“ქართული ოცნება-დემოკრატიული საქართველოს” ოზურგეთის საარჩევნო შტაბში კი აცხადებენ, რომ ელოდებიან, მინიმუმ, 65 პროცენტით გამარჯვებას.
“ჩვენ გვქონდა მოსახლეობასთან 50 -ზე მეტი შეხვედრა, დაახლოებით 6000 ამომრჩეველს შევხვდით, თითქმის, ყველა სოფელში და ქალაქის ყველა უბანში არის კარგი განწყობა და მოლოდინი, იციან, ქვეყანა გააგრძელებს წინსვლას. ჩვენ ჩავატარეთ კარდაკარი, მესამე კარდაკარის შედეგები არის 65 დან 70 პროცენტი, ანუ ჩვენ გავიმარჯვებთ, მინიმუმ, 65 პროცენტით”.
ნინო ბურჯანაძის ოზურგეთის საარჩევნო შტაბი დარწმუნებულია, რომ ნინო ბურჯანაძე ოზურგეთში პირველივე ტურში გაიმარჯვებს.
“ამის თქმის საფუძველს გვაძლევს საზოგადოების დღევანდელი განწყობა. საეჭვო ორგანიზაციების მიერ ჩატარებული გამოკითხვების მიუხედავად, ბურჯანაძის რეიტინგი კიდევ უფრო გაზრდილია. „ოცნების“ და „ნაცონალური მოძრაობის“ ერთობლივად შემუშავებული გეგმის მიუხედავად, რომლის ნაწილიც ალტერნატიული შტაბების გახსნა და ამომრჩეველზე ზეწოლა იყო, ოზურგეთის მოსახლეობის უმეტესი ნაწილი მაინც ნდობას უცხადებს ნინო ბურჯანაძეს, რადგან ეს ადამიანები ელიან კოჰაბიტაციის დასრულებას, სამართლიანობის აღდგენას და დაბალანსებულ პოლიტიკას მეზობლებთან, რაც ტერიტორიული მთლიანობის აღდგენის საფუძველია.”
“ერთიანი ნაციონალური მოძრაობის” ოზურგეთის საარჩევნო შტაბში კი დარწმუნებულები არიან, რომ მარგველაშვილი მიიღებს 32%, ბურჯანაძე 17%, სხვა კანდიდატები 8%, 43% კი დავით ბაქრაძე.
“ჩვენ შტაბში ვარსკვლავთმრიცხველები კი არა პროფესიონალები გვყავს საიმისოდ, რომ განსაზღვრონ ჩვენი კანდიდატის დავით ბაქრაძის გამარჯვების შანსები და პირდაპირ გეტყვით, რომ ეს საკმაოდ მაღალია. ამის რწმუნებას გვაძლევს ის, რომ ნამდვილად გვჯერა, ჩვენს ქვეყანაში, გურიაში საკმაოდ ბევრი იქნება ის ადამიანი, ვინც თავისუფლებას მონობაში გაძღომის სურვილს არ ანაცვალებს, მე ნამდვილად მჯერა ქართველი ხალხის, რომ არჩევნებში დავით ბაქრაძე გაიმარჯვებს. მარგველაშვილი მიიღებს 32% , ბურჯანაძე 17%, სხვა კანდიდატები 8%, 43% კი დავით ბაქრაძე. საერთოდ, არჩევნების პროგნოზირება უმადური საქმეა, მაგრამ პატივს ვცემ თქვენს სურვილს და საზოგადოების მაღალ ინტერესს და გაწვდით აღნიშნულ ინფორმაციას”, _ გვითხრა მანჯგალაძემ.
