ეროვნული ოლიმპიური კომიტეტის ყოფილი პრეზიდენტი გია ნაცვლიშვილი, შპს “არტესის” და AVANTE HOSPITAL MANAGMENT GROUP” დამფუძნებელი ზაზა კაპანაძე მისცეს პასუხისგებაში.
გამოძიებით დადგინდა, რომ შპს “არტესმა” სახელმწიფოს მიერ დაფუძნებულ ააიპ “ძველი ქალაქის რეაბილიტაციისა და განვითარების ფონდის” დაკვეთით, ქ. თბილისში 2009 წლიდან 2012 წლის ბოლომდე საბიუჯეტო დაფინანსებით შეასრულა კალაუბნის ქუჩის, აღმაშენებლის გამზირის, მარჯანიშვილის ქუჩისა და ზაარბრიუკენის მოედნის სამშენებლო-სარესტავრაციო სამუშაოები, რა დროსაც შპს “არტესის” დამფუძნებელმა ზაზა კაპანაძემ, ამავე საწარმოს არაოფიციალურ დამფუძნებელ გია ნაცვლიშვილთან ერთად, ააიპ “ძველი ქალაქის რეაბილიტაციისა და განვითარების ფონდის” იმჟამინდელ ხელძღვანელ სერგო ქავთარაძის დახმარებით, საბიუჯეტო თანხების თაღლითურად დაუფლების მიზნით, შესასრულებელი სამუშაოების ხარჯთაღრიცხვაში შესასრულებელი სამუშაოების ღირებულება ფიქტიურად გაზარდეს, რითაც ისინი თაღლითურად დაეუფლნენ თბილისის განვითარების ფონდის კუთვნილ 4 052 108 ლარს.
გია ნაცვლიშვილმა და ზაზა კაპანაძემ დანაშაულებრივი გზით მიღებული ფულადი თანხების ლეგალიზების მიზნით, შპს “არტესი”-დან გაიტანეს დივიდენდის სახით და კანონიერი სახის მისაცემად, შეიტანეს მათ მიერვე დაფუძნებულ შპს “AVANTE HOSPITAL MANAGMENT GROUP”-ში. აღნიშნული თანხები ხსენებული საწარმოს მიერ გამოყენებული იქნა საქართველოს ეკონომიკის სამინისტროსგან და აჭარის ავტონომიური რესპუბლიკის ფინანსთა და ეკონომიკის სამინისტროსგან თბილისის N2 სამშობიარო სახლის, ბათუმის დედათა და ბავშვთა ჯანმრთელობის დაცვის რესპუბლიკური ცენტრის და ბათუმის სამშობიარო სახლის, პედიატრიის ინსტიტუტის ალერგიისა და რევმატოლოგიის ცენტრის, გ. ჟვანიას სახელობის პედიატრიული კლინიკის და მ. იაშვილის სახ. ბავშვთა ცენტრალური საავადმყოფოს შესაძენად, რითაც მოახდინეს უკანონოდ მიღებული შემოსავლის ლეგალიზება.
გამოძიება მიმდინარეობს საქართველოს სისხლის სამართლის კოდექსის 194-ე მუხლის მესამე ნაწილით და 180-ე მუხლის მესამე ნაწილით, რაც სასჯელის სახით ითვალისწინებს თავისუფლების აღკვეთას 9-დან 12 წლამდე ვადით.
აღსანიშნავია რომ “არტესი” ერთ-ერთი პირველი კომპანიაა, რომელიც შესყიდვების სააგენტომ თეთრ სიაში შეიყვანა და მას შემდეგ განსაკუთრებული შეღავათებით სარგებლობდა.
ის სახელმწიფო უწყებების მიერ გამოცხადებული კონკურესები უპირობო გამარჯვებული იყო.
კომპანიის მიერ განხორიცელებული პროექტების ნუსხა ასე გამოიყურება: ქუთაისის ცენტრალური მოედნის რეაბილიტაცია (აღსანიშნავია რომ “არტესმა” ქუთაისის ცენტრალური მოედნის რეაბილიტაციის განხორციელება ტენდერის დასრულებამდე დაიწყო, ამასთან დაკავშირებით წერდა მედიაც,); ბორჯომში 9 აპრილის ქუჩის რაბილიტაცია; ახალციხეში რაბათის ისტორიული ძეგლის რეაბილიტაცია; თბილისში მარჯანიშვილის ქუჩის რეაბილიტაცია; თბილისში კალაუბნის რეაბილიტაცია; თბილისში ზაარბრუკენის მოედნის რეაბილიტაცია; მცხეთა-მუნიციპალიტეტისა და სამხარეო ადმინისტრაციის შენობის რეაბილიტაცია.
“არტესს” ამ დროისთვის, დასრულებული აქვს 50 პროექტი. მათ შორის:
ახალციხეში “ახალციხის ციხის რეაბილიტაცია” ჟვანიას სახელობის პედიატრიული კლინიკის რეაბილიტაცია; ცენტრალური რკინიგზის საავადმყოფოს რეაბილიტაცია;
ბორჯომის ცენტრალური პარკის რეაბილიტაცია მცხეთის ისტორიული უბნების რეაბილიტაცია; აღმაშენებლის გამზირის რეაბილიტაცია; სიღნაღის რეაბილიტაცია ეწ. “ბებრების ბაღი”; ბორჯომის ბალნეოლოგიური სანატორიუმის რეაბილიტაცია.
ამას გარდა, საქართველოს მთავრობის განკარგულებების საფუძველზე, საქართველოს კულტურის, ძეგლთა დაცვისა და სპორტის სამინისტროს, საქართველოს მთავრობის სარეზერვო ფონდიდან 2009-2010 წლებში გამოეყო 3 850 000 ლარი, რაც თბილისში ქაქუცა ჩოლოყაშვილის ქუჩაზე მდებარე საცურაო კომპლექს “ოლიმპიკის” სრული სამშენებლო-სარეაბილიტაციო სამუშაოების ჩატარებაზე დაიხარჯა. სამშენებლო სამუშაოები “არტესმა” განახორციელა.
