გამოძიება ამტკიცებს, რომ მან ქვეკონტრაქტორი ფირმების დახმარებით თავდაცვის სამინისტროს ბინების და ქუთაისში პარლამენტის შენობის მშენებლობისთვის განკუთვნილი 16 მილიონი ლარი თაღლითურად მიითვისა.
გამოძიების ვერსიით, 2010 წლის 17 მარტს, შპს “მენო ინტერნეიშენალს” ერთ პირთან მოლაპარაკების წესით, სახელმწიფო შესყიდვის შესახებ ხელშეკრულება გაუფორმდა, ქუთაისში პარლამენტის შენობის სამშენებლო _ სარემონტო სამუშაოების განხორციელებაზე. ხელშეკრულების ფარგლებში, ეტაპობრივად, შპს “მენო ინტერნეიშენალ”-ს სახელმწიფო ბიუჯეტიდან 281 მილიონი ლარი ჩაერიცხა.
სამუშაოების მიმდინარეობისას, გიორგი კურცხალიამ დიდი ოდენობით საბიუჯეტო თანხების თაღლითურად დაუფლების მიზნით, პირდაპირი დანახარჯების ხელოვნურად გასაზრდელად, ხიმინჯების მოწყობაზე, მისსავე გამგებლობაში არსებულ შპს “გ.ს.კ.”-ს ქვეკონტრაქტი გაუფორმა, რითაც ერთი გრძივი მეტრი ხიმინჯის ფასი, 690 ლარი 1200 ლარამდე ხელოვნურად გაიზარდა. მთლიანობაში 22 351 გრძივი მეტრი ხიმინჯების მოწყობის სამუშაოები უნდა შესრულებულიყო, რისთვისაც შპს “მენო ინტერნეიშენალ”-მა სახელმწიფო ბიუჯეტიდან მოითხოვა და მიიღო 34 074 998 ლარი, მაშინ როდესაც ხიმინჯების მოწყობის სამუშაოების ფაქტობრივი ღირებულება 22 462 529,6 ლარი იყო. მითითებული ხერხით, გიორგი კურცხალია თაღლითურად დაეუფლა სახელმწიფოს კუთვნილ 11 612 469 ლარს.
ასევე, 2007 წლის 21 მარტს, საქართველოს თავდაცვის სამინისტროსა და შპს “მენო ინტერნეიშენალ”-ს შორის ერთ პირთან მოლაპარაკების წესით გაფორმდა ხელშეკრულება სახელმწიფო შესყიდვის შესახებ, თბილისში აბაშვილის ქ. #3-ში თავდაცვის სამინისტროს ოფიცერთათვის განკუთვნილი თვრამეტი მრავალსართულიანი საცხოვრებელი კორპუსის მშენებლობაზე. ხელშეკრულების ფარგლებში, შპს “მენო ინტერნეშნლ”-ს სახელმწიფო ბიუჯეტიდან ჩააერიცხა 56 497 662 ლარი.
სამუშაოების შესრულებისას, გიორგი კურცხალიამ, პირდაპირი დანახარჯების ხელოვნურად გასაზრდელად, ზემოაღნიშნული მშენებლობისათვის აუცილებელი საპროექტო სამუშაოებისათვის, ქვეკონტრაქტი გააფორმა მისსავე გამგებლობაში არსებულ შპს “მაგი სტილ”-თან, რისთვისაც სახელმწიფო ბიუჯეტიდან გამოყოფილი თანხიდან, 3 060 000 ლარი გადაურიცხა შპს “მაგი სტილ”-ს, მაშინ როდესაც პროექტით ასაშენებელი კორპუსები იყო იდენტური და საპროექტო სამუშაოების რეალური ღირებულება შეადგენდა 1 020 141 ლარს. ამავდროულად, თავდაცვის სამინისტროს ოფიცერთა მრავალსართულიანი საცხოვრებელი კორპუსების მშენებლობისას, გიორგი კურცხალიამ ხელოვნურად გაზარდა ფაქტობრივად შესასრულებელ სამუშაოთა ღირებულება, რითაც მთლიანობაში თაღლითურად დაეუფლა სახელმწიფოს კუთვნილ 4 944 479 ლარს.
გიორგი კურცხალიას ქმედებებებით, მთლიანობაში სახელმწიფოს 16 556 948 ლარის მატერიალური ზიანი მიადგა.
გამოძიება სს კოდექსის 180-ე მუხლის მესამე ნაწილით მიმდინარეობს, რაც სასჯელის სახით 6-დან 9 წლამდე ვადით პატიმრობას ითვალისწინებს.
გიორგი კურცხალია შპს “მაგის სტილში” ირაკლი ჩიქოვანთან და გიორგი გეგეშიძესთან ერთად 33 პროცენტიან წილს ფლობს.
