_ ასე პასუხობს საპარლამენტო უმრავლესობის დეპუტატი ოთარ ჩრდილელი მისი თანაგუნდელი ირინე იმერლიშვილისადმი პრეზიდენტის მიერ გაკეთებულ განცხადებას.
“გაიწმინდე ენა, რადგან ანაერობული ბაქტერიები უკანა ნაწილში გროვდებიან;
სასურველია, იხმარო კბილის პასტა, რომელიც შეიცავს ქლორის ორჟანგას ან ცეტილპირიდონის ქლორიდს, მაშინ ენის გაწმენდისას, მოშორების გარდა, არშემდგარო პრეზიდენტო, შეგიძლია, გაანადგურო ანაერობული ბაქტერიები;
გამოივლე პირში წყალი,” _ წერს ჩრდილელი სოციალური ქსელში და დასძენს, რომ პრეზიდენტს მოუწევს პასუხი გასცეს იმერლიშვილის მიერ დასმულ კითხვებზე.
კერძოდ, ჩრდილელი პრეზიდენტის დაცვის სპეციალური სამსახურის ანგარიშიდან დახარჯულ თანხებზე საუბრობს, რომელთან გრიფი “საიდუმლო” ედო. აღნიშნული ინფორმაცია იმერლიშვილმა მიმდინარე წლის აპრილში, “ნაციონალური მოძრაობის” 19 აპრილის აქციამდე 2 დღით ადრე გაასაჯაროვა.
თუმცა, ვინაიდან, ის დღეები მოვლენებით ძალიან დატვირთული იყო, ამ და სხვა ბევრ ფაქტსაც, საკადრისი საზოგადოებრივი ყურადღება ვერ დაეთმო.
გრიფით “საიდუმლო” ხარჯები
“პრეზიდენტმა რუსი ჟურნალისტი ქსენია სოკოლოვა 2010 წელს სახელმწიფო დაცვის სპეციალური სამსახურის თანხებით “ზარაფხანაში” შეძენილი 2 765 ლარიანი ოქროს ყელსაბამით და 69-ლარიანი პატარა ლომით დაასაჩუქრა. დოკუმენტაციაში აგრეთვე აღნიშნულია, რომ ქსენია სოკოლოვას სასტუმრო რედისონში ცხოვრების ხარჯი _ 9 598 ლარი, სახელმწიფო დაცვის სპეციალური სამსახურის ანგარიშიდან ანაზღაურდა.
სახელმწიფო დაცვის სამსახურის ანგარიშებიდან ასევე ირკვევა, რომ პრეზიდენტმა უკრაინელი მომღერალი იოანა მელაი 2011 წელს “დაფიონ სამკაულში” 440-ლარიანი ძეწკვით და 542-ლარიანი კულონით დაასაჩუქრა.
გამოქვეყნებული დოკუმენტაციის თანახმად, სახელმწიფო დაცვის სპეციალურმა სამსახურმა დეპუტატ თინა ბოკუჩავას 1 599-ლარიანი Iphone 4S, ხოლო მომღერალ თინა ბუნიათაშვილის 140-ლარიანი ყვავილების თაიგული უყიდა.
ასევე, პრეზიდენტის დავალებით, სახელმწიფო დაცვის სამსახურმა, 2011 წელს, გალერეა -“შარდენში” შეიძინა 3 500 ლარიანი ტიხრული მინანქრის ოქროს სამაჯური. ანგარიშის დოკუმენტში მითითებულია ნივთის დანიშნულებაც _ “პრეზიდენტის სტუმრის მარიამ საჯაიას დასასაჩუქრებლად”.
როგორც დოკუმენტაციიდან ირკვევა, სახელმწიფო დაცვის სპეციალური სამსახურის ანგარიშიდან თანხები არა მხოლოდ ქალბატონების დასასაჩუქრებლად, არამედ პრეზიდენტის, თანამდებობის პირებისა და მისი სტუმრების დასვენებისა და გართობისთვისაც იხარჯებოდა.
2012 წლის ზაფხულში პრეზიდენტის და მისი სტუმრების ბათუმში კვებითი მომსახურება 39 206 ლარი და 50 თეთრი დაჯდა.
აგრეთვე, ირკვევა, რომ პრეზიდენტმა და თბილისის მერმა ავსტრიულ კურორტზე გასახდომ პროცედურებში 115 ათასი ლარი დახარჯეს.
სახელმწიფო დაცვის სპეციალური სამსახურის ბიუჯეტის ხარჯების ამსახველ მასალებში აღნიშნულია პრეზიდენტის ესპანეთიდან ჩამოყვანილი პირადი მზარეულის ცხოვრების ხარჯებიც. როგორც ირინა იმერლიშვილმა განმარტა, მზარეულის მომსახურება სახელმწიფოს დაახლოებით წელიწადში ნახევარი მილიონი უჯდება, რადგან მისი ანაზღაურება თვეში 25 ათასი ლარია.
სახელმწიფოს დაცვის სპეციალური სამსახურის ბიუჯეტის ხარჯების ამსახველ მასალებში 2011 წლის 6 აპრილს იუშჩენკოს აბანოს მომსახურების ხარჯიცაა მითითებული. გამოქვეყნებულ სალაროს შემოსავლის ორდერის მიხედვით, იუშჩენკოს (სალაროს ორდერში სახელი და თანამდებობა მითითებული არ არის) აბანოს მომსახურებაში სულ 591 ლარია დახარჯული.
სახელმწიფო დაცვის სპეციალური სამსახურის ანგარიშიდან ასევე ირკვევა, რომ 2011 წლის 22 ნოემბერს 44 სული ცხვრის შეძენა სამსახურ 6 600 ლარი დაუჯდა. ცხვრები 23 ნოემბერს გურჯაანში, აწყურში, ქედაში, ართანასა და ლალისყურაში სხვადასხვა პირებს გადაეცათ.
ასევე, დიდი გამოხმაურება მოჰყვა დოკუმენტს, საიდანაც ირკვევა, რომ პრეზიდენტის შვილის ედუარდ სააკაშვილის განათლების ხარჯები სახელმწიფო დაცვის სპეციალური სამსახურის ანგარიშიდან იხარჯებოდა. დოკუმენტის თანახმად, 2010-2011 სასწავლო წელს, გივი ზალდასტანიშვილის სახელობის ამერიკულ აკადემიას ედუარდ სააკაშვილის სწავლის გადასახადის სახით 14 ათასი ლარი ჩაერიცხა.
და ამ ყველაფერს ედო “გრიფით საიდუმლო”. ყველაფერი ყველაფერი და ეს ცხვრები რაღად უნდოდა სახელმწიფო დაცვის სპეციალური სამსახურის? ა, რას იტყვი მიხეილ?” _ ამბობს ოთარ ჩრდილელი.
შეგახსენებთ, რომ გუშინ, ახალციხეში ვანო მერაბიშვილის მშობლების მონახულების შემდეგ მიხეილ სააკაშვილმა ირინე იმერლიშვილს “ჩვეულებრივი ქურდბაცაცა” უწოდა.
“გუშინ, ტელევიზორში აჩვენეს ახლა პარლამენტში მათი მთავარი, რომელიც დარბის და ხმებს აგროვებს, ხმებს ყიდულობს ჩვენგან. აჩვენეს ერთი პარლამენტარი, რომელიც ჩვეულებრივი ქურდბაცაცა, დიდი მომპარავია. ეს ის ქალია, იუშჩენკოს რომ უთვლიდა საპნის ფულს.
მე ვნახე მერაბიშვილი, რომელსაც მილიარდების მოპარვას აბრალებენ და ოჯახი როგორც ცხოვრობს. გუშინ მთელმა საქართველომ ნახა მათი შემადგენლობა, როგორ ცხოვრობს და ეს ხალხი უკითხავს ლექციებს ვიღაცებს. მე მგონი, ყველაფერი თავდაყირა დადგა,” _ განაცხადა გუშინ სააკაშვილმა.
პრეზიდენტს თავის გამოსვლაში დეპუტატი ქალის სახელი და გვარი არ დაუსახელებია, მაგრამ როგორც ცნობილია, კვირას, “პოსტ სკრიპტუმში” დეპუტატ ირინე იმერლიშვილის ქონებრივი მდგომარეობის შესახებ სიუჟეტი გავიდა.
