გზის მშენებლობა დღეს საქართველოს რეგიონული განვითარებისა და ინფრასტრუქტურის მინისტრმა, დავით ნარმანიამ და საავტომობილო გზების დეპარტამენტის თავმჯდომარის მოადგილემ, გიორგი ამაშუკელმა დაათვალიერეს.
“ეს ერთ-ერთი პრიორიტეტული გზაა ჩვენთვის, რადგან კონფლიქტისპირა ტერიტორიას წარმოადგენს,“ – განაცხადა დავით ნარმანიამ, – “აქ არის ისტორიული სოფლები, რომლის მოსახლეობას, უგზოობის გამო, წლების განმავლობაში უჭირდა გადაადგილება და საკუთარი სასოფლო-სამეურნეო პროდუქციის ბაზარზე გატანა. ახლა ეს პრობლემა მოიხსება. მნიშვნელოვანია ისიც, რომ, გზის გარდა, აქ დამაკავშირებელი კომუნიკაციებიც კეთდება, კეთდება სკოლასთან მისასვლელი გზაც. დამატებით, უნდა გაკეთდეს, ასევე, საბავშვო ბაღთან და სოფლის ამბულატორიასთან მისასვლელი გზა, რაც ადგილობრივი მოსახლეობის მოთხოვნაა. ჩვენ ვიხილავთ მათ მიერ დამატებით წარმოდგენილ საჭიროებებს. ვფიქრობ, ეს საკითხიც, ასევე, დროულად გადაიჭრება.“
იგოეთი-ლამისყანა-ახმაჯის გზის მშენებლობა 2013 წლის ივნისში დაიწყო. როგორც გიორგი ამაშუკელმა აღნიშნა, – “გარდა იმისა, რომ აქ დაიგება ახალი ასფალტ-ბეტონის საფარი, მოეწყობა მოსახლეობის ეზოებთან მისასვლელებიც, საზოგადოებრივი ტრანსპორტის მოსაცდელები, დაიდგმება ახალი საგზაო ნიშნები. ტურისტული მნიშვნელობიდან გამომდინარე, კეთდება ორბელიანების სასახლესთან მისასვლელი გზაც.”
იგოეთი-ლამისყანა-ახმაჯის 9-კილომეტრიანი გზის მშენებლობა მსოფლიო ბანკის მხარდაჭერით ხორციელდება.
