“სამინისტროს ინფორმაციით, კილაძის მიერ გამოქვეყნებული ფოტოებიდან არც ერთი არ არის გადაღებული ციხის რესპუბლიკურ საავადმყოფოში. ორი ფოტოსურათი, სადაც ნაჩვენებია პატიმრის მოკვეთილი ხელი, გადაღებულია ღუდუშაურის სახელობის კლინიკაში 2012 წლის ივლისში. ხელი ეკუთვნის პაციენტ ნოდარ რ.-ს, რომელიც არასოდეს ყოფილა პატიმარი.
რაც შეეხება დანარჩენ ფოტოებს, სადაც ასახულია პატიმართა რენტგენის სურათები, საიდანაც ირკვევა, რა გზით შეაქვთ პირებს აკრძალული საგნები ციხეში, ეს ფოტოები სასჯელაღსრულების სამინისტრომ საზოგადოებას უკვე წარუდგინა.
ამ ფაქტიდან დასტურდება სამინისტროს ინფორმაცია, რომ ნამდვილად არიან ძალები, რომლებიც ცდილობენ სისტემის დისკრედიტაციას და როგორც ჩანს, სწორედ მათ მიაწოდეს ქალბატონ ელისო კილაძეს მცდარი ინფორმაცია. ინფორმაციისთვის დამაჯერებლობის ელფერის მისაცემად კი თან დაურთეს ის ფოტოები, რომლებიც გუშინ თავად გაავრცელა სამინისტრომ.” – ნათქვამია სამინისტროს განცხადებაში.
ჟურნალისტ ელისო კილაძის მიერ გავრცელებულ ერთ-ერთ სურათზე ჩანს ექიმის ხელი. “გურია ნიუსის“ ინფორმაციით ექიმი, რომელმაც კონკრეტულ პაციენტს ჩაუტარა ოპერაცია არის შპს “ოთარ ღუდუშაურის სახელობის ეროვნული სამედიცინო ცენტრის ანგიოქირურგი და მიკროქირურგი ჯემალ ჯიქიძე. სწორედ მისი ხელი ჩანს სურათზე. “გურია ნიუსმა” მასთან ექსკლუზიურად ჩაწერა კომენტარი.
_ბატონო ჯემალ, როგორც “გურია ნიუსისთვის” გახდა ცნობილი, თქვენ ჩაატარეთ ოპერაცია, რომლის დროსაც გადაღებული ფოტო, დღეს ჟურნალისტმა ელისო კილაძემ მედიით გაავრცელა. ამბობენ რომ პაციენტი პატიმარი იყო…
_ ყველაზე უკეთესი იცით რა იქნება? ადმინისტრაციაში მიხვიდეთ მთავარ ექიმთან. ისტორია ამოიღოთ და ზუსტ ინფორმაციას მიიღებთ.
ერთი წლის ამბავზე მე რა უნდა გითხრა შვილო. ოპერაცია მარტო მე კი არ გამიკეთებია. სამი კაცი თუ ოთხი კაცი ვიყავით. პატარა ბავშვი რომ იყო, მახსოვს. ალბათ 17 ან 18 წლის. ხარაგაულის რაიონიდან, სახლში მოუვიდა, მამამისთან ერთად შემოიყვანეს. ხელი ჰქონდა მოკვეთილი. აღსდგა ის ხელი, მაგრამ დანარჩენზე ის პატარა ბავშვი უნდა ნახოთ. უნდა დაელაპარაკოთ. ფაქტია პატიმარი არ ყოფილა. პატიმარს ასე როგორ მოიყვანდნენ.
ელისო კილაძე ვინ არის, საერთოდ არ ვიცი. ძალიან მაინტერესებს, რა უფლებით გამოაქვეყნა და ვინ მისცა ეს სურათები. პირადად მე, არ მაქვს ეს სურათები. მეორე სურათზე ხელი რომ არის, ის ჩემი ხელია, მე მიჭირავს ხელი. ვინ მისცა ეს სურათები, რა მიზეზით და რა მიზანით. ეს საშინელებაა. ასე არ შეიძლება.” – განაცხადა “გურია ნიუსთან” ჯიქიძემ.
