ჩვენი გადაცემის სტუმრებთან, საქართველოს პრემიერ-მინისტრთან, ბიძინა ივანიშვილთან და “ქართული ოცნების” პრეზიდენტობის კანდიდატთან, გიორგი მარგველაშვილთან ერთობლივი ინტერვიუ პრემიერის შეკვეთილის რეზიდენციაში ჩაიწერა.
_ ბატონო ბიძინა იმედია, ეს იქნება ინტერვიუ და არა კრიტიკა თქვენი მხრიდან, რომელსაც ბოლო პერიოდში, ჟურნალისტების მიმართ არ იშურებთ. ჩვენ ვსვამთ კითხვებს, რომლებიც საზოგადოებას აინტერესებს, ხელისუფალს კი აქვს თმენის და კითხვებზე პასუხის გაცემის ვალდებულება. რაც შეეხება ცრუ ინფორმაციის გავრცელებას ან ცილისწამებას, ამისთვის არსებობს სასამართლო, რომელსაც ყველა უფლებადარღვეულმა ადამიანმა უნდა მიმართოს. მე იმედი მაქვს, რომ დღეს დასმულ კითხვებზე კონკრეტულ და ამომწურავ პასუხებს მივიღებთ.
_ არ გეთანხმებით, რომ ჩვენ მხოლოდ სასამართლოს შეგვიძლია მივმართოთ და ჟურნალისტებს არ ჩავეკითხოთ. მე დავიცავი თავი ჟურნალისტებისგან. მაქვს ამის უფლება და ყველა მოქალაქეს უნდა ჰქონდეს ამის უფლება. ნუ ჰგონიათ ჟურნალისტებს, რომ ყველაფრის უფლება აქვთ. ნუ გგონიათ, რომ თქვენ შეგიძლიათ დასვათ კითხვები, შეაფასოთ მოვლენები. თქვენ შეგიძლიათ მიუთითოთ, ანალიზის შემდგომ გადაწყვეტილებები მიიღოთ რესპონდენტზე _ ამ შემთხვევაში ჩემზე და მე არ მაქვს უფლება მასზე რეაქცია მქონდეს? მე ჟურნალისტებს არ ვაკრიტიკებ. მე მათ ვთხოვე ჩემთან ერთად, ჩემზე გამონათქვამები გაემეორებინათ და არგუმენტაცია მოეტანათ. მე არ მაქვს იმის დროს, რომ ჟურნალისტები ვაკრიტიკო, მაგრამ იმის დრო კი მრჩება, რომ საკუთარ გამონათქვამებზე რეაქცია გავაკეთო. მივიჩნევდი და ახლაც მივიჩნევ, რომ კონკრეტული გამონათქვამები, როგორც ჟურნალისტების, ასევე ექსპერტების მხრიდან არ იყო მართებული. როცა მათ ვთხოვე, რომ ყველა შენიშვნა, რომელიც ჩემი და ჩემი მთავრობის მიმართ არსებობდა, ერთად გაგვეხილა, ეს არ მოეწონათ ჟურნალისტებს, ასევე ექსპერტების ნაწილს. მიმაჩნია, რომ ის საუბრები იყო აბსოლუტურად სწორი და კორექტული. ნუ ჰგონია ნურავის, რომ მარტო ხელისუფლებას მოეთხოვება. ყველას აქვთ თავისი წილი პასუხისმგებლობა. აი, ამაზე ვაკეთებ მე აქცენტებს, _ აღნიშნა ივანიშვილმა, რომლის თქმით, სამოქალაქო სექტორში გადასვლით, საზოგადოებას გაძლიერებაში დაეხმარება და პროფესიონალიზმის პრობლემა ყველას აქვს.
ერთი და იგივე კითხვები მარგველაშვილს და ივანიშვილს, რომელზედაც პასუხის გაცემა ორივეს მხოლოდ ერთი სიტყვით შეეძლოთ _ სწორედ ეს ფორმატი შევთავაზეთ რესპონდენტებს ინტერვიუს პირველი ნაწილისთვის.
_ უცნაური თამაშის წესია, თუმცა საინტერესო, _ აღნიშნა გიორგი მარგველაშვილმა.
პრემიერის თქმით, მსგავსი ფორმატის ინტერვიუ მას არასდროს ჰქონია და “გურია ნიუსი” პირველი მედიასაშუალებაა, რომლის ეთერშიც პრემიერი მარგველაშვილთან ერთად გამოჩნდა.
ბლიცის პირველი შეკითხვა კი ასეთი იყო: _ დასჭირდება თუ არა მეორე ტური გიორგი მარგველაშვილს?
ბიძინა ივანიშვილი: _ არა.
გიორგი მარგველაშვილი: _ არა.
_ უნდა შეეზღუდოს თუ არა საქართველოს მოქალაქეს საზღვარგარეთ წასვლა, თუ მის წინაშე სამართლებრივი პრობლემა არ დგას?
ბიძინა ივანიშვილი: _ არა.
გიორგი მარგველაშვილი: _ არა, ის რაც იყო მანამდე, იყო კონსტიტუციის ჩასწორება.
_ თუ შეიძლება მხოლოდ ერთი სიტყვით გაგვეცით პასუხები. პარლამენტში შეტანილია კანონპროექტი, რომელიც ქართული ენის დამახინჯების გამო, სანქციებს ითვალისწინებს. დაჯარიმდება თუ არა პრემიერი ისეთი სიტყვის გამოყენებისთვის როგორიც არის “მიჯირყვნა”?
ამ შეკითხვამ ჩვენი რესპონდენტები მხიარულ ხასიათზე დააყენა.
გიორგი მარგველაშვილი: _ ამას კომპეტენტური კომისია უნდა.
_ კი თუ არა?
_ თუ არ არის ლიტერატურული გამოთქმა, დაჯარიმდება. რა ვიცი.
_ როგორ ფიქრობთ ბატონო ბიძინა, დაჯარიმდებით თუ არა?
_ პრობლემა არ იქნება.
_ მართალია, ფორმატს ვარღვევთ, მაგრამ იქნებ განვმარტოთ. რას ნიშნავს სიტყვა “მიჯირყვნა”, რომელიც დღემდე ვერავინ გაიგო?
ბიძინა ივანიშვილი: _ საუბედუროდ, მე არ მაქვს პრეტენზია, რომ რომელიმე ენას დახვეწილად ვფლობ და პირველ რიგში, კი ქართულ ენას. ამას ძალიან განვიცდი და საზოგადოება მინდა, გაგებით მოეკიდოს. “მიჯირყვნა” არ მითქვამს, “მიჭირყვნა” ვთქვი.
გიორგი მარგველაშვილი: _ “მიჭირყვნა”? დაჭირხვნა არის რაღაცის “დაპრესვა”.
ბიძინა ივანიშვილი: _ ეს აბსოლუტურად ქართული სიტყვაა და დაწოლას ნიშნავს. ეს შეიძლება, ასე გაისმა. ამ სიტყვას ხშირად ვხმარობ. ჟურნალისტებმა ვერ გაიგეს სწორად.
_ ყველაფერს ჟურნალისტებს რატომ აბრალებთ?
_ ეს სიტყვა არალიტერატურული არაა. ეს არაა შეურაცხმყოფელი. ცუდია, რომ ეს ჟურნალისტებმა ეს ვერ გაიგეს, მათ ქართული ენა კარგად უნდა იცოდნენ. აი, ერთ-ერთი პრეტენზია.
_ უნდა აშენდეს თუ არა საქართველოში დიდი ჰესები?
ბიძინა ივანიშვილი: _ კი.
გიორგი მარგველაშვილი: _ კი.
_ არის თუ არა განსხვავება ლაზიკისა და ანაკლიის პორტებს შორის?
ბიძინა ივანიშვილი: _ არის, რა თქმა უნდა.
გიორგი მარგველაშვილი: _ არ ვიცი. არ ვფლობ ამ საკითხზე ინფორმაციას.
_ უშვებენ თუ არა შეცდომებს თქვენი მინისტრები?
ბიძინა ივანიშვილი: _ სერიოზულს არა.
გიორგი მარგველაშვილი: _ ბუნებრივია, უშვებენ.
_ თქვენი ინფორმაციით, იყენებენ თუ არა ძალოვანი სტრუქტურები საქმეების გახსნისას ძველ მეთოდებს?
ბიძინა ივანიშვილი: _ არა.
გიორგი მარგველაშვილი: _ ჩემთვის არ არის ცნობილი.
_ 2012 წლის 1 ოქტომბერს ვის მისცა ქართველმა ხალხმა ხმა _ ბიძინა ივანიშვილს თუ დღევანდელ პარლამენტს?
გიორგი მარგველაშვილი: _ კოალიციას და ბიძინას.
ბიძინა ივანიშვილი: _ ორივეს.
_ თქვენი წასვლისას პარლამენტი ხელახლა უნდა ავირჩიოთ?
ბიძინა ივანიშვილი: _ არა.
გიორგი მარგველაშვილი: _ არა.
