“მარეგულირებელი კომისიის დამოუკიდებლობა ხელყოფილია კომისიაში შინაგან საქმეთა სამინისტროს წარმომადგენლის არსებობით, რომელსაც კომისიის თანამშრომლები მეტსახელად გენერალს უწოდებენ. “გენერალი” მარეგულირებლის საქმიანობის და თანამშრომლების შესახებ ინფორმაციას აგროვებს, რაც მაუწყებლობის შესახებ კანონის (მუხლი 6. დამოუკიდებლობა და ხელშეუხებლობა) თვალსაჩინო დარღვევაა,” _ ნათქვამია ორგანიზაციის ანგარიშში.
“გურია ნიუსი” ზაზა მაზმიშვილს დაუკავშირდა, რომელიც ამბობს, რომ ყოფილი გენერალია და ამის მიუხედავად არანაირ კანონს არ არღვევს.
ზაზა მაზმიშვილი:
_ გენერალს მეძახიან? ისე ყოფილი გენერალი ვარ და ყოფილი თანამშრომელი, რა კომენტარი უნდა მოგცეთ ამაზე?
_ ანუ შს სამინისტროს მიერ მივლენილი თანამშრომელი ბრძანდებით? ამით ხომ კანონს არღვევთ?
_ მე ვარღვევ კანონს? კარგით რა. მეტ კომენტარს არ ვაკეთებ.
დიანა ჩაჩუა, რომელიც ანგარიშის – “მედია გარემო 27 ოქტომბრის საპრეზიდენტო არჩევნების წინ” ავტორია, ამბობს, რომ შს სამინისტროს წარმომადგენლების არსებობა საზოგადოებრივ მაუწყებელსა და კომუნიკაციების კომისიაში ამ ინსტიტუტების დამოუკიდებლობას საფრთხის ქვეშ აყენებს. ეს ტენდენცია ღარიბაშვილის დროს არ დაწყებულა. უბრალოდ, ახალმა შს მინისტრმა წინამორბედის მავნე პრაქტიკა გააგრძელა.
დაახლოებით 1 თვის წინ საზოგადოებრივ მაუწყებელში შს სამინისტროს წარმომადგენლის ირაკლი ციბაძის მხრიდან განხორციელებული ზეწოლის შესახებ სამეურვეო საბჭოს თავმჯდომარე ემზარ გოგუაძემ განაცხადა. მისი თქმით, ცაბაძე მაუწყებლის გენერალური დირექტორის მრჩევლის თანამდებობაზე 2013 წლის 21 მარტიდან მუშაობს.
მიუხედავად იმისა, რომ არასამთავრობო ორგანიზაციებმა ამ ფაქტის შესწავლა მოითხოვეს, ძიების შედეგი ჯერჯერობით არ ჩანს.
“მივიჩნევთ, რომ ხელისუფლებამ ასევე უნდა გამოიძიოს სამეურვეო საბჭოს თავჯდომარის, ემზარ გოგუაძის ბრალდება. მისი განცხადებით, შინაგან საქმეთა სამინისტროს თანამშრომელმა, რომელიც, როგორც ჩანს, ამავდროულად საზოგადოებრივ მაუწყებელშიც მუშაობდა, მასზე ზეწოლა მოახდინა და იმ შემთხვევაში თუ გოგუაძე ბარათაშვილის გათავისუფლებას ხმას არ მისცემდა, სარგებელს დაჰპირდა. მაუწყებლობის შესახებ კანონის მე-18 მუხლის მიხედვით აკრძალულია “საზოგადოებრივი მაუწყებლის სარედაქციო, მმართველობითი და ფინანსური დამოუკიდებლობის ხელყოფა ან მასზე ზეწოლის სხვაგვარად განხორციელება ადმინისტრაციული ორგანოების მიერ,” _ ნათქვამია საერთაშორისო გამჭვირვალობა საქრთველოს მიერ 6 სექტემბერს გაკეთებულ განცხადებაში.
