეს არის ქსელის რეაბილიტაცია, რაც გულისხმობს არა მიმდინარე ხანძრების ჩაქრობას, არამედ ფუნდამენტურად გაკეთებას.
25 მუნიციპალიტეტი ავიღეთ, სადაც ყველაზე მძიმე მდგომარეობაა და ევროპის საინვესტიციო ბანკის 40 მილიონი ევროს კრედიტის ფარგლებში ამ მუნიციპალიტეტებში, საქალაქო ტიპის დასახლებებში, სისტემა მთლიანად განახლება. მოეწყობა სათავე ნაგებობები, საქაჩი სადგურები, და მთლიანად ქსელის გამართვასთან დაკავშირებული სამუშაოები.
უკვე დავიწყეთ სამუშაოები აზიის განვითარების ბანკის პროგრამის ფარგლებში ქუთაისში, ფოთსა და ანაკლიაში, სადაც 60 მილიონი დაიხარჯება და ქსელის პრობლემა კეთდება ფუნდამენტურად. მანამდე, სანამ ყველგან მოგვარდება ეს პრობლემები, თვითონ წყალმომარაგების კომპანია ცდილობს ტარიფის სახით ამოღებული თანხით შეაკეთოს დაზიანებები.
ჩვენ შევიძინეთ 10 ერთეული მობილური ლაბორატორია, რომელიც ჩვეულებრივად ავტოსატრანსპორტო საშუალებაში დგას, ერთდება 12 ვოლტზე და ნებისმიერი გამოძახების შემთხვევაში შეუძლია ჩავიდეს და ადგილზე შეამოწმოს წყლის ხარისხი, თუ რა შემადგენლობას შეიცავს წყალი და ადგილზე დაუტოვონ აქტი დაინტერესებულ პირს. თუ მუნიციპალიტეტი, მოქალაქეები და ორგანიზაციები მოგვმართავენ, ნებისმიერს მოვემსახურებით უფასოდ და შევუმოწმებთ წყლის ხარისხს. თითო რეგიონს თითო მოძრავი ლაბორატორია ეყოლება, რომელსაც შეუძლია ადგილზე გააკეთოს ქიმიური შემოწმება და ადგილზე მისცეს დასკვნა. თუ ბაქტერიოლოგიური შემოწმება სჭირდება, ასეთ შემთხვევაში აიღებს სინჯებს და 12 საათის განმავლობაში შეუძლია გასცეს პასუხი.
_ 60 მილიონიან წყალმომარაგების პროექტში, როგორც ვიცით, ვერ მოხვდა ზუგდიდი., სადაც სასმელ წყალთან დაკავშირებით სერიოზული პრობლემებია. ადგილობრივ თვითმმართველობაში აცხადებენ, რომ იყო რაღაც პროექტი, რომელიც შეჩერდა. თქვენ რა ინფორმაცია გაქვთ ამასთან დაკავშირებით?
_ თვითონ პროექტირება გაკეთებულია. პრობლემები შესწავლილია და რა უნდა გაკეთდეს, ამაზე ტექნიკური დოკუმენტაცია დევს. ჩვენ აზიის განვითარების ბანკთან გვაქვს მოლაპარაკება, რომლის შემდგომი ტრანშის ფარგლებში სწორედ ზუგდიდი და რამდენიმე მუნიციპალიტეტი ჩაერთვება დამატებით და გაკეთდება წყალმომარაგების სისტემა.
_ ეს დაახლოებით როდის მოხდება?
_ ვფიქრობ, რომ 2014 წელს უნდა დაიწყოს იქ სამუშაოები.
