შეფერხებული სასწავლო პროცესის მიზეზად აუცილებელი სარემონტო სამუშაოები სახელდება

ამის მიზეზად დაუსრულებელი სარემონტო სამუშაოები სახელდება.

_ გვპირდებიან, რომ 25 სექტემბრისთვის უნდა დაიწყოს სწავლა, მაგრამ რანაირად მოხერხდება, არ ვიცით, _ გვითხრეს ლიხაურის საჯარო სკოლის პედაგოგებმა.

მათი თქმით, საკლასო ოთახებში წიგნებს შორის მორიელები ნახეს. ამბობენ, რომ დიდი სამუშაოები არის ჩასატარებელი და იმედს იტოვებენ, ეს ყველაფერი 25 სექტემბერს დასრულდება.

_ დღევანდელი მონაცემით, ლიხაურის საჯარო სკოლაში 219 მოსწავლეა, რომლებიც ელოდებიან სასწავლო პროცესის დაწყებას. მასალის უქონლობის გამო, სარემონტო სამუშაოები შეჩერებული იყო. აქ სამი დღე საერთოდ არ მუშაობდა არავინ. ტენდერში გამარჯვებული ფირმის უფროსი არ პასუხობს ტელეფონზე და ასე გვითხრეს, რომ ის გაქცეულია. ეს ყველაფერი ჩემთვის გაუგებარია. თემურ მაჩაიძის ტელეფონის ნომერი დაგვიტოვეს, რომელსაც პრობლემების შემთხვევაში უნდა დავკავშირებოდით. დავურეკეთ და გვითხრა, რომ ფირმის დირექტორს ვერ უკავშირდებოდნენ, ზუსტად არ მახსოვს, დღეს რამდენ ადამიანს დავურეკე, რომ რამე გამერკვია. საკუთარი უმწეობით დაღლილმა და გამწარებულმა მხოლოდ ის გავიგე, რომ ამ მშენებლობაზე პასუხისმგებელი ტენდერში გამარჯვებული პროექტის ავტორი “გაქცეულია” (ნაცნობი სიტყვაა!), სამინისტრო “შეშფოთებულია” და ცდილობენ ჩვენი პრობლემის მოგვარებას.

ჰო, მართლა, სახურავიც გამოსაცვლელია! თუმცა ჯერ სახურავს არც შეხებიან!

სამაგიეროდ, ძველ სახურავს (შიფერს) “პატრონი” უკვე გამოუჩნდა, როგორც ამიხსნეს, შიფერი ადამიანის ჯანმრთელობისათვის საშიში ყოფილა და ის იმ 42 ტონა ნაგავში ითვლება, რომელიც სკოლიდან უნდა გაზიდონ, თუმცა, ეს ჯანმრთელობისათვის საშიში მასალა ისე აკურატულად აწყვია ცალკე, ეჭვი მეპარება, რომ გადასაყრელად იყოს გამზადებული. ალბათ, ვინმე ხელს მოითბობს სკოლის ქონებაზე!

ვეკითხები ყველას _ განათლების სამინისტროს, ოზურგეთის მთავრობას, ოზურგეთის დეპუტატს _ რით დაიმსახურა ექვთიმე ღვთისკაცის მშობლიურმა სოფელმა, რომ არავინ ინტერესდება ჩვენი ამბით? _ გვითხრა ლიხაურის საჯარო სკოლის პედაგოგმა, დოდო დონაძემ.

_ ქალბატონო დოდო, მშენებლობა როდის დაიწყო?

_ 22 აგვისტოს.

_ მთლიანად სკოლის შენობის რემონტია დაგეგმილი?

_ არა, სახურავი უნდა გამოიცვალოს და როგორც მე მითხრეს, ახალი ფანჯრების ჩასმა იგეგმება. ძველი სახურავის მოხსნა სისტემატურად არ არის დაწყებული და ასევე ფანჯრები არ არის ჩასმული.

ლიხაურის საჯარო სკოლის დირექტორის მოვალეობის შემსრულებლის, ჩიტო ქილიფთარის თქმით, ყველანაირად იბრძვიან, რომ საქმე დროულად გაკეთდეს: _ ოზურგეთის საგანმანათლებლო რესურცენტრის წარმომადგენლებს ყოველდღე ვუკავშირდები და ისინიც გვიკავშირდებიან. აქ არის მასალის პრობლემა. დავინტერესდი, ასევე, რემონტის დაწყების თარიღით და ასე მითხრეს, რომ ფირმამ როდესაც გაიმარჯვა ტენდერში, მაშინ წამოვედით სამუშაოდო.

_ ქალბატონო ჩიტო, რომელმა ფირმამ გაიმარჯვა ტენდერში?

_ არ ვიცი, ერთი ის ვიცი, რომ 14-ში უნდა დაესრულებინათ სამუშაოები, მაგრამ ჯერჯერობით, ეს ასე არ მოხდა. ისე, მუშები კარგად მუშაობენ.

ოზურგეთის საგანმანათლებლო რესურსცენტრის ხელმძღვანელი, ირინა ინარიძე ამბობს, რომ ამ პროექტით ლიხაურის საჯარო სკოლაში, როგორც იქნა, მოგვარდება სახურავის პრობლემა: _ განათლების და მეცნიერების სამინისტროს ერთ-ერთი დეპარტამენტის ხელმძღვანელი, ორი დღეა, რაც წავიდა ოზურგეთიდან. ის საქმის კურსშია და ჩვენც ვფლობთ ინფორმაციას ლიხაურის საჯარო სკოლის შესახებ. მშენებელი ფირმის ინფორმაციით, 25 სექტემბერს უნდა მოხდეს სარემონტო სამუშაოების დასრულება.

_ ქალბატონო ირინა, რამდენ სკოლაში მიმდინარეობდა სარემონტო სამუშაოები?

_ 12 სკოლაში. აქედან 5 საჯარო სკოლაში გადახურვითი სამუშაოები მიმდინარეობდა _ დვაბზუ, ნასაკირალი, გურიანთა, ზემო ნატანები, გომი და ნაგომარი.

_ რატომ მოხდა ლიხაურში სასწავლო პროცესის შეჩერება?

_ შემოწმების დროს დადგინდა, რომ ვერ მოესწრებოდა შენობის გადახურვა და მივმართეთ მინისტრს, სასწავლო პროცესი 10 დღით გადადებულიყო. ჩვენ ვიდექით არჩევნის წინაშე _ ან არ უნდა გადახურულიყო შენობა, დაგვეწყო სასწავლო პროცესი და მთელი ზამთრის პერიოდში გვექნებოდა იმის შიში, რომ რომელიმე საკლასო ოთახში არ შესულიყო წყალი ან გადაგვედო სწავლა და გადაგვეხურა შენობა. არჩევანი გავაკეთეთ სკოლის სასარგებლოდ. მე მგონი, კარგი გადაწყვეტილება იყო _ ათი დღით გვიან დავიწყებდით სასწავლო პროცესს თუ ათი დღით გვიან, ეს ნამდვილად არ უშლის სასწავლო პროცესს ხელს.

_ რომელი ფირმა ახორციელებს სამუშაოებს?

_ სამშენებლო ფირმა “იბერია ჯი”. მთავრდება ფანჯრების ჩასმა, ხომ ასეა?

_ ჩვენ რაც ვნახეთ, ნამდვილად არ ჰგავდა დასასრულს. სარემონტო სამუშაოები როდის უნდა დაწყებულიყო?

_ აგვისტოში გამოცხადდა ტენდერი, პირველი ტენდერი ჩაიშალა და შემდეგ “იბერია.ჯი”-მ გაიმარჯვა, რომელიც 22 აგვისტოს უკვე აქ იყო.

_ “იბერია.ჯის” რამდენიმე სკოლა ჰქონდა აღებული ოზურგეთში?

_ გომის, კონჭკათის, ლიხაურის, ნაგომრის, ნარუჯის, შემოქმედის. აქედან შემოქმედში მცირე ნაწილი სამუშაოა დასასრულებელი.

_ დანარჩენ სკოლებში სასწავლო პროცესი ყველგან მიმდინარეობს?

_ გარდა ლიხაურისა, პროცესი ყველგან განახლებულია.