თავის გამოსვლაში მინისტრმა განსაკუთრებული ადგილი მართლმსაჯულების რეფორმას დაუთმო და აღნიშნა, რომ სამინისტრო დღეიდან ამ რეფორმის მეორე ტალღას იწყებს.
“არჩევნების შემდეგ მოსამართლეები პროკურატურის წნეხისგან გათავისუფლდნენ, ჩატარდა იუსტიციის საბჭოს წევრთა არჩევნები, რაც პირველი ტალღის ფარგლებში გახორციელდა. მეორე ტალღის მიზანია, რიგითი მოსამართლეების თავიანთი ხელმძღვანელობის დიქტატისგან გათავისუფლება. ის კულტურა, რომელიც გულისხმობს უზენაესი სასამართლოს და სხვა სასამართლოების თავმჯდომარეების მიერ სასამართლოების მართვას სამინისტროების სტილში, დასრულდება. ჩვენ გვინდა, რომ სასამართლოების თავმჯდომარეები იყვნენ არჩევითი. ეს იქნება ერთ-ერთი ყველაზე დიდი სიახლე, რომ მათ თავად სასამართლოების მოსამართლეები ირჩევდნენ, გვინდა ასევე, რომ უზენაესი სასამართლოს პლენუმი გაჯანსაღდეს და იქ აღარ იყვნენ სააპელაციო სასამართლოების თავმჯდომარეები, ასევე გვინდა შეიცვალოს არასასურველი მოსამართლეების სხვადასხვა რაიონებში მივლინების მავნე პრაქტიკა, ე. წ. “გაციმბირება”. ასევე გვინდა, რომ როდესაც სასამართლოში გაჩნდება ვაკანსია, პირველ რიგში, ის შესთავაზონ რეზერვის მოსამართლეებს. იმ შემთხვევაში, თუ ისინი და მოქმედი მოსამართლეები უარს იტყვიან ამ შეთავაზებაზე, მაშინ წილისყრით გამოვლინდეს ის მოსამართლე, რომელიც, მაქსიმუმ, ერთი წლით იქნება მივლინებული რომელიმე რაიონის სასამართლოში. ჩვენ ასევე გვინდა, რომ სასამართლოების თავმჯდომარეებმა ადმინისტრაციულ ფუნქციის გახორციელების პარალელურად, თავადაც დაიწყონ საქმეების განხილვა, რათა საკუთარ თავზე გამოსცადონ ის სირთულეები, რასაც რიგითი მოსამართლე აწყდება მართლმსაჯულების გახორციელებისას,” _ განაცხადა იუსტიციის მინისტრმა.
თეა წულუკიანი ყველა მოსამართლეს მართლმსაჯულების რეფორმის მეორე ტალღასთან დაკავშირებით საკუთარი მოსაზრებების და შენიშვნების წარმოდგენისკენ მოუწოდებს:
“ჩვენთვის მთავარია, რას ფიქრობენ მოსამართლეები ამ რეფორმაზე. ამიტომ, მინდა მოვუწოდო ყველას, მიუხედავად იმისა, თავიანთი ხელმძღვანელებისაგან ნებართვა ექნებათ თუ არა _ გჯეროდეთ, მოსამართლეებო, რომ რეფორმაში მონაწილეობისათვის, რომელიც თქვენ გეხებათ, ნებართვა არ გჭირდებათ. ჩვენ ღია ვართ ყველანაირი შემოთავაზებისთვის, იმიტომ, რომ რეფორმა, რომელიც მოსამართლეებს ეხებათ, პირველ რიგში, რიგით მოსამართლეებს უნდა მოსწონდეთ. მე მზად ვარ ამ და სხვა საკითხებზე შეკითხვებისთვის,” _ განაცხადა იუსტიციის მინისტრმა ყვარლის იუსტიციის სასწავლო ცენტრში, სადაც დღეს, დაახლოებით 1 საათის განმავლობაში პასუხობდა ჟურნალისტების შეკითხვებს.
