მოსახლეობა დანებებას არ აპირებს. ხუდონჰესის წინააღმდეგ იმართება აქციები თბილისსა და სვანეთში. ირაკლი ღუტიძე ერთ-ერთია იმ მოქალაქეებიდან, რომლებიც თბილისიდან ხაიშში ადგილობრივების მხარდასაჭერად ჩავიდა და ის ადგილები დაათვალიერა, რომლებსაც დატბორვა ემუქრება.
“მოსახლეობას შევხვდით, თანადგომა ვაგრძნობინეთ. ის ადგილები დაგვათვალიერებინეს, რომლებიც უნდა დაიტბოროს. საგვარეულო საფლავებზეც ვიყავით, ეკლესიაც ვნახეთ. ჩვენს შორის ნდობა ჩამოყალიბდა. მოსახლეობის განწყობა ისეთია, რომ კატეგორიულად წინააღმეგები არიან და არ დაუშვებენ საკუთარი ადგილების დატბორვას. იმ ხალხმა დაიფიცა ხატზე და შანსი არაა, გადათქვან, უკან დამხევი ხალხი არაა და ეგ გამოჩნდა. ჩვენც ვაპირებთ აქციების გაგრძელებას და უნდა შეიგნონ ქვეყნის მმართველებმა, რომ ასეთი უპასუხისმგებლო გადაწვეტილებების მიღება არ შეიძლება,” _ აღნიშნა ირაკლი ღუტიძემ.
5 ოქტომბერს პარლამენტთან გამართულ აქციაზე მესტიის მაცხოვრებელმა ზაზა დევდარიანმა მოქალაქეებს ყველა ხერხით ბრძოლისკენ მოუწოდა, რათა არ დაუშვან სვანეთის ჩაძირვა.
ზაზა დევდარიანი ამავე დროს ადვოკატიცაა და მისი თქმით, შპს “ტრანსელექტრიკა ჯორჯიას” (ინდური კომპანია, რომელიც ხუდონჰესს აშენებს სვანეთში) მიერ ხაიშში მიწების შეძენისას კანონდარღვევები აღმოაჩინა.
“ხაიშის ტერიტორიის ძალიან დიდი ნაწილი, მათ შორის საავტომობილო გზა, უკვე არის რეგისტრისტრებული შპს “ტრანს ელექტრიკა ჯორჯიას”, არა უბრალოდ იჯარით, ან დროებით სარგებლობაში, არამედ საკუთრებაში. ასევე, ხაიშის მიმდებარე ტყეები. კერძო მოსახლეები, რომლებიც იქ არიან, წარმოიდგინეთ, რომ კუნძულზე ცხოვრობენ. საკუთარი ჭიშკრიდან როდესაც გამოვა ადამიანი, უკვე შპს “ტრანსელექტრიკა ჯორჯიას” კუთვნილ ტერიტორიაზეა.
საავტომობილო გზის ნახაზი ამოვიღე საჯარო რეესტრიდან. აღნიშნული მიწის ნაკვეთი, ანუ საავტომობილო გზა გადაეცა შპს “ტრანს ელექტრიკა ჯორჯიას” 2012 წლის 16 იანვარს. კი ბატონო, ეს არის სააკაშვილის დროს განხორციელებული. მაშინ ამ სამართლიანობის აღდგენის ლოზუნგით მოსულმა ხელისუფლებამ დაიწყოს გამოძიება, რამდენად შეესაბამება საქართველოს კანონმდებლობას აღნიშნული პრივატიზაცია. მე ვაპირებ, კონკრეტულად ამ მიწის ნაკვეთის პრივატიზაციასთან დაკავშირებით გამოვითხოვო დოკუმენტები, პირადად შევისწავლო ისინი.
ჩვენ ყველანაირად უნდა ვიბრძოლოთ. მარტო ხაიშთან დაკავშირებით არ ხდება ასე. მესტიის, მულახის, თეთნულდის, ჰაწვალის პროექტებშიც არ არის საკუთრების საკითხი გადაწვეტილი. აპირებენ ხალხის კუთხეში მიმწყვდევას, ხოლო შემდეგ შანტაჟით, ან სხვა გზით, იაფად ტერიტორიების დათრევას,” _ აცხადებს დევდარიანი.
ენერგეტიკის მინისტრი კახა კალაძე ადასტურებს, რომ ხუდონჰესის პროექტთან დაკავშირებით ხელშეკრულებას ხელი წინა ხელისუფლების დროს მოეწერა. თუმცა, ახალი ხელისუფლების პირობებში მისი გადახედვა და განახლება მოხდა.
როგორც ადვოკატმა ზაზა დევდარიანმა განაცხადა, საკუთრების გადაფორმების ხელშეკრულებებიც გადასახედია, ვინაიდან 2012 წლის 16 იანვარს მესაკუთრე შპს “ტრანსელექტრიკა ჯორჯიას” მიერ სახელმწიფოდან ნაყიდი 420229კვ.მ ფართობში საავტომობილო გზაც შედის. ეს კი დევდარიანის თქმით, კონსტიტუციას ეწინააღმდეგება. რადგან სოფელში სხვა გზა არ არის და სახელმწიფოს არ უნდა გაეყიდა კერძო კომპანიაზე ის გზა, რომლითაც მოსახლეობა სარგებლობს.
“ვიბრძოლებთ წმინდა იურიდიული გზით, რომ საქმე იქნას გამოძიებული, ან პოლიტიკური გზით. წესით და რიგით დღევანდელი ხელისუფლებაც უნდა იყოს დაინტერესებული ამ საქმის გამოძიებით. წულუკიანს და სუბარს მივმართავ, ისინი არიან სვანეთიდან და ამოიღონ ხმა, როდესაც საფრთხე სვანეთის გაქრობას ემუქრება. ისინი თანამდებობებზე არიან და ამისთვის არ სცალიათ. იმედია მოიცლიან,” _ აღნიშნა დევდარიანმა.
შეგახსენებთ, რომ 19 ოქტომბერს, 13:30-ზე კანცელარიასთან ხუდონჰესის წინააღმდეგ მორიგი საპროტესო აქცია გამიართება, საიდანაც მონაწილეები მსვლელობით ბიძინა ივანიშვილის რეზიდენციისაკენ გაემართებიან.
