რამდენიმე დღის წინ სოფელ მელექედურში ახალი სპეციალისტისთვის ახალი შტატი დაუშვეს. ეს ინფორმაცია მელექედურის რწმუნებულმა გაგა ცხომელიძემ მოგვაწოდა, რომლის თქმითაც, მისთვის სრულიად გაუგებარია, რატომ გახდა აუცილებელი ახალი შტატის დაშვება.
აღნიშნული ინფორმაცია ფაქტებით და დოკუმენტურად მტკიცდება. მასალები იმის შესახებ, თუ რამდენი ახალი შტატია დაშვებული ბოლო თვეების განმავლობაში მუნიციპალიტეტში და ხელშეკრულებით რამდენია აყვანილი, “გურია ნიუსს” მრავლად აქვს.
თუმცა, G-News TV-ს ყოველკვირეულ გადაცემაში “დასვით შეკითხვა”, ოზურგეთის გამგებელი კოტე შარაშენიძე ახალი შტატების დაშვების შესახებ ინფორმაციას კატეგორიულად უარყოფს და აცხადებს, რომ “ორი სოფლის გარდა, შტატი არსად დაუშვია”.
ამონარიდი გადაცემიდან:
_ ჩვენს გვერდზე შემოვიდა შეკითხვა, რომელიც ეხება გაზრდილ შტატებს. ამბობენ, რომ ნაციონალური მეთოდებით მუშაობთ, ისევე ინიშნებიან ადამიანები აიპიებში და სოფლებში, როგორც ეს ხდებოდა “ნაციონალური მოძრაობის დროს”. ამაზე “გურია ნიუსსაც” ჰქონდა მასალა.
_ ეს იყო არასრული და არაარგუმენტირებული მასალა, ეს იყო უბრალოდ ჩამონათვალი. იქ იყო უზარმაზარი შეცდომები. ვინც იქ დამხვდა, მათზე ეწერა თითქოს, ისინი მე ავიყვანე ხელშეკრულებით. ვერავინ ვერ მეტყვის, რომ ჩემი მოსვლის შემდეგ რომელიმე აიპის ერთი ადამიანი მაინც დაემატა. თუ არ ჩავთვლით ოზურგეთის “სერვისცენტრს”, სადაც ექვსი ადამიანი მივიღეთ, პროფესიონალები. ჩემს მიერ რეკომენდირებული ყველა ადამიანი აკეთებს საქმეს და არიან პროფესიონალები.
მე არავინ არ ამყავს სამსახურში, თავიანთ ხელმძღვანელებს აჰყავთ. ამასთან დაკავშირებით შენიშვნები მაქვს. მოხდა კიდევაც იქ ცვლილებები, მაგრამ ყველაფერს თავისი დრო აქვს. ტესტირებას, საკვალიფიკაციო გამოცდებს და ა.შ ვგულისხმობ. ჩემს მიერ ხელშეკრულებით აყვანილი ადამიანები ინფრასტუქტურის სამსახურში იყვნენ. კეთდება ბაღდადის, მელექედურის, სოფელ თხინვალისა და ლიხაურიაჭის მონასტრამდე მისასვლელი გზები. ამას სჭირდება შესაბამისი ხალხი და შეგიძლიათ, დაინტერესდეთ მათი პროფესიონალიზმით. იქ გვყავს ისეთი ადამიანები, რომლებიც ჩახედული არიან ამ საკითხში. ჩვენ არ მივდივართ არავისთან და არ ვეკითხებით, ვინ ვის აძლევს ხმას. ჩვენ ჩვენი გაკეთებული საქმით შეგვაფასოს საზოგადოებამ.
_ არაფერი არ თქვით სოფლის რწმუნებულების თანაშემწეებზე, საკმაოდ ბევრნი არიან?
_არსად არ დამატებულა. ერთი დაემატა სოფელ ჭანიეთში და ერთი სოფელ შემოქმედში.
_ რატომ?
_ აგიხსნით ყველაფერს. ეს იყო საკმაოდ ყბადაღებული თემა. აიპი გომის მთის განვითარების ცენტრი, რომელსაც ჰქონდა წლიური 62 ათასი ლარი, ზუსტად არ ვიცი, აღარ მახსოვს. ამ გომის მთის აიპის გაუქმებას, გახსოვთ რა ამბავი მოჰყვა. ჩვენ მივედით და ვუთხარით იმათ, რომ სეზონურად დაგნიშნავთ და შემოქმედის ცენტრში თემის სპეციალისტები იქნებით, სადაცგომის მთაზე განსახორციელებელ პროექტებს ორგანიზებას გაუწევთ-მეთქი. იანვარ_თებერვალსა და მარტში რას აკეთებს ეს აიპი. ასე რომ, ჩვენ სეზონურად ავიყვანეთ ეს ხალხი. ჩვენ არავის გულის მოსაგებად არ ვაკეთებთ ამას”.
სწორედ ამ საუბრის შემდეგ დაუშვა კოტე შარაშენიძემ კიდევ ერთი ახალი შტატი.
“შტატის დამატება ეს არის სტრუქტურული ცვლილება, რომელიც საჯარო ადმინისტრაციულ წარმოებას მოითხოვს და შემდგომ საკრებულოს თანხმობას საჭიროებს. რაც შეეხება ქალბატონ მარინა სანიკიძეს, მისი აყვანა შრომითი ხელშეკრულების საფუძველზე მოხდა. არასაშტატო საჯარო მოხელეთა რაოდენობა კანონმდებლობით არ რეგულირდება და მათი დაქირავება საჭიროებიდან გამომდინარე ხდება,” _ აცახდებენ გამგეობის პრესსამსახურში.
