მე კიდევ ერთხელ გავიხსენებ არჩევნების პერიოდს და გავიხსენებ მის ოჯახსაც. მას ჰყავს ძალიან კარგი მეუღლე, ჰყავს კარგი ოჯახი და არ შემიძლია, ხაზი არ გავუსვა იმ არაჩვეულებრივს, რითაც ძალიან ხშირად ვამაყობ. სკოლის მერხიდან უყვართ მას და მის მეუღლეს ერთმანეთი. ეს ჩემთვის უნიკალურია. ესეთი პირველი ლედი გეყოლებათ, ძალიან ღისეული, ძალიან ტრადიციული ოჯახის შემქმნელი და ძალიან დამსახურებული. კიდევ ერთს გავუსვამდი ხაზს, რაც უნიკალურია ჩემთვისაც კი. ირაკლის მშობლები, სიდედრი და სიმამრი, როგორც წესი, ერთად ისვენებენ, შვებულებას ერთად ატარებენ, ეს ძალიან მისასალმებელია და თქვენ იცით ჩემი გართულება ოჯახზე და მე ძალიან მიხარია, რომ ირაკლი აქაც აჭარბებს და იმაზე კარგი აქვს, რაც შეიძლება რომ იყოს,” _ ეს განცხადება საქართველოს პრემიერ-მინისტრმა, ბიძინა ივანიშვილმა ირაკლი ღარიბაშვილის თავის შემცვლელად წარდგენის დროს გააკეთა.
ბიძინა ივანიშვილის ამ განცხადებამ სოციალურ ქსელში აზრთა სხვადასხვაობა გამოიწვია. ასევე წერდნენ, რომ ახალი კონსტიტუციით ქვეყნის მმართველად პრეზიდენტი რჩება და მაშინ რატომ უნდა იყოს პრემიერ-მინისტრის ცოლი ქვეყნის პირველი ლედი?! როგორც იურისტები განმარტავენ არც ახალი და არც ძველი კონსტიტუციით ქვეყნის პირველი ლედის სტატუსი არ არის განსაზღვრული.
“არც ახალით და არც ძველი კონსტიტუციით პირველი ლედის სტატუსი განსაზღვრული არ არის და არც რომელიმე ნორმატიულ აქტშია განსაზღვრული ეს სტატუსი. შესაბამისად პირველი ლედის განსაზღვრებას კანონმდებლობა არ ითვალისწინებს,” _ უთხრა “გურია ნიუსს” საია-ს ოზურგეთის ოფისის ხელმძღვანელმა თამაზ ტრაპაიძემ.
