რომ წინასაარჩევნოდ მისი ხელმძღვანელობით მოხდებოდა ახალი შტატების შექმნა და ისედაც გაბერილი საშტატო ერთეულები, უფრო გამრავლდებოდა. დავით დარჩიამ ეს ინფორმაცია კატეგორიულად უარყო და ჭორი და სიცრუე უწოდა ამ ფაქტს. თუმცა, არ გასულა რამდენიმე დღე და ოზურგეთის მუნიციპალიტეტის სოფელ ჭანიეთში მართლაც დაუშვეს ახალი შტატი, სადაც ჩვენი წყაროს ინფორმაციით, დავით დარჩიამ თავისი ნათესავი დაანიშნინა. ვრცელდება ინფორმაცია, რომ ანალოგიური მოხდება სხვა სოფლებშიც. ასევე, რამდენიმე წყარო გვაწვდის ინფორმაციას, რომ ციხიდან ახალგამოსული ზოგი პირს ავალებენ, არჩევნებზე “ოცნების” სასარგებლოდ იმუშაოს.
ჩვენ ვეწვიეთ ოზურგეთის საარჩევნო შტაბის ხელმძღვანელს დავით დარჩიას და ამ თემებზე ვესაუბრეთ:
_ ბატონო დავით, გავრცელებულია ინფორმაცია, რომ საარჩევნოდ საჯარო სამსახურებში ახალ შტატებს ამატებენ. ასე აკეთებდნენ “ნაციონალებიც” წინასაარჩევნოდ. იგივეს იმეორებთ თქვენც, “ქართული ოცნებაც”? დაგისახელებთ კონკრეტულ მაგალითს _ სოფელ ჭანიეთში დაუშვეს სპეციალისტის შტატი, სადაც თქვენი ნათესავი მერაბ ბერაძე დასაქმდა. ახლახან ეს იუარეთ “გურია ნიუსთან”, ინფორმაცია კი დადასტურდა…
_ ის ჩემი ნათესავი არაა. ისე, როგორ არ ვიცნობ, მაგის მამას ვიცნობდი, მამაჩემთან მუშაობდა. ეს ადამიანი, ვიცი, ერთი თვეა, დანიშნულია. ტყუილი და ჭორია, რომ საარჩევნოდ “ქართული ოცნება” შტატებს ამატებს და ბიუჯეტიდან რაიმე სახის ზედმეტი თანხა გავა. მე გულწრფელად გეტყვით, გადავამოწმებ და დავაზუსტებ. თუ ეს დადასტურდება, მერწმუნეთ, რომ უმკაცრესად დაისჯება, ვინც ეს გააკეთა. საარჩევნოდ რომელიმე სოფელში რაიმე შტატის დამატება კატეგორიულად დაუშვებელია.
_ მაგალითად, სოფელ გურიანთაში დაამატეს რწმუნებულის თანაშემწის შტატი, რომელიც მალე შეუდგება მუშაობას. ასევეა მელექედურშიც. წყარო გვეუბნება, რომ ჭანიეთში თქვენი ნათესავისთვის დააშვებინეთ სამთვიანი შტატი. სამსახური ყველას უნდა, ბატონო დავით, და მხოლოდ თქვენი საახლობლო წრისთვის შეიძლება შტატების დაშვება?
_ მე გულწრფელად გეტყვით, რომ არაფერი ვიცი, რა ხდება სოფლებში. ჩემთვის სამწუხაროდ, მე ნათესავი არ მყავს ოზურგეთში. მე არასდროს უკან არ წავიღებ ჩემს ნათქვამს _ თუ ვინმე იტყვის, რომ დავით დარჩიას ნათესავი ვარო, ეს იქნება ტყუილი.
_ ბატონო დავით, კარგად ვიცით, არჩევნების შემდეგ როგორ ზეწოლას ახდენდნენ სოფელ ჭანიეთის რწმუნებულზე დათო მჟავანაძეზე, რომ დაეტოვებინა თანამდებობა და მის ადგილზე თქვენი ახლობელი მერაბ ბერაძე დანიშნულიყო. ამის შესახებ თქვენ იყავით საქმის კურსში, უშუალოდ თქვენ დაიბარეთ დათო მჟავანაძე და მოსთხოვეთ, განცხადება დაეწერა. თუმცა, მან ეს არ გააკეთა და ახლა ბერაძისთვის დაუშვეს შტატი.
_ მე ვერ უარვყოფ იმას, რომ მერაბ ბერაძეს ვიცნობ. მამამისი იყო ჩვენი ოჯახის ახლობელი, ძალიან კარგი ადამიანი, დადებითი პიროვნება. რა თქმა უნდა, ვიცნობ მერაბ ბერაძესაც, გვქონდა ძალიან ახლო ურთიერთობა. მერაბ ბერაძე იყო კოალიციის წევრი, ჩვენი მხარდამჭერი. აქედან გამომდინარე, გვინდოდა, რომ რაღაც სამსახური ჰქონოდა. ნეტავ, ყველა ჩემი ახლობელი იყოს სამსახურში _ რაა ამაში ცუდი?
_ ხან უარყოფთ, ხან ადასტურებთ ამ ინფორმაციას. გარდა ამისა, ჩვენმა წყარომ შეგვატყობინა, რომ საარჩევნო კამპანიაში აქტიურად გყავთ ჩართული ციხიდან ამნისტიით გამოსული ე. წ. “ქურდული ავტორიტეტები”, ხდება საქმეების გარჩევა არჩევნებთან დაკავშირებით.
_ ნამდვილად არ არის ასეთი ფაქტები, ტყუილია.
_ მაგალითად, სოფელ გურიანთაში…
_ არაა სიმართლე, აბსურდულად მეჩვენება ეს ყველაფერი. თუ ასეთი ფაქტი დადასტურდება, მე პირობას ვიძლევი, რომ “გურია ნიუსის” საშუალებით გავავრცელებ განცხადებას და დავტოვებ “ქართული ოცნების” შტაბის თავმჯდომარეობას, _ გვითხრა დარჩიამ.
ჩვენ დავუკავშირდით სოფელ ჭანიეთის რწმუნებულს დავით მჟავანაძეს. მან გვითხრა, რომ მერაბ ბერაძე სამთვიანი ხელშეკრულებით, თანაშემწედ დანიშნეს 1 სექტემბრიდან.
ვესაუბრეთ მერაბ ბერაძესაც. მან დაადასტურა, რომ 2 სექტემბრიდან შეუდგა მუშაობას და ერთი თვის წინ, როგორც ამას დავით დარჩია ამტკიცებდა.
_ ბატონო მერაბ, ვრცელდება ინფორმაცია, რომ საარჩევნოდ სოფლებში იგეგმება შტატების დამატება. თქვენზე ამბობენ, რომ დავით დარჩიას კანდიდატურა ხართ და მან დაგნიშნათ ამ თანამდებობაზე.
_ საერთოდ არ მქონია მასთან შეხება. რაიონში ყველა ერთმანეთს იცნობს. აქ ერთხელ იყო ამოსული და მაშინ ვესაუბრე.
_ აბა, რატომ დაუშვეს შტატი თქვენთვის?
_ მარტო ჩემთვის დაუშვეს?
_ სხვებზეც ამბობენ და იმათაც ვკითხავთ. ახლა თქვენ გეკითხებით.
_ ქვეყანა უმუშევარია და მითხრეს, რომ დამნიშნავდნენ ორი თვით.
_ ადრე ვრცელდებოდა ინფორმაცია, რომ თქვენ გინდოდათ გამგებლობა და მჟავანაძეზე ზეწოლას ახორციელებდით.
_ ვერავინ იტყვის, რომ მივედი მჟავანაძესთან ან დარჩიასთან და გამგებლის ადგილი მოვითხოვე. შეიძლება, კოალიციიდან მოდიოდა ასეთი რამ. მე თვითონ “თავისუფალი დემოკრატების ” წევრი ვარ, _ გვითხრა მერაბ ბერაძემ.
წყაროს ინფორმაციითვე, რომ ორშაბათიდან კიდევ იგეგმება ახალი შტატების დაშვება. “გურია ნიუსი” იმუშავებს ამ თემაზე და მკითხველს ობიექტური ინფორმაციას ოპერატიულად მივაწვდით.
