როგორც ჩანს, ზვიად სიჭინავა ქართულ ფეხბურთში გადატრიალებას გეგმავს _ მან ეროვნული ჩემპიონატის სტრუქტურული ცვლილებების შესახებ ჩემპიონატის დასრულებამდე 2 ტურით ადრე განაცხადა, რითაც დასკვნითი ტურების ყველანაირი ინტრიგა მოკლა.
ახალ პროექტს დიდი ვნებათა ღელვა მოჰყვა საფეხბურთო სამყაროში. ზვიად სიჭინავას ღიად დაუპირისპირდა ქვეყნის ჩემპიონის “ზესტაფონის” მეპატრონე ილია კოკაია:
ზვიად სიჭინავა: _ ბევრი საუბრობს, რომ ეს პროექტი პოლიტიკური გადაწყვეტილებაა და ფედერაციას ცხინვალის “სპარტაკის” დატოვება სურს. არავინ იცავს “სამტრედიასა” და “სპარტაკის” პოზიციას. ეს გუნდები უმაღლესი ლიგიდან ვარდებიან, მაგრამ მათ მოუწევთ გადათამაშებაში მონაწილეობა, პირველ ლიგაში მე-3 და მე-4 ადგილზე მყოფ კლუბებთან. სახელმწიფოსთან მოლაპარაკება უკვე დასრულებულია. სამი სტადიონის საფარი სახელმწიფოს დახმარებით 2011 წელს დასრულდება. 2012 წელს კიდევ ორი სტადიონის საფარი დაიგება. პლუს, კომპანია “სოკარმა” კიდევ ორი მოედანი უნდა გააკეთოს და გამოდის შვიდი. უეფას დახმარებით კეთდება “მიხეილ მესხი”, დასრულდა “ვიტ ჯორჯიას” სტადიონი. საერთო ჯამში, 17 სტადიონი გვექნება კარგი მინდვრის საფარით.
ილია კოკაია: _ მერე 2012-ში გაგეკეთებინათ ეს პროექტი, მოედნებს რომ ჩაიბარებთ. სულ ორი სტადიონია საქართველოში. დანარჩენი ყანაა ზუგდიდიდან დაწყებული, ბოლნისით დამთავრებული.
სიჭინავა: _ 2011-ში ხუთ მოედანს გავაკეთებთ. ახლა მთელი ტექნიკა, რომელიც ნაკრების ბაზაზეა, ქუთაისში წავა მოედნის გასაკეთებლად. ზუგდიდი ყანაა, დავთესავთ იქ რაღაცას და ბიზნესს გავაკეთებთ.
კოკაია: _ მოედნების კეთების დიდი გამოცდილება გვაქვს _ ორ თვეში მოედანს ვერ გააკეთებთ.
კოკაიას მხარი დაუჭირა თბილისის “დინამოს” გენერალურმა დირექტორმა ზურაბ პოლოლიკაშვილმა: _ ორი ტურით, თუნდაც ოთხი ტურით ადრე, ამის თქმა მიზანშეწონილი არაა. თუ გინდათ 16-მდე გავზარდოთ გუნდების რაოდენობა, მაგრამ შესაბამისი ინფრასტრუქტურა უნდა იყოს.
კოკაია: _ გასაბერი მოედნები არ გვაქვს? დასაბანი წყალიც ვატაროთ. პოსტფაქტუმ ჩაგვაყენეთ ასეთ მდგომარეობაში, როდესაც ჩემპიონატი დამთავრებული არ იყო. ბოლნისში გავიგეთ ეს ამბავი. “სიონს” მოტივაცია არ ჰქონდა და ისე გვეთამაშა. ბოლოს თქვეს, რას ვიკლავდით თავს, ან ფეხებს რას ვიმტვრევდით თუ მაინც ვრჩებოდითო?
სიჭინავა: _ გავაკეთოთ როგორც თქვენ გინდათ და დავარქვათ ილია კოკაიას ფედერაცია.
კოკაია: _ მე ჩემს აზრს გამოვხატავ. მაშინ მესამე კარი დააყენეთ სტადიონზე და მსაჯებს უთხარით, თამაში 10 წუთით ადრე დაამთავრონ, რამე მოიგონონ. თქვენგან ყველაფერია მოსალოდნელი. ჩემპიონატს ერთი რეგლამენტით ვიწყებთ და მეორეთი ვამთავრებთ. რეგლამენტს ცვლით, რაც დაუშვებელია.
სიჭინავა: _ არის პროექტი, გვინდა დავილაპარაკოთ და გადაწყვეტილება გამოვიტანოთ.
კოკაია: _ დაგებარებინათ კლუბები, ჯერ უმაღლესი ლიგის, მერე პირველი ლიგის და გვემსჯელა. ჩემი აზრი ხომ არ არის გადამწყვეტი? აქ 27 სუბიექტია წარმოდგენილი და იქნებ, 26 ჩემს წინააღმდეგია? მე არ მინდა ოპოზიციონერის როლში ყოფნა. ფეხბურთის ფედერაციას რომ დავუპირისპირდე, მე უნდა წავიდე ფეხბურთიდან და არა ფედერაცია. თუ კარგი გვინდა, მოედანზე უნდა ვითამაშოთ და არა ყანაში. უთხარით სახელმწიფოს, გააკეთოს მოედნები და რეგლამენტი მერე შევცვალოთ.
სიჭინავა: _ ეს სპონსორები უკვე გამოჩნდნენ…
ჩვენ დავინტერესდით, მოხვდება თუ არა “დამატებულებში” ლანჩხუთის “გურია”. როგორც გავარკვიეთ, ამ ეტაპზე კლუბი უმაღლეს ლიგაში ვერ მოხვდება, თუმცა, მომავალი წლის დასაწყისიდან, ანუ შუა სეზონიდან, შეიძლება, ქვეყნის მთავარ ლიგაში აღმოჩნდეს. ასეთივე პერსპექტივა აქვს “მერცხალსაც”.
ახალი რეგლამენტის მიხედვით, მომავალი სეზონიდან, რომელიც აგვისტოდან დაიწყება, პირველ ეტაპზე, ანუ დეკემბერში პირველ ლიგაში (სადაც ამჟამად “გურია” და “მერცხალი” იმყოფებიან) I-IV ადგილზე გასული გუნდები თებერვლიდან, უმაღლეს ლიგაში ბოლო 4 ადგილზე გასულებთან ერთად, ელიტლიგაში მოხვედრის ჯგუფში აღმოჩნდებიან ანუ გურულ კლუბებს იოლად შეუძლიათ უმაღლეს ლიგაზე იფიქრონ.
ფედერაციაში კლუბებთან შეხვედრას გურული ფეხბურთის თავკაცი კახა ებრალიძეც ესწრებოდა. ჩვენ მას ტელეფონით დავუკავშირდით: _ დიახ, რეგლამენტში ცვლილებები შედის, ახალი დებულება “გურიასთვის” მოსახერხებელია და ზოგადად, ჩემპიონატს ინტრიგას მატებს. ამიტომაც, ამ წინადადებას მხარს დავუჭერთ, _ გვითხრა მან.
მოგვიანებით ცნობილი გახდა, რომ გურიის წარმომადგენლებმა _ კახა ებრალიძემ და “მერცხალის” თავკაცმა ხარიტონ ჩხატარაშვილმა, მოლოდინისამებრ, ზვიად სიჭინავას პროექტს დაუჭირეს მხარი.
მოკლედ, ჩვენთვის საინტერესო იდეა არსებობს სიჭინავას პროექტის სახით, თითო შანსი უკვე მიიღეს კლუბებმა, ანუ იდეაც არის და ერთი შანსიც _ ახლა მთავარია ფულის, ანუ სპონსორის შოვნა.
