გარდაცვლილის მამა თენგიზ ძველაია “გურია ნიუსთან” ამბობს, რომ ექსპერტიზის ფული ოჯახმა და ნათესავებმა შეაგროვეს და დახმარება მაია ნიკოლეიშვილს სთხოვეს.
“ექსპერტმა გვამის გარეგანი დათვალიერება მოახდინა, შინაგან შემოწმებაზე კი გვითხრა, ამ ეტაპზე ხელახლა გაკვეთას აზრი არ აქვს, ციხეში უკვე გაუკვეთიათო. ჩემს გარეშე გაკვეთეს ბავშვი, ჩვენ რომ დაგვირეკეს გოგა 8-9 საათის გარდაცვლილი იყო. ნიკოლეიშვილს დაზიანებების შესახებ ვკითხე, მაგრამ არაფერი მითხრა, ჭორიკანა ქალი არ ვარ, ჰაერზე ვერ ვილაპარაკებო, 2 დღეში ზუსტ დასკვნას დავდებო”, _ ამბობს ძველაია.
გოგა ძველაიამ ქუთაისის ციხეში 24 საათზე ნაკლები გაატარა. ეს მისი მეორე პატიმრობა იყო. სასჯელს პირველადაც ქურდობისთვის იხდიდა და 28 აგვისტოს პრეზიდენტის შეწყალებით გათავისუფლდა. 7 ოქტომბერს სასამართლომ მისი გირაოს სანაცვლოდ გათავისუფლების გადაწყვეტილება მიიღო, თანხის გადახდამდე კი ბრალდებული ციხეში გადაიყვანეს.
“პირველად რომ გამოვიდა შეწყალებით, ჩემმა შვილმა მომიყვა, რომ ციხეში ერთ-ერთ ბიჭთან ინცინდენტი მოუხდა. დილით პირს რომ იბანდა, იმ ბიჭს პირსახოცი დაურტყამს ჩემი შვილისთვის ხუმრობით, მაგრამ გოგას ისე მწარედ მოხვედრია თვალში, რომ იმ ბიჭისთვის ყბა მოუტეხია. გოგასაც ხელი ჰქონდა მოტეხილი, ოპერცია დასჭირდა, რაღაც რკინა ჰქონდა ჩადგმული. ეს ინცინდენტი 25 აგვისტოს მოხდა, 28-ში კი გოგა გაათავისუფლეს. ჩემი შვილისგან ვიცი, რომ ის ბიჭი მაყურებელი იყო, მაგრამ სამწუხაროდ მისი გვარი აღარ მახსოვს. მაშინ ეს ბავშვურ ჩხუბად მივიჩნიე და ყურადღება არ გამიმახვილებია”, _ ამბობს გარდაცვლილი პატიმრის მამა.
თენგიზ ძველაია იხსენებს, რომ ქუთაისის ციხეში გადაყვანის ამბავმა მისი შვილი ძალიან ააღელვა. გვეხვეწებოდა, ოღონდაც იქ არ გამიშვათ, ის ბიჭი ყბის მოტეხვას არ მაპატიებს და მომკლავენო. ჩვენ დავამშვიდეთ, ერთი დღე გვაცალე, ფულს ვიშოვით ნათესავებში და გარეთ გამოგიყვანთქო.
ქუთაისის ციხეში შესვლისთანავე გოგა ძველაი ციხის უფროსს შეხვდა და უსაფრთხოების მიზნით სამარტოო საკანში გადაყვანა მოითხოვა. როგორც გარდაცვლილის მამა ყვება, გოგამ ციხის უფროსს მშობლებთან დარეკვა და იმის გადამოწმებაც სთხოვა, ჩაირიცხა თუ არა გირაოს თანხა. ციხის უფროსი ამტკიცებს რომ ოჯახს დაუკავშირდა თუმცა, მათ ტელეფონი გამორთული ჰქონდათ. მეორე საღამოს დაახლოებით 7 საათზე პატიმარი გარდაცვლილი იპოვეს. ოჯახი ამბობს, რომ მომხდარის შესახებ მათ ღამის 3-4 საათზე შეატყობინეს .
“ერთ საათში უკვე ქუთაისში ვიყავით, ციხის უფროსმა ჩემი შვილის ხელით დაწერილი განცხადება მაჩვენა, სადაც ის წერდა, რომ მის სიცოცხლეს საფრთხე ემუქრება და შველს ითხოვს. მე ვეკითხები მათ, ბავშვი რომელიც გაფრთხილებთ, გეუბნებათ, რომ საფრთხეშია, რითი დაიცავით? რა გააკეთეთ მისი უსაფრთხოებისთვის? მეუბნებიან ზეწრით ჩამოიხრჩო თავიო. ციხეში ვიდეო თვალია დამონტაჟებული, მაჩვენეთ, რომ ჩემი შვილი თავს იკლავს, მაჩვენეთ მისი საკნის კადრები, მინდა ვნახო ამ პეროდში ვინ შედიოდა და გადიოდა გოგასთან. კადრებს ვერ გაჩვენებთ, იმ დროს კამერა ხარვეზით მუშაობდაო, მითხრეს. ეგენი კადრებს მომცემენ?! ჩემი შვილის დაწერილი განცხადების ასლი არ მომცეს, უფლება არ გვაქვსო”, _ ამბობს გარდაცვლილი პატიმრის მამა.
ოჯახში ფიქრობენ, რომ მათი შვილი პატიმრებმა მოკლეს, ციხის ადმინისტრაცია კი მომხდარს თვითმკვლელობად ასაღებს.
“ამ ეჭვებს მიმძაფრებს ყელზე ნაჭდევი, რომელიც მიემართება არა ზემოთ, არამედ ქვემოთ. როგორც ახლობელმა ექიმმა ამიხსნა, ბავშვს უკნიდან წაუჭირეს თოკი და მოახრჩვეს. ვერ ვიტყვი, რომ მოკვლის განზრახვა ჰქონდათ, უფრო მგონია, რომ შემოაკვდათ. გოგა მოჭიდავე იყო და ერთი კაცი ვერ მოერეოდა, მას უკნიდან მიეპარა რამდენიმე კაცი და მოახრჩო. რამდენჯერ
გარდაცვლილის მშობლები სენაკში სასჯელაღსრულების მინისტრის ჩასვლას ითხოვენ. მათი თქმით, სოზარ სუბარმა გამოძიების დასრულებამდე გამოაცხადა გოგა ძველაია თვითმკვლელად.
“მე არ მინდა ჩემს შვილს ამხელა ცოდვა გავატანო იმქვეყნად, მინდა მღვდელი მოვიყვანო, ქრისტიანულად დავკრძალო. ვინ გამომყვება, როცა ჯერ გამოძიება არ დამთავრებულა და მინისტრი უკვე თვითმკვლელად ასაღებს გოგას? ჩემი შვილი სოცოცხლეში ვერ დავიცავი, მაგრამ მკვდარს მაინც დავიცავ. უმძიმეს მდგომარეობაში ვარ, არც მძინავს, ვერც ვჭამ, ღამეებს ვუთენებ ჩემს შვილს. გუშინ ნოხი გავშალე იატაკზე, ჩემი მკვდარი შვილი გვერდზე მოვიწვინე და მთელი ღამე ვფიქრობდი, ვაანალიზებდი მომხდარს. მაჩვენონ კადრები, დამარწმუნონ იმაში, რასაც ამტკიცებენ. ბავშვმა იცოდა, რომ გირაოს ფული ნაშოვნი გვქონდა, წუთი-წუთზე ელოდა გამოსვლას და თავი მოიკლა?ვის სჯერა ამის?!”
წუხელ ძველაიების ოჯახში ადამიანის უფლებათა დაცვის კომიტეტის თავმჯდომარე ეკა ბესელია იმყოფებოდა, რომელიც ოჯახს დახმარებას დაპირდა.
“ეკა ბესელიამ გვითხრა ყველაფერს გავაკეთებ სიმართლის დასადგენადო. ხვალ ქუთაისში მიდის, ჩემი შვილის საკანსაც ნახავს, ყველა ინფორმაციას და საბუთს ამოიღებს და მერე ჩვენც ჩაგვაყენებს საქმის კურსში”, _ ამბობს თენგიზ ძველაია.
