“დემოკრატიული მოძრაობა – ერთიანი საქართველოს” ოზურგეთის რაიონულ ორგანიზაციაში მიიჩნევენ, რომ ავთანდილ სურგულაძემ კანონი დაარღვია და ამის შესახებ ოზურგეთის #60 საოლქო საარჩევნო კომისიას განცხადებით უკვე მიმართეს.
_ ბატონო ავთანდილ, დაარღვიეთ თუ არა კანონი?
_ არავითარ შემთხვევაში. მე შემიძლია გაჩვენოთ წერილი, რომელიც მოგვივიდა რეგიონული განვითარების და ინფრასტრუქტურის სამინისტროდან და სადაც წერია, თუ რა ეკრძალება საარჩევნო პროცესების დროს საჯარო მოხელეებს. ერთ-ერთ პუნქტში ნათლად წერია: “ადგილობრივი თვითმმართველობის საჯარო მოხელეებს სამუშაო საათების განმავლობაში ან სამსახურებრივი ფუნქციების შესრულების დროს, წინასაარჩევნო აგიტაციაში მონაწილეობა ეკრძალებათ. ეს შეზღუდვა არ ვრცელდება ადგილობრივი ხელისუფლების იმ წარმომადგენლებზე, რომლებიც “საარჩევნო კოდექსის” მიხედვით ოლიტიკური თანამდებობის პირებად ითვლებიან. ესენი არიან: წარმომადგენლობითი ორგანოს, საკრებულოს, წევრები; საკრებულოს თავმჯდომარე და აღმასრულებელი ორგანოს ხელმძღვანელი (მერი/გამგებელი)”. ეს ინფორმაცია გამოვაკარით საკრებულოს შენობაში და ასევე გავაცანით საჯარო მოხელეებს.
სრულ უფლებას მაძლევს დასწრების. ცოტა ზრდილობის და ეთიკის ამბავიც არის და უხერხულიც იქნებოდა, როდესაც პრემიერ-მინისტრი არის ჩამოსული ოზურგეთში და საკრებულოს თავმჯდომარე ამას არ დაესწრებოდა, ეს უფრო მეტ უხერხულობას გამოიწვევდა. მე არავინ მზღუდავს ასეთი ტიპის შეხვედრებზე მისვლას. ნინო ბურჯანაძის შეხვედრაზეც შემიძლია მივიდე და ასევე დავით ბაქრაძის შეხვედრასაც დავესწრო.
_ ანუ სხვა პრეზიდენტობის კანდიდატების შეხვედრასაც დაესწრებით?
_ არ ვიცი. ასეთი მიდგომა თუ იქნება, რომ შეხვედრის მერე საჩივრებს დამიწერენ, შემდეგ ნამდვილად არ მექნება ამის სურვილი პრეზიდენტობის კანდიდატების შეხვედრებს დავესწრო. მთელი ამბავი ატეხეს.
_ თქვენ თქვით, რომ კანონი არ გიკრძალავთ დასწრების უფლებას, ანუ შიშის ფაქტორია?
_ კი არ მეშინია. საჩივარი საჩივარზე შედის საოლქოში ბურჯანაძის შტაბიდან. ვნახოთ, შეიძლება მივიდეთ.
_ სოციალურ ქსელში მიდის პოლემიკა გქონდათ თუ არა მორალური უფლება “ქართული ოცნების” პრეზიდენტობის კანდიდატის საარჩევნო შეხვედრას დასწრებოდით და ასევე, გამოქვეყნდა თქვენი ფოტო, რომელიც 2012 წლის არჩევნების დროს არის გადაღებული და თქვენს გვერდით რამაზ ნიკოლაიშვილი დგას.
_ კი, გასაგებია. კიდევ ერთხელ გავიმეორებ, რომ მე არცერთი პოლიტიკური პარტიის წევრი არ ვარ. იყო შემოთავაზება “ერთიანი ნაციონალური მოძრაობის” დროს, რომ დეპუტატად მეყარა კენჭი და მეც დავთანხმდი, რადგან მანამდე რამდენიმე სერიოზულ თანამდებობაზე ვიყავი ნამუშევარი. ჩემი და ჩემი ოჯახის პატიოსნების შესახებ შეიძლება გაიკითხოთ. ნებისმიერი შეიძლება დაინტერესდეს ჩემი საქმიანობითს და არც არავისთვის დამიძალებია ვინმეს ჩემთვის მოეცა ხმა. მე მეამაყება კიდევაც იმ ხალხის გვერდით დგომა, როცა მაშინ ვიდექი ნაცმოძრაობის გვერდით, იმ საქმეებით, რაც მე გამიკეთებია. ვინც დააშავებს, რა თქმა უნდა, პასუხი უნდა მოეთხოვოს. 2012 წლის არჩევნების შემდეგ დავდექით რეალობის წინაშე და ჩვენ თვითონ დავშალეთ საკრებულოში “ერთიანი ნაციონალური მოძრაობის” ფრაქცია და შევქმენით ახალი ფრაქცია “ერთობა”. შემდეგ მოვიდნენ “ქართული ოცნების” წარმომადგენლები და გვითხრეს, რომ თქვენაირი ადამიანები გვჭირდებაო და ძალიან გთხოვთ დაგვიდექით გვერდითო.
_ იქნებ დაასახელოთ ვინ მოვიდა და ვინ გთხოვათ, რომ მათ გვერდში დამდგარიყავით?
_ კონკერტულად ასე როგორ დავასახელო. ერთი ან ორი პიროვნება კი არ იყო, თითქმის ყველა მოვიდა. მე იქ ვიქნები, სადაც ჩემი ქვეყანა მთხოვს და იმ საქმეს გავაკეთებ, რაც ქვეყნის წინსვლას შეუწყობს ხელს.
_ ვინ დაგპატიჟათ პრეზიდენტობის კანდიდატ გიორგი მარგველაშვილის შეხვედრაზე?
_ არავის, მე თვითონ მივედი.
_ ბატონო ავთო, გიორგი მარგველაშვილის შეხვედრაზე, როდესაც თქვენ თეატრში იმყოფებოდით, მეორე სართულიდან გადმოვარდა დროშა და თქვენ დაგეცათ თავზე.
_ თავზე არ დამცემია. მეორე სართულიდან ჯერ ქურთუკი გადმოვარდა და ჩემს წინ ქალბატონს დაეცა მკლავზე და რაც შეეხება დროშას, ჩემს გვერდით ჩამოვარდა. ნამდვილად ტყუილია, რომ თავზე დამეცა. ძალიან სასაცილოა და არ ვაპირებ ამის შესახებ განცხადების გაკეთებას. _ თქვა ჩვენთან საუბრის დროს ავთანდილ სურგულაძემ.
“გურია ნიუსი” ასევე უცვლელად გთავაზობთ “დემოკრატიული მოძრაობა – ერთიანი საქართველოს” ოზურგეთის რაიონულ ორგანიზაციის განცხადებას, რომელიც საოლქოში უკვე შევიდა.
“გაცნობებთ, რომ 04.10.2013 წელს 16:00 საათზე ოზურგეთის სახელმწიფო დრამატულ თეატრში გაიმართა პრეზიდენტობის კანდიდატ გიორგი მარგველაშვილის წინასა-არჩევნო შეხვედრა ამომრჩევლებთან.
ზემოხსენებულ შეხვერასთან დაკავშირებით ოზურგეთის მუნიციპალიტის საკრებულოსა და გამგეობის საჯარო მოხელეებს შეხვედრაზე დასწრების ორგანიზებას უწევდა ამავე საკრებულოს თავმჯდომარე ავთანდილ სურგულაძე. ასევე, შეხვედრაზე წინასაარჩევნო აგიტაციის მიზნით გამოყენებული იქნა ანსამბლი “შვიდკაცა”, რომელიც ადგილობრივი ბიუჯეტიდან ფინანსდება.
მიგვაჩნია, რომ ოზურგეთის მუნიციპალიტეტის საკრებულოს თავმჯდომარის ავთანდილ სურგულაძის წინასაარჩევნო შეხვედრაში მონაწილეოების მიღება და საკრებულოს თანამდებობის პირების იძულება ამავე შეხვერაზე დასწრებასთან დაკავშირებით, საარჩევნო კოდექსის უხეში დარღვევაა.
ამასთანავე, გთხოვთ შეისწავლოთ საკრებულოს დაფინანსებაზე მყოფი ანსამბლ “შვიდკაცას” შეხვედრაზე დასწრება და წინასაარჩევნო აგიტაციაში აქტიური მონაწილეობის შესაბამისობა მოქმედ კანონმდებლობასთან. ვინაიდან მიგვაჩნია, რომ ხსენებული ფაქტი არის ადმინისტრაციული რესურსის უკანონოდ გამოყენება”, _ ნათქვამია განცხადებაში.
