პარტია „თავისუფალი დემოკრატების” ოზურგეთის რაიონული ორგანიზაციის თავმჯდომარისგან ბატონ დიმიტრი კვერღელიძისგან. მან “გურია ნიუსთან” განაცხადა, რომ გია ცქვიტინიძეს პარტიასთან, საპარლამენტო არჩევნების შემდეგ, არანაირი შეხება არ ჰქონია და მას ამ განცხადების გაკეთების უფლება არ ჰქონდა.
დიმიტრი კვერღელიძე: _ დღევანდელი განცხადება იმის შესახებ, რომ ბატონმა გია ცქვიტინიძემ პარტია “თავისუფალი დემოკრატები” დატოვა, ვერ მივიღებ _ გიას პარტია ერთი წელია დატოვებული აქვს. მას საპარლამენტო არჩევნების შემდეგ ჩვენს პარტიასთან არანაირი შეხება არ ჰქონია.
_ ანუ თქვენ თვლით, რომ გია ცქვიტინიძე არ იყო თქვენი პარტიის წევრი?
_ კი არ ვთვლი, არამედ ვაცხადებ, რომ არ იყო და მას უფლება არ ჰქონდა პარტიის სახელით ესაუბრა. მე ვთვლი, რომ ის იყო უბრალოდ გია ცქვიტინიძე, როგორც მოქალაქე და არა ჩვენი პარტიის წევრი.
შეგახსენებთ, რომ გია ცქვიტინიძის განცხადებით, მან “თავისუფალი დემოკრატების” რიგები მას შემდეგ დატოვა, რაც გაეცნო ირაკლი ალასანიას ინტერვიუს “ევრაზიანეტთან”, სადაც ალასანია ამბობს: “საქართველოს პირველმა პრეზიდენტმა ქვეყანას დამოუკიდებლობა მოუტანა, ედუარდ შევარდნაძე პირველი ლიდერი იყო, რომელმაც ნატო-სა და ნატო-ში საქართველოს მომავალზე დაიწყო საუბარი. მესამე პრეზიდენტმა მიხეილ სააკაშვილმა კი ძალისხმევა არ დაიშურა პროგრესის მისაღწევად და უამრავი ახალი ინიციატივა წამოიწყო საქართველოს მოდერნიზაციისა და ინტეგრაციისთვის. ჩვენ უნდა ვაღიაროთ და დავაფასოთ ეს ყველაფერი და წინა მთავრობების მიერ აგებულ მყარ ნიადაგზე წინსვლა უნდა გავაგრძელოთ”.
აღსანიშნავია, რომ გია ცქვიტინიძეს ოზურგეთის მუნიციპალიტეტის გამგებლობა რამდენიმე თვის წინ სურდა. ამის შესახებ “გურია ნიუსი” წერდა. ის აპირებდა კიდეც საკუთარი კანდიდატურის დაყენებას გამგებლის პოსტზე, თუმცა, საბოლოოდ გადაიფიქრა. იგი ამის მიზეზად “გურია ნიუსთან” აღნიშნავდა, რომ კოალიციის მხრიდან მხარდაჭერის იმედი არ ჰქონდა.
_ ბატონო გია, თქვენ აპირებდით ოზურგეთის გამგებლობის კანდიდატი ყოფილიყავით, თუმცა, გადაიფიქრეთ.
_ კი, ასეა. მე მართლაც ვაპირებდი საკუთარი თავის წარდგენას გამგებლის მოვალეობის შემსრულებლის თანამდებობაზე. ეს ნაბიჯი განპირობებული იყო იმით, რომ ჩემს ირგვლივ თავი მოიყარეს იმ ადამიანებმა, რომლებიც გარკვეულწილად უკმაყოფილო იყვნენ კოტე შარაშენიძის მოქმედებებით. მართლაც, ქვეყნის კეთილდღეობაზე ორიენტირებული ადამიანები ვიდექით ერთად და გამარჯვების შანსებიც რეალური იყო, რომ არა ერთი გარემოება _ ბატონმა ზვიად კვაჭანტირაძემ ვერ შეძლო ჩემი კანდიდატურის დაყენება, რადგან მისი თქმით, ეს იქნებოდა კოალიციის წინააღმდეგ წასვლა. სხვანაირად რომ ვთქვათ, კოალიციიდან ერთი ადამიანი უნდა ყოფილიყო წარდგენილი და ეს პიროვნება კოტე შარაშენიძე იყო. სწორია თუ არა ასეთი მიდგომა, ეს სხვა საკითხია. მე დამოუკიდებლად რომ შემეტანა განაცხადი გამგებლის მოვალეობის შემსრულებლის თანამდებობაზე, მხარდაჭერას ვერ მივიღებდი, _ განაცხადა მაშინ ცქვიტინიძემ.
