ორგანიზაციის წევრის, მიხეილ ქუნციშვილის (თსუ-ს სტუდენტი) განცხადებით მათი ორგანიზაცია რამდენიმე თვის წინ შეიქმნა და მოხალისეები უკვე ივნისიდან ატარებენ სოციოლოგიურ გამოკითხვებს.
“ჩვენს მიერ ბოლო კვლევა ჩატარებული იქნა 22-23 ოქტომბერს თბილისში, ზუგდიდში, ქუთაისში, ბათუმში, თელავში და რუსთავში. გამოკითხვები ჩატარდა პირდაპირი ინტერვიუს ფორმატით. თბილისში ქუჩის გამოკითხვები ჩატარდა ისანი-სამგორის რაიონში, ასევე ვაკეში, ნაძალადევში და საბურთალოზე. ჯამში, გამოიკითხა 3427 რესპოდენტი და კვლევების შედეგად გამოკითხულთა 36,2 პროცენტი მხარს უჭერს გიორგი მარგველაშვილს, მეორე ადგილზე 36 პროცენტით არის შალვა ნათელაშვილი, 10,4 პროცენტი აქვს დავით ბაქრაძეს და 9,3 ნინო ბურჯანაძეს. სხვა ყველა დანარჩენ კანდიდატს გამოკითხულთა 2,8 პროცენტი უჭერს მხარს, ხოლო 10,1-ს ჯერ არ აქვს გადაწყვეტილი თუ რომელ კანდიდატს მისცემს ხმას.
ჩვენი კვლევების შედეგები როგორც ხედავთ განსხვავებულია სხვა ორგანიზაციების შედეგებისგან, მაგრამ ეს რეალობა გვიჩვენა ჩვენს მიერ ჩატარებულმა გამოკითხვამ. კვლევები ჩავატარეთ ჩვენი ინიციატივით, არ გვყავს დამფინანსებელი და მხოლოდ მოხალისეები ატარებდნენ გამოკითხვებს,” _ აღნიშნა ქუნციშვილმა.
აღნიშნული კვლევები ორგანიზაციის მოხალისეებმა 22-23 ოქტომბერს ჩაატარეს.
