“ეს კიდევ ერთხელ ადასტურებს იმ ეჭვს, რომ ისინი ბურჯანაძის წინააღმდეგ გაერთიანდნენ. ახლა საარჩევნო ციებ-ცხელებაა და ძალიან ბევრ კანონდარღვევას ვაწყდებით. ნინო ბურჯანაძის სლოგანიდან გამომდინარე, მიგვაჩნია, რომ ქვეყანაში სამართლიანობა უნდა არსებობდეს. მოწინააღმდეგე პარტიის წევრები ამ ბოლო დროს ძალიან ჰარმონიულად არიან ერთმანეთში. ბევრ რამეზე ვხუჭავთ თვალს, მაგრამ გუშინდელ ფაქტზე ვეღარ გავჩუმდებით.
კანონდარღვევაა, როცა პარტია თავის კომისიის წევრებს ტრენინგებს საკუთარ შტაბში ჩაუტარებს. “ქართული ოცნების” შტაბში მოიწვიეს კომისიის წევრები, კომისიის თავმჯდომარეები და უტარებენ ტრენინგებს, ეს ჩვენი შტაბის წევრსაც კი დაუდასტურეს, როცა ის მათთან იმის გასარკვევად მივიდა, თუ რა სახის შეკრება იყო შტაბის შენობაში.
ამ ფაქტზე იურისტებთან კონსულტაციები მქონდა და მათ დამიდასტურეს, რომ ეს არანაირი კანონმდებლობის ჩარჩოში არ ჯდება. პოლიტიკური ბრძოლა მიმდინარეობს და მინდა ეს კანონდარღვევა დავაფიქსიროთ,” _ ამბობს ბურჯანაძის შტაბის რაიონული ორგანიზაციის ხელმძღვანელის მოადგილე გია გურგენაძე.
“ქართული ოცნების” შტაბთან გუშინ ხალხმრავლობა შევნიშნე, გადავედი და ვიკითხე – ვინ იყვნენ და რა ხდებოდა. გამოვიდნენ კომისიის წევრი და თავმჯდომარე და მითხრეს, რომ ტრენინგს ესწრებოდნენ. ეს კანონდარღვევად ითვლება, რადგან ტრენინგი “ქართული ოცნების” შტაბის შენობაში ტარდებოდა. შემდეგ ვესაუბრე შტაბის წევრს, რომელმაც მითხრა, რომ პირველი სართული მათ არ ეკუთვნით და სხვისი საკუთრებაა. დავინტერესდი ფულს ვინ იხდიდა. ვესაუბრე მამუკა ჭყონიას და ვახტანგ წილოსანს, ასევე, შტაბის უფროსსაც და ისინი აცხადებენ, რომ უკანონო არაფერია. ტრენინგები უტარდებოდათ როგორც კოალიციის, ასევე “ნაცმოძრაობის” კომისიის წევრებსაც.
კოჰაბიტაცია უნდათ, ესენი პროგნოზირებენ, რომ “ნაცმოძრაობა” მეორე ადგილზე გავა და თუ ეს მოხდა, კოჰაბიტაცია არ დასრულდება. ნინო ბურჯანაძის მოსვლა მათ არ აწყობთ და მისი სერიოზული შიში აქვთ,” _ აცხადებს ბურჯანაძის შტაბის წევრი გელა კვერენჩხილაძე.
აღნიშნულ ბრალდებებს მარგველაშვილის შტაბიდან პასუხობენ და აცხადებენ, რომ ტრენინგები შენობის პურველ სართულზე ტარდება, რომელიც მათი შტაბის საკუთრებაში არ შედის.
რაც შეეხება “ოცნებისა” და “ნაცმოძრაობის” წარმომადგენლებისათვის ტრენინგების ერთად ჩატარებას, მარგველაშვილის შტაბში ბრალდებას ორი პოლიტიკური გუნდის “ჰარმონიული ურთიერთდამოკიდებულების” შესახებ აბსურდს უწოდებენ.
საოლქოს თავმჯდომარე ზვიად ნაკაიძე ადასტურებს, რომ ტრენინგის გრაფიკი მასთან არის შეთანხმებული და კომისიის წევრები სწავლებას გადიან იმ საკითხებზე, რომელიც ცეესკოს მიერაა მომზადებული. როგორც ნაკაიძე ამბობს, აღნიშნულთან დაკავშირებით ბურჯანაძის შტაბის წამომადგენელსაც ესაუბრა და ყველაფერი აუხსნა.
“ამაში არაფერი არ არის დანაშაული. თუ თვლიან, რომ დარღვევაა, მუხლი მიუთითონ და დაწერონ საჩირვარი,” _ ამბობს “გურია ნიუსთან” ზვიად ნაკაიძე.
ახალგაზრდა იურისტთა ასოციაციის ოზურგეთის რაიონული ორგანიზაციის ხელმძღვანელ თამაზ ტრაპაიძის თქმით, თუ ტრენინგი პარტიის მიერ არის ორგანიზებული და პარტიის მიერ წარდგენილ წევრებს უტარდებათ, ამ შემთხვევაში აქ არანაირი დარღვევა არ არის.
