ბრალდებულმა კობა ყურუამ, რომელსაც პროკურატურა მკვლელობის უშუალო შემსრულებლად მიიჩნევს, სხდომის დაწყებამდე განცხადება გააკეთა. მისი თქმით, გუშინ, საბადრაგო სამსახურის თანამშრომლებმა მას ფიზიკური და სიტყვიერი შეურაცხყოფა მიაყენეს.
გუშინდელ პროცესზე ყურუამ წარმოადგინა სასჯელაღსრულების დეპარტამენტის მიერ გაცემული ცნობა, რომლის მიხედვითაც, დღის 4 საათზე ბრალდებული გამოსაკვლევად უნდა გადაეყვანათ თვალის კლინიკაში. სასამართლომ სწორედ ამ მიზეზით გადადო საქმის განხილვა, თუმცა, როგორც ბრალდებული ირწმუნება, ის კლინიკაში არ გადაუყვანიათ: “გუშინ უნდა წავეყვანე თვალის კლინიკაში. დანარჩენი ბრალდებულები ჩასვეს სხვა მანქანაში. აღსანიშნავია, რომ ჩემს გადაყვანას ახდენდნენ ჩემთვის უცნობი ბადრაგები. ამოვიდა ციხის რეჟიმის უფროსი გია თოდუა და მითხრა ან აღიარებ, რომ 50 ათასის სანაცვლოდ კაცი მოკალი, ან არა და შენ თავს დააბრალეო. ხუთმა ბადრაგმა დამიწყო დედის გინება, ჩამარტყეს ფეხში. ახლაც მეტყობა დაზიანება. მერე დამაყენეს ოთხზე, გამომართვეს ჩემი ყავარჯენი და მითხრეს, ამას ხომ ხედავ, თუ არ დაგვიჯერებ, წახვალ საქათმეშიო.”
ბრალდებულის განცხადებაზე რეაგირება ადვოკატებმა პროკურატურას სთხოვეს. სავარაუდოდ, მომხდარის დეტალები მალე გახდება ცნობილი.
დღევანდელ სასამართლო სხდომაზე გამომძიებელი ნუგზარ ნათელაშვილი დაიკითხა. მისი განცხადებით სოსო პავლიაშვილის და მაკა პავლიაშვილი და მისი მეუღლე ვახტანგ ჩხაპელია 13 დეკემბერს ნებაყოფლობით გამოცხადდნენ დაკითხვაზე, გავრცელებული ინფორმაციით კი ისინი საქართველო-სომხეთის საზღვრის გადმოკვეთისას დააკავეს. მაკა პავლიაშვილს ჩხრეკისას რამდენიმე ათასი ევრო და დოლარი აღმოაჩნდა. მოწმის სახით დაკითხულმა ვახტანგ ჩხაპელიამ თანხის წარმომავლობასთან დაკავშირებით თქვა, რომ 10 ათასი დოლარი სოსო პავლიაშვილმა მოკლული ადუაშვილის საფლავის მოსაპირკეთებლად გამოატანა, 10 ათასი ევრო კი ნათესავებისთვის დასარიგებლად. დაზარალებულებს ამ ვერსიის არ სჯერათ, მათი თქმით, პავლიაშვილი არასოდეს გამოირჩეოდა ხელგაშლილობით. უფრო მეტიც, მისი დის ოჯახი ამ დრომდე სოციალურად დაუცველთა ბაზაშია და დახმარებას სახელმწიფოსგან იღებს.
ბრალდების მხარეს ბრალდებულების _ გელა უბილავას და ვახტანგ ჩხაპელიას საგამოძიებო ექსპერიმენტის ვიდეოჩანაწერის ნაფიცი მსაჯულებისათვის დემონსტრირება სურდა, სადაც. მათი თქმით. ორივე მათგანი აღიარებს დანაშაულს და მიუთითებს მკვლელობის დეტალებზე. დაცვის მხარემ მტკიცებულების გასაჯაროვებაზე უარი განაცხადა, შესაბამისად, ამ მტკიცებულებების გამოკვლევა არ მომხდარა.
მოწმის სახით დაკითხულმა ოდოროლოგიურმა ექსპერტმა ბესიკ ისაკაძემ განაცხადა, რომ მოკლულის ავტომანქანიდან აღებული სუნის ნიმუში დაემთხვა კობა ყურუას და ვლადიმერ ქარჩავას სუნის ნიმუშებს, რაც იმას ნიშნავს, რომ ისინი მსხვერპლის ავტომანქანაში იმყოფებოდნენ.
გამოძიების მასალებით, ავთო ადუაშვილის მკვლელობა უშუალოდ განახორციელეს წარსულში განზრახ მკვლელობისთვის ნასამართლევმა ყურუამ და ვლადიმერ ქარჩავამ. ამ უკანასკნელმა ნაფიც მსაჯულთა სასამართლოზე უარი განაცხადა და მის საქმეს სასამართლო კოლეგია ცალკე განიხილავს.
ბიზნესმენი ავთო ადუაშვილი 2012 წლის 23 ნოემბერს საკუთარ ავტომანქანაში მოკლული იპოვეს. მას ცეცხლსასროლი იარაღით მიყენებული ჰქონდა 7, ხოლო დანით 2 ჭრილობა. პროკურატურა ამტკიცებს, რომ საქმეში მკვლელობაში ბრალდებულების წინააღმდეგ არა ერთი მტკიცებულება დევს, მათ შორის სათვალთვალო ვიდეოკამერებიდან ამოღებული ჩანაწერი, სადაც ჩანს, რომ წითელი ფერის “ნისანი”, რომლითაც, სავარაუდოდ, მკვლელები გადაადგილდებოდნენ, მთელი დღის განმავლობაში უკან მისდევდა მსხვერპლის თეთრი ფერის “მერსედესს”.
ფალიაშვილის ქუჩაზე ერთ-ერთი კაფედან გამოსულ ადუაშვილს ყურუა და ქარჩავა მიუახლოვდნენ და დანით მიაყენეს ჭრილობები, რის შემდეგაც მსხვერპლი მანქანაში ჩასვეს და გზაში რამდენჯერმე ესროლეს პისტოლეტიდან. გვამი ზაზიაშვილის ქუჩაზე მოკლულის ავტომანქანაში დატოვეს, რაც ამ ქუჩის მაცხოვრებლებმა მალევე აღმოაჩინეს.
დანაშაულის კვალი რომ სოსო პავლიაშვილამდე მიდიოდა, ეს ვერსია მოკლულის მეგობრის დავით ნიჟარაძის მტკიცებით, მკვლელობის დღესვე გაჩნდა. ადუაშვილის მეგობარს, ზურაბ გაჩეჩილაძეს პროზექტურაში ყოფნის დროს უთქვამს, რომ მოკლულს მტრები არ ჰყავდა, ბიზნესურთიერთობა კი მხოლოდ ბავშობის მეგობარ სოსო პავლიაშვილთან ჰქონდა. ეჭვი გააძლიერა იმ ფაქტმაც, რომ პავლიაშვილი მეგობრის დაკრძალვაზე არ ჩავიდა, არც ტელეფონით მიუსამძიმრა ოჯახს და არც შვილი გამოუშვა თბილისში, რომელიც მოკლულის ნათლული იყო. მომღერალი მკვლელობასთან კავშირს უარყოფს და, როგორც არა ერთ ინტერვიუში აღნიშნა, მზად არის გამოძიებას ჩვენება მისცეს.
პროკურორი ნინო აღლემაშვილი ამბობს, პავლიაშვილის მიმართ პირდაპირი მტკიცებულებები არ არსებობს, თუმცა, გამორიცხული არ არის, მისი დაკითხვა საჭირო გახდეს.
“გურია ნიუსი” ცდილობს კობა ყურუას მიერ გაკეთებული განცხადება სასჯელაღსრულების სამინისტროში გადაამოწმოს. სამინისტროს კომენტარს მოგვიანებით შემოგთავაზებთ.
როგორც დაზარალებული მხარე ამბობს, გამორიცხული არ არის, ბრალდებული პროცესის გაჭიანურებას ცდილობდეს, რადგან პატიმრობის ცხრათვიანი ვადა მას ზუსტად ერთ კვირაში ეწურება. თუ ამ დრომდე მის მიმართ გამამტყუნებელი განაჩენი არ დადგა, პროკურატურას ბრალდებულის პატიმრობიდან გათავისუფლება მოუწევს.
