(გურია ნიუსი, ლანჩხუთი) _ 25 ივნისს, გამთენიისას, ლანჩხუთის პოლიციის იზოლატორიდან 26 მაისს დაკავებულების ნაწილი გაათავისუფლეს _ მათი პატიმრობის 30-დღიანი ვადა სწორედ ამ დროს ამოიწურა. ლანჩხუთის იზოლატორში 10 მსჯავრდებულია _ მზეჭაბუკ ჩაჩხიანი, ზურაბ მაყაშვილი, ვეფხია დევნოზაშვილი, გიორგი დუნდუა, გოჩა ლაშხი, ვარდენ კუტალაძე, გიორგი ყოლბაია, ტარიელ ფლუიძე, თენგიზ მამნიაშვილი, გელა მამნიაშვილი, რომლებმაც 26 მაისს, ცემა-ტყეპასთან ერთად, ერთთვიანი პატიმრობაც მიიღეს.
მანამდე პოლიციასთან სრული სიმშვიდე სუფევდა და არც პოლიციის შენობაში შეიმჩნეოდა ფუსფუსი. შენობის წინ მხოლოდ პროკურორის ავტომობილი იდგა.
სამორიგეოში ჩვენი შეკითხვის პასუხად, იციან თუ არა როდის გაათავისუფლებენ დაკავებულებს, შეგვახსენეს, რომ წინასწარი დაკავების იზოლატორი ცალკე სუბიექტია და არაფერი ვიცითო.
ჩვენ პოლიციის წინ გამოჩენილ ადამიანებს გავესაუბრეთ, რომლებიც დაკავებულთა ახლობლები იყვნენ.
_ თქვენ 26 მაისს დაკავებულთა გათავისუფლებას ელოდებით?
_ დიახ, დღეს ოთხ მათგანს ათავისუფლებენ _ 2 თბილისელია, ერთი _ რუსთაველი და ერთიც _ არ ვიცი… _ ამბობს ახალგაზრდა ქალბატონი.
საინტერესოა ის ფაქტი, რომ პოლიციაში ადგილობრივი ოპოზიციიდან არავინ შეგვინიშნავს, არც “სახალხო კრების” აქტივისტებიდან გამოჩენილა ვინმე. მართალია, მათი ლიდერი გია გურგენაძე ასევე დაკავებულია და ჩოხატაურის პოლიციის იზოლატორში იხდის სასჯელს, მაგრამ “როცა დიდი გეგმები ჰქონდათ”, პოლიციის წინ მდებარე ოფისში მუდამ ხალხმრავლობა იყო.
გათავისუფლების მომლოდინე დაკავებულთა ახლობლები, რაც დრო გადიოდა, მეტად ნერვიულობდნენ.
_ თქვენ ვინ ხართ? _ მეკითხება ქალბატონი, რომელსაც აშკარად ეტყობა, რომ უშიშროების თანამშრომელი ვგონივარ.
_ ჟურნალისტი ვარ.
_ ახლა ამათ ინტერვიუ უნდა ჩამოართვა? _ მეკითხება ლანჩხუთელად გაცნობილი მამაკაცი.
_ თუკი თავად არ იქნებიან წინააღმდეგი…
_ არ გინდა, თუ ძმა ხარ, ერთი მშვიდობით გამოვიდნენ და… კიდევ პრობლემები უნდათ?!
_ არა მგონია, უარესი დამართონ ჩემთან საუბრის გამო.
_ არა, არ გვინდა, რა ინტერვიუ… _ უკვე ქალბატონიც წინააღმდეგია.
_ ქალბატონო, ნუ ნერვიულობთ, მე ვკითხავ და თუ არ მიპასუხებენ, მათი ნებაა, _ ვცდილობ დავამშვიდო იგი.
პროკურორის ავტომობილის წასვლა პოლიციის მიმდებარე ტერიტორიიდან დაკავებულთა ახლობლებში დაძაბულობას ზრდის _ ვაითუ, დაკავებულთა გათავისუფლება გადაიდოს.
_ ერთი ცოცხალი დამანახა და მეტი არაფერი მინდა! _ ამბობს ერთ-ერთი.
00.34 საათზე პირველმა გათავისუფლებულმა დატოვა პოლიციის შენობა.
ამაღელვებელი შეხვედრის შემდეგ, ახლობლები ცდილობენ, რაც შეიძლება მალე გასცილდნენ აქაურობას.
_ როგორი პირობები იყო ლანჩხუთის იზოლატორში? ზეწოლის ფაქტები ხომ არ ყოფილა?
_ არა, არა… რაც შეეხება პირობებს, ისეთი კარგი პირობები შეგვიქმნეს, აქედან წასული ვეცდები, მალევე ისევ აქ მოვხვდე! (იცინის).
_ სხვა რაიმეს თქმა ხომ არ გსურთ?
_ ბედნიერ საქართველოში მინდა ცხოვრება! _ ამბობს წუთების წინ გათავისუფლებული და აშკარად ეტყობა, რომ სულაც არ ნანობს აქციაზე ყოფნას და ლანჩხუთის იზოლატორში გატარებულ 30 დღეს. გათავისუფლებულები ერთმანეთს დაელოდნენ და რამდენიმე წუთში ერთი-მეორეს მიყოლებით გამოდის 3 გათავისუფლებული. სამივე მათგანი მადლობას უხდის “მასპინძლებს” და გადახვევით ემშვიდობება. ერთ-ერთი მათგანი უკან მიბრუნდა, რაზეც პოლიციელი გაეხუმრა, უკან არ დაბრუნდე, ცუდად არ დასცადოო!
მართალია, პირველს წუთები აკლდა, მაგრამ გათავისუფლებულებმა პატარა ზეიმი თავადვე მოიწყვეს და იქვე მდებარე რესტორან “ბაბუნაში” ოთხიოდ სადღეგრძელო შესვეს _ გათავისუფლების, მშვიდობის, საქართველოს, დედების და სულ ბოლოს ერთმანეთს წარმატებები უსურვეს.
სულ რაღაც 2 წუთი იყო მატარებლის შემოსვლამდე, როცა მათ “ბაბუნა” დატოვეს და გეზი სადგურისკენ აიღეს.
