ევროპარლამენტი მოუწოდებს ვილნიუსის სამიტზე საქართველოსთვის ასოცირების შესახებ შეთანხმებისა და ღრმა და ყოვლისმომცველი თავისუფალი ვაჭრობის შეთანხმების ამოქმედების დაწყებას, სავიზო ლიბარალიზაციის სამოქმედო გეგმის სწრაფად დასრულებას და აღიარებს, რომ ასოცირების შესახებ შეთანხმებისა და თავისუფალი ვაჭობის იმპლემენტაციის დაწყება, ასევე უვიზო მიმოსვლა ხელს შეუწყობს საქართველოში მიმდინარე რეფორმების პროცესს.
ამასთან, საქართველოს მთავრობა მიესალმება ევროპის პარლამენტის ევროკავშირთან ასოცირების შეთანხმების პარაფირების მხარდაჭერის რეზოლუციას, რომელშიც ხაზგასმულია ევროკავშირის ვალდებულებები აღმოსავლეთ პარტნიორობის ქვეყნების მიმართ და საქართველოს სწრაფვა ევროპული ინტეგრაციისაკენ.
როგორც მთავრობის მიერ გავრცელებულ განცხადებაშია აღნიშნული, რეზოლუცია, რომელიც მიღებულია ნოემბრის ბოლოს ვილნიუსში დაგეგმილ აღმოსავლეთ პარტნიორობის ქვეყნების სამიტამდე, “აღიარებს იმ წინსვლას, რომელსაც საქართველომ მიაღწია ქვეყნის მოდერნიზაციისა და ასოცირების შეთანხმების მოთხოვნების დაკმაყოფილების მიმართულებით”, და აცხადებს, რომ ევროპის პარლამენტი “მხარს უჭერს ასოცირების შეთანხმების პარაფირებას” სამიტზე.
“ჩვენ გულითადად მივესალმებით ევროპის პარლამენტის მიერ საქართველოში მიმდინარე დემოკრატიული რეფორმების პროცესის მხარდაჭერას. გასაკეთებელი ჯერ კიდევ ბევრია და ასოცირების შეთანხმება საკვანძო როლს შეასრულებს რეფორმების დაჩქარებისა და გაღრმავების საქმეში. ჩვენ ასევე მივესალმებით მიღებულ რეკომენდაციებსა და პარლამენტის ზედამხედველობას ხსენებული პროცესების მსვლელობის მთელ გზაზე,” _ განაცხადა პრემიერ-მინისტრის მრჩეველმა თამარ ჩუგოშვილმა.
განცხადების მიხედვით, რეზოლუცია მიიღეს საქართველოში 27 ოქტომბრის საპრეზიდენტო არჩევნებამდე რამდენიმე დღით ადრე. მთავრობამ კი, ამ რამდენიმე თვის განმავლობაში განახორციელა მთელი რიგი ფართო სპექტრის ღონისძიებები “სამაგალითო, სუფთა, თავისუფალი და სამართლიანი” არჩევნების უზრუნველსაყოფად, როგორც ეს ევროპისკენ მიმავალ ქვეყნას შეეფერება.
“ამგვარი განცხადებების გამოძახილია ევროპარლამენტის წევრთა გამონათქვამებიც იმის შესახებ, რომ არჩევნები “იქნება საქართველოს დემოკრატიული სტანდარტებისა და კანონის უზენაესობისათვის მზაობის ლაკმუსუს ტესტი, ოპოზიციისათვის არჩევნებში მონაწილეობის სრული თავისუფლების მინიჭებითა და საარჩევნო კამპანიის გაშუქებით თავისუფალი, დამოუკიდებელი მედიის მიერ, ხელისუფლების მხრიდან ყოველგვარი ჩარევის გარეშე,” _ ნათქვამია მთავრობის განცხადებაში.
ამასთან, ასევე აღნიშნულია, რომ საქართველოს საგარეო პოლიტიკასთან დაკავშირებით, პარლამენტი მხარს უჭერს საქართველოს მთავრობის ძალისხმევას რუსეთთან დაძაბულობის შესუსტების მიმართულებით და, ამავდროულად, ქვეყნის პროევროპული ორიენტაციის შენაჩუნებას.
“პარლამენტმა ასევე დაადასტურა “საქართველოს ტერიტორიული მთლიანობის მიმართ ევროკავშირის მტკიცე მხარდაჭერა”. საქართველოს ადმინისტრაციული საზღვრების გასწვრივ განლაგებული რუსეთის სამხედრო ნაწილების შემოჭრამ საყოველთაო საერთაშორისო აღშფოთება გამოიწვია. მხედველობაში იღებს რა რუსეთის მხრიდან აღმოსავლეთ პარტნიორობის ქვეყნებზე ზეწოლის გაძლიერებას ევროკავშირთან სიღრმისეული კავშირების შეწყვეტასთან დაკავშირებით, რეზოლუციაში ხაზგასმულია”, რომ საქართველომ არ უნდა შეიკავოს თავი ევროპისაკენ სწრაფვის გზაზე და უნდა შეეწინააღმდეგოს რუსეთის ზეწოლას ევროკავშირთან ასოცირებაზე უარის თქმასთან დაკავშირებით,” _ აღნიშნულია მთავრობის განცხადებაში.
