გარემოსდამცველები და აქციის მონაწილეები აცხადებენ, rom მათ საჩივარზე არც პროკურატურა რეაგირებს.
“გურია ნიუსი” გარემოს დაცვისა და ბუნებრივი რესურსების მინისტრს ხათუნა გოგალაძეს ესაუბრა იმის შესახებ, თუ რატომ პასიურობს მისი უწყება, როდესაც დედაქალაქში მწვანე ზოლს საფრთხე ემუქრება და რატომ არ სცემს პასუხს იმ ადამიანებს, რომლებსაც თავიანთი სახლების სიახლოვეს, ხეების ნაცვლად, არ უნდათ არც რესტორანი და არც რომელიმე საწარმო.
_ მე მოსახლეობას დავპირდი, მაგრამ გადატვირთული გრაფიკის გამო ვეღარ შევხვდი, უფრო სწორედ, დავპირდი დაინტერესებულ პირებს. ფართო შეხვედრას არ ვგულისხმობ. დღევანდელი მდგომარეობით საკრებულოს შეუძლია რეკრეაციული ზონების სტატუსზე იმსჯელოს, ეს მისი პრეროგატივაა. ადგილობრივ მუნიციპალიტეტებს უნდა ჰქონდეთ თავისი განსაზღვრული უფლება-მოვალეობები. მწვანე ზონების მოვლა-პატრონობა ყველგან არის მათი ფუნქცია. ამ ბოლო დროს საკრებულო აღნიშნული პრობლემის მოგვარებაში აქტიურად ჩაება.
_ თუმცა, გარემოსდამცველები და საკრებულოსთან 8 სექტემბერს გამართული აქციის მონაწილეები აცხადებდნენ, რომ საკრებულო მხოლოდ გაჩეხილი ტერიტორიების დათვალიერებით შემოიფარგლა მოსახლეობისთვის თვალის ასახვევად, და ეს შემოვლა არ არის საკმარისი. ისინი დაჟინებით მოითხოვენ პასუხს, იგივე გარემოს დაცვისა და ბუნებრივი რესურსების სამინისტროსგან თბილისში მიმდინარე ხეების ჭრაზე.
_ რადგან ასე მწვავედ წამოვიდა ეს პრობლემა, ამ საკითხს რაღაცა უნდა ეშველოს, მაგრამ რა უნდა ეშველოს?! ვიცი, რომ სამინისტროსგან ითხოვენ პასუხს.
_ გაჩნდა მოსაზრებაც, რომ მთავრობა და სამინისტრო გაურიგდა ბიზნესს, რომ კოაბიტაცია გადაიზარდა კორუფციაში.
_ მე გავურიგდი ბიზნესს? ვინ ბიზნესს გავურიგდი? (იღიმის). რეალობა არის ასეთი: ტერიტორიების დიდი ნაწილი გასხვისებულია 2009-2010 წლებში. თუ არასწორად გასხვისდა, ეს არის უკვე სხვა ორგანოების შესასწავლი საქმე.
_ როგორც აქციის მონაწილეები და გარემოსდამცველები აცხადებენ, მათ არაერთხელ მიმართეს ამის გამო პროკურატურას, ის კი არ რეაგირებს მათ განცხადებებზე.
_ მე რა ზომებიც არ უნდა მივიღო,, არანაირი კომპეტენცია და უფლებაც კი არ მაქვს ეგეთ რაღაცეებში ჩავერიო. როცა ტერიტორია ინვესტორის საკუთრება ხდება, იქ ხე რომ მოჭრან, ამაზე ნებართვებს იღებენ თბილისის მერიიდან.
_ ასათიანის ქუჩასთან დაკავშირებით დოკუმენტურად დადასტურებულია, რომ აშკარა უკანონობას აქვს ადგილი, რადგან სანიტარული ჭრის ნებართვა გაცემულია აბსოლუტურად საღ ხეებზე.
_ ასათიანის ქუჩაზე ხეების ჭრასთან დაკავშირებით ჩვენც ჩავრთეთ დამოუკიდებელი ექსპერტი. ნამდვილად დაფიქსირდა, რომ მთლად სანიტარული ჭრა არ იყო. მაგრამ დაარღვია თუ არა ინვესტორმა კანონი, ეს გასარკვევია. თუ მარტო სანიტარულ ჭრაზე ჰქონდა ლიცენზია, მაშინ დაარღვია, მაგრამ თუ რეალურად ჰქონდათ საღი ხეების ჭრის ნებართვა, მაშინ ვეღარ ვედავებით _ მისცა მერიამ უფლება და აკეთებს. ანუ, ეს არის მერიის პასუხისმგებლობის საკითხი. გარემოს დაცვის სამინისტრო უსუსურია ამ შემთხვევაში.
_ თქვენი მკაფიო პასუხი რა იქნება დედაქალაქში არსებული მწვანე ზონების პრობლემასთან დაკავშირებით?
_ ჩვენ ძალიან კარგად ვხედავთ თბილისის გამწვანებულ ზონებთან დაკავშირებულ პრობლემებს. მიგვაჩნია, რომ ტრანსპორტის ზრდის ფონზე, მწვანე ტერიტორიების როლი არის ძალიან დიდი. უნდა ხდებოდეს არამარტო მისი შენარჩუნება, არამედ ფიქრი იმაზე, როგორ გავზარდოთ ეს ტერიტორიები. ამაზე ჩვენი დამოკიდებულება არის ცალსახა.
მერიას უნდა ჰქონდეს ქალაქის განვითარების გეგმა, სადაც იქნება ასახული ინფრასტრუქტურის, მწვანე ზონების, მოსახლეობის საცხოვრებელი ადგილების, ტრანსპორტის ნაკადების შესახებ მდგომარეობა და რა არის საჭირო, რომ გაკეთდეს ამა თუ იმ ადგილზე.
_ ანუ მაინც მერიის ვალდებულებაა თბილისში გამწვანებასთან არსებული პრობლემების მოგვარება?
_ ეს მერიამ უნდა გააკეთოს. გარდა იმისა, რომ გარემოს დაცვის სამინისტრომ აიღოს ამაზე რაღაც სახის ფუნქციები, კიდევ შეიძლება, რაღაც მექანიზმი იყოს მოფიქრებული, მაგალითად, მოსახლეობის ჩართულობის კომპონენტი უნდა იყოს უზრუნველყოფილი გადაწყვეტილების მიღების პროცესში. მოსახლეობა ნამდვილად ღირსია იმისა, იცოდეს, მის უბანში რა იგეგმება და ფაქტის წინაშე არ დგებოდეს.
რაც შეეხება კანონმდებლობაში ცვლილებების შეტანას და ორმაგი დაქვემდებარების კომიტეტს, ადრეც არსებობდა ეს კომიტეტი. არასამთავრობოები რომ აჟღერებენ ამ იდეას, რაღაც საღ მომენტს ვერ ვიჭერთ. კი, ბატონო, ვიმსჯელოთ, ვთხოვე კიდეც, კონცეფციის სახით ჩამოეყალიბებინათ, რას მოგვცემს ეს, რა პლუსები აქვს. იქნებ, ერთი გვერდი მაინც იყოს დაწერილი, რომ რაღაც დოკუმენტზე ვიმუშაოთ.
_ ანუ ამ თემაზე სათანამშრომლოდ მზად ხართ?
_ რასაკვირველია. უბრალოდ, ამ ბოლო პერიოდში მაგისთვის ვეღარ მოვიცალე. ეს ბოდიშის მოხდითაც მინდა ვთქვა. თან ამ საკითხზე გააქტიურდა საკრებულოც. რომლის უშუალო ფუნქციაც არის დედაქალაქში ბაღ-პარკების პრობლემა. ეს ისეთი საკითხია, რომელიც დამატებით მსჯელობას მოითხოვს.
