შეხვედრა ქალაქის ცენტრში “აჯანყებული გურულის” ძეგლთან შედგა. მოსვლისთანავე პრეზიდენტობის კანდიდატმა მის შესახვედრად გამოსულ ამომრჩეველს ბანქოთი უცნაური ფოკუსი ჩაუტარა, რამაც ხალხში დიდი მოწონება დაიმსახურა. ნათელაშვილმა ვალოდია წუწუნავას სახელობის მუზეუმის დირექტორის მიერ დასმულ შეკითხვას უპასუხა, რომელიც კოჰაბიტაციას შეეხებოდა.
_ ეს არის “ოცნების” და “ნაცების” პოლიტიკური ქორწინება, რის შედეგადაც იშვა სიმახინჯე მარგველაშვილის სახით, რომელსაც მე დავარქვი “შემოულაწუნე” აი, ეს არის მთელი კოჰაბიტაცია. მაგრამ ჩვენ ამას არ დავუშვებთ, გავიმარჯვებთ და ყველას პასუხს მოვთხოვთ დანაშაულზე. რაც შეეხება კოჰაბიტაციაში შესულ ახალ პოლიტიკოსებს, არაა გამორიცხული ისინიც მივუსვათ სადამსჯელო სკამზე “ნაციონალებს.” ამიტომ ჩვენ გავიმარჯვებთ და დავუბრუნებთ 100 წლის ოლღა ბებიას თავის კუთვნილ ანაბარს, _ დასძინა ნათელაშვილმა.
გურულებმა პრეზიდენტობის კანდიდატს “პრივატბანკის” სესხების შესახებ შესჩივლეს _ იქნებ, გაგვირკვიოთ, ვის ეკუთვნის ეს ბანკი და რატომ აძლევენ იმის საშუალებას, რომ ასე ყვლიფოს მოსახლეობა? _ მიმართა ერთ-ერთმა ადგილობრივმა ნათელაშვილს.
პრეზიდენტის კანდიდატი დაჰპირდა მას, რომ როგორც კი ჩავა თბილისში, მოაწყობს სპეციალურად ამ საკითხზე ბრიფინგს და შეეცდება გაარკვიოს, ვისია ეს ბანკი და ვინ დგას მის უკან.
შალვა ნათელაშვილის გაღიზიანება გამოიწვია ერთ-ერთი აცანელის მიმართვამ _ მისი თქმით, არც ერთი ხელისუფლება ხალზე არ ზრუნავდა:
_ უამრავი მთავრობა მოვიცვალეთ. რომელმა ერთმა იბრძოლა ხალხისთვის? ყველას “გალსტუკი” გეკეთათ კისერში ჩემს გარდა. მე პარტიაში არასდროს არ ვყოფილვარ. მარტო კომუნისტები იბრძოდნენ გლეხებისთვის, მაგრამ თქვენ იმათ აგინებთ. ისინი არ გაგაჩერებდნენ უმუშევარს _ არ იმუშავებდი, დაგიჭერდა, ახლა ქართველ კაცს ჩაის საკრეფად თურქეთში რა უნდა, ბიძია?!
_ ჩაის საკრეფად მე გავუშვი ეს ხალხი? თქვენ ეს გინდათ მითხრათ? _ იკითხა გაკვირვებულმა ნათელაშვილმა.
_ ყველამ გაუშვით! _ არ ჩუმდებოდა ლანჩხუთელი..
_ მე როგორ გავუშვებდი, მთელი ცხოვრება ოპოზიციაში ვარ და ყაჩაღად ვარ გადავარდნილი ლამის, _ აღელვება ვერ დამალა ნათელაშვილმა.
– ოპოზიცია მე ვარ, თქვენ კი არა, _ შეეპასუხა ოპონენტი.
_ შენ თუ ოპოზიცია ხარ, მე შენ სიგრძე ჭრილობა მაქვს, ძმაო, აგერ შენი ინტერესების დაცვისთვის. შენ ხარ ბურჯანაძის ან “ოცნების” მხარდამჭერი და დაფინანსებული ხარ.
_ ჩემი შვილი არ აცოცხლოს ღმერთმა, თუ მასე იყოს _ არც ერთი არ მინდა, _ განაწყენდა აცანელი.
_ შენ თუ არც ერთი არ გინდა, მარტო შენი თავი გინდა, ალბათ. შენ უნდა მასწავლო სამშობლოს თავდადება, არ გრცხვენია, ბიჭო?! კუჭმაჭის ჭამის მეტი არაფერი არ იცი, აი მაგიტომ არ ჩამოვედი აცანაში. მიუხედავად იმისა, რომ ჩემი ცოლის ნათესავები ხართ, ყოველთვის მღალატობდით არჩევნებში! _ გაღიზიანდა პრეზიდენტობის კანდიდატი.
არჩევნებზე საკუთარი შანსების შეფასება შალვა ნათელაშვილმა არ ისურვა და არჩევნების ბედი ხალხს მიანდო.
