და აღნიშნავენ, რომ ეს რუსეთთან ურთიერთობის ნორმალიზებისთის წინ გადადგმული ნაბიჯია.
ამ საკითხისადმი განსხვავებული დამოკიდებულება აქვს ზოგიერთ ექსპერტს, რომლებიც მიიჩნევენ, რომ რუსეთი საბაჟოებთან მიმართებაში არასანდო პარტნიორია.
ცნობისთვის _ საქართველო-რუსეთის საზღვარზე განახლებული საბაჟო-გამშვები პუნქტი “ყაზბეგი” დღეს გაიხსნა. განახლებულ საბაჟო ინფრასტრუქტურის გახსნაში მონაწილეობა მიიღეს მთავრობის წევრებმა _ მათ განახლებული საბაჟო-გამშვები პუნქტი დაათვალიერეს და პერსონალს გაესაუბრნენ.
ფინანსთა მინისტრ ნოდარ ხადურის განაცხადებით, ახალი საბაჟო-გამშვები პუნქტის გახსნა ქართული ექსპორტის განვითარებას შეუწყობს ხელს: “საქართველო არ არის სატრანზიტო ქვეყანა მხოლოდ აღმოსავლეთ-დასავლეთზე, საქართველო არის ჩრდილოეთ-სამხრეთის კორიდორი. სამწუხაროდ, დღეს ეს არის ერთადერთი, მაგრამ ძალიან სერიოზული პუნქტი იმისთვის, რომ საქართველომ საავტომობილო გადაზიდვებით სერიოზული ფუნქცია შეასრულოს”, _ განაცხადა ნოდარ ხადურმა.
მისივე თქმით, რუსეთის მხრიდან ძალიან დიდია ტვირთის რაოდენობა, მგზავრთა ნაკადი და რუსეთის საბაჟო, ჯერჯერობით, სრულად ვერ აკმაყოფილებს მოთხოვნებს, რის გამოც რიგებია. ნოდარ ხადურმა იმედი გამოთქვა, რომ რუსეთის მხარე ინფრასტრუქტურას მოაწესრიგებს.
ფინანსთა სამინისტროს ინფორმაციით, საქართველო-რუსეთის საზღვარზე განახლებული საბაჟო-გამშვები პუნქტის გახსნა თანხვედრაშია ქართული პროდუქციის რუსეთის ბაზარზე გასვლასა და ქვეყნიდან საექსპორტო საქონლის ზრდასთან.
ახალი ტერმინალის გახსნას ესწრებოდა პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე, რომლის თქმით, ახალი ტერმინალების შექმნა, ნამდვილად შეუწყობს ხელს რუსეთთან ურთიერთობების გაფართოებას: “ახალი ტერმინალების შექმნა ნამდვილად შეუწყობს ხელს რუსეთთან ურთიერთობების გაფართოებას, რაც შედეგია იმ დიალოგისა, იმ პირდაპირი ურთიერთობებისა, რომლებიც ჩვენ რუსეთთან გასული წლის ბოლოს დავიწყეთ. აღდგა სავაჭრო ურთიერთობები, აღდგა ექსპორტი რუსულ ბაზარზე. სექტემბრის ბოლოს ალბათ, ჩვენს სოფლის მეურნეობის პროდუქციასაც ექნება შესაძლებლობა, შევიდეს რუსულს ბაზარზე. ჩვენი სატრანსპორტო კომპანიები ამაში ერთვებიან. ალბათ, ვიზუალურადაც ჩანს, თუ როგორ იმატა ტურისტების რაოდენობამ რუსეთიდან, სადღაც 40%-მდეა გაზრდილი წელს მათი რაოდენობა”, _ განაცხადა ზურაბ აბაშიძემ.
ამასთან, აღსანიშნავია, რომ საქართველოს რეგიონული განვითარებისა და ინფრასტრუქტურის სამინისტრო რუსეთ-საქართველოს შორის არსებულ ნეიტრალურ ტერიტორიაზე გზის შესაკეთებლად საპროექტო სამუშაოებს იწყებს.
მთავრობის წევრებისა და პრემიერ-მინისტრის სპეციალური წარმომადგენლის რუსეთთან ურთიერთობების საკითხში, მოსაზრებას, რომ აღნიშნული საბაჟოს გახსნა ხელს შეუწყობს რუსეთ-საქართველოს შორის ურთიერთობების ნორმალიზებას, ეთანხმება პოლიტოლოგი გოგი ხუციშვილი და “გურია ნიუსთან” საუბრისას აღნიშნავს, რომ საბაჟოს გახსნა და გზის შეკეთება ორ ქვეყანას შორის მიმოსვლის აღდგენის წინაპირობაა. თუმცა, განსხვავებული მოსაზრება აქვს პოლიტოლოგ სოსო ცისკარიშვილის, რომელიც აღნიშნავს, რომ რუსეთი საბაჟოსთან მიმართებაში არასაიმედო პარტნიორია: “თუ გავიხსენებთ, რომ რუსეთი საბაჟოებთან მიმართებაში არასაიმედო პარტნიორია, რაიმე აღტაცების საფუძველს ვერ ვხედავ. იქნებ განსხვავებით ყოფილი ხელისუფლებისგან, დღევანდელმა ხელისუფლებამ მაინც მოითხოვოს, რომ რუსეთმა შეასრულოს პირობა, რომელიც საქართველოსთან მსოფლიო სავაჭრო ორგანიზაციაში მისი მიღების სანაცვლოდ დადო _ შეეტყობინებინა ქართული მხარისთვის, რა საქონელი შედის აფხაზეთის და ოსეთის ტერიტორიაზე. კრინტს არ ძრავს ამ საკითხზე არც საქართველო და არც რუსეთი. ასე რომ, საბაჟოსთან მიმართებაში რუსეთი სრულიად არასანდო პარტნიორია.
თუ მიიჩნევა, რომ ახალი საბაჟო პუნქტი სიკეთეა ქართული ექსპორტისთვის რუსეთში, ვფიქრობ, ამ შემთხვევაში ხმამაღლა უნდა გაჟღერდეს რუსეთის ინტერესი რაში მდგომარეობს. საბაჟოების არსებობა თავისთავად არ ნიშნავს წინსვლას ეკონომიკურ ურთიერთობებში, თუ ის არ წარმოადგენს ორივე მხარის ინტერესს და თუ ეს თავისუფალი არაა რაიმე პოლიტიკური დატვირთვისგან,” _ უთხრა “გურია ნიუსს” ცისკარიშვილმა.
