რამდენიმე ოჯახი დეფაქტო რესპუბლიკის წარმომადგენლებმა კიდევ ერთხელ გააფრთხილეს, რომ ეგრეთ წოდებული საზღვრის გადმოწევას მალე დაიწყებენ, კიდევ 50 მეტრით გადმოწეული საოკუპაციო მავთულხლართების მიღმა კი სამი დამწვარი სახლი აღმოჩნდება. ამ სახლების მფლობელები ნათესავებთან ცხოვრობდნენ, მაგრამ დამწვარ სახლებში პირველ სართულზე სათავსოები ჰქონდათ მოწყობილი და საკარმიდამო ნაკვეთებს უვლიდნენ.
ერთ-ერთი მათგანი, გივი მახაჭაშვილი აცხადებს, რომ , რომ მას 150 ლარიანი სოციალური დახმარებაც მოუხსნეს, ახლა კი აგვისტოს ომის დროს დამწვარ სახლს ართმევენ.
რა ბედი ელის სოციალურად დაუცველ დვანელებს და დაეხმარება თუ არა მათ სახელმწიფო, ამასთან დაკავშირებით “გურია ნიუსმა” კომენტარი სოციალური მომსახურების სააგენტოს ხელმძღვანელს ნოე ქინქლაძეს სთხოვა.
“საოკუპაციო ხაზის გადმოწევისა და მავთულხლართების გაბმის გამო, დვანში მცხოვრები ჩვენი მოქალაქეების სახლ-კარი და მიწის ნაკვეთი დარჩა იმ ტერიტორიაზე, რომელსაც საქართველოს ხელისუფლება დროებით ვერ აკონტროლებს. ბუნებრივია, ამ ოჯახების სოციალ-ეკონომიკური მდგომარეობა არსებითად შეიცვალა. ჩვენ გადავწყვიტეთ, რომ მივიღოთ ამ ოჯახებისგან განცხადებები და ვისაც არსებითად შეეცვალა სოციალ-ეკონომიკური მდგომარეობა, ისინი მოხვდებიან სოციალურად დაუცველთა ბაზაში და მიიღებენ დახმარებას.
_ ანუ, ეს ადამიანები განსაკუთრებული მდგომარეობის გამო პრიორიტეტულები იქნებიან ?
_ დიახ, რა თქმა უნდა. ეს ყველაფერი გათვალისწინებული იქნება სოციალური დახმარების დროს. აქვე მინდა გითხრათ, რომ განცხადებები დვანში მცხოვრებ იმ ადამიანებსაც შეუძლიათ შემოიტანონ, რომლებიც აქამდე არ იღებდნენ დახმარებას.
