ოზურგეთის რაიონული პროკურორის მოადგილე მალხაზ სირაძის განცხადებით აღნიშნულ სისხლის სამართლის საქმეებზე გამოძიება მიმდინარეობს და მალე გაიხსნება.
“შსს-ს გურიის სამხარეო მთავარ სამმართველოში დაწყებულია გამოძიება ოზურგეთის მუნიციპალიტეტის სოფელ დვაბზუში ალექსანდრე ღლონტის განზრახ მკვლელობის ფაქტზე. გამოძიება სისხლის სამართლის კოდექსის #108 მუხლით მიმდინარეობს. ჩატარდა ცხედრის გამოკვლევა, გვამს აღენიშნება დაზიანება, იკითხება მოწმები. ვერსიები არსებობს და მიმდინარეობს ამ ვერსიებზე მუშაობა და შედეგიც მალე გვექნება,” _ აღნიშნა “გურია ნიუსთან” მალხაზ სირაძემ.
ოზურგეთის მუნიციპალიტეტის სოფელ დვაბზუში, 45 წლის ახალგაზრდა მამაკაცი 14 სექტემბერს დილით, მეზობლებმა ქუჩაში გარდაცვლილი იპოვეს, მისი საცხოვრებელი სახლი კი დამწვარი ნახეს.
როგორც გარდაცვლილის მეზობლები “გურია ნიუსთან” ყვებიან, ახალგაზრდა მამაკაცს გულის არეში ჭრილობა ჰქონდა და ის განზრახ მოკლეს. მაშინ აღნიშნულ ფაქტთან დაკავშირებით პროკურატურას კომენტარი არ გაუკეთებია, შსს პრესსამსახურში კი აცხდებდნენ, რომ სანამ ექსპერტიზის დასკვნის პასუხი არ იქნებოდა, კომენტარს ვერ გააკეთებდნენ.
ჯერ კიდევ გაუხსნელია ოზურგეთის მუნიციპალიტეტში სოფელ გურიანთაში 5 აგვისტოს საკუთარ სახლში ჩაცხრილული გოჩა გუჯაბიძის მკვლელობის საქმეც.
“აღნიშნულ ფაქტზე მიმდინარეობს გამოძიება, აქაც არსებობს ვესიები და იმედია, რომ მალე გაიხსნება,” _ განაცხადა პროკურორმა მალხაზ სირაძემ.
