ხოლო მისი ერთ-ერთი მოადგილის პოსტს წარმოშობით ოზურგეთელი, მერაბ ჭანუყვაძე დაიკავებს. ამ ინფორმაციას ჩვენთან საუბარში ჭანუყვაძე არ ადასტურებს და აღნიშნავს, რომ მისთვის ამის შესახებ ოფიციალურად ჯერ არავის განუცხადებია.
_ ვერაფერს გეტყვით, რადგან ოფიციალურად ჯერ არავის არაფერი უთქვამს. თუ რაიმე გადაწყდება, აუცილებლად თქვენ გეტყვით, _ გვითხრა ჭანუყვაძემ.
მერაბ ჭანუყვაძის შესახებ “გურია ნიუსი“ არა ერთხელ წერდა _ რამდენიმე თვის წინ, ის “ქართული ოცნების“ საპრეზიდენტო კანდიდატის, გიორგი მარგველაშვილის ოზურგეთის საარჩევნო შტაბის ხელმძღვანელად უნდა დანიშნულიყო. ეს ამბავი თითქმის გადაწყვეტილი იყო ცენტრალურ შტაბშიც, თუმცა, აღნიშნული პოსტი ჭანუყვაძის ნაცვლად, ივანიშვილის თანაკურსელმა, დავით დარჩიამ დაიკავა.
ინფორმაცია ჭანუყვაძის შტაბის ხელმძღვანელად დანიშვნის შესახებ მაშინ ოზურგეთის მაჟორიტარმა დეპუტატმა ზვიად კვაჭანტირაძემ გაახმოვანა, რასაც საარჩევნო შტაბის მხრიდან უკმაყოფილება მოჰყვა _ “გურია ნიუსთან“ დავით დარჩია ჭანუყვაძის შესახებ აღნიშნავდა, რომ მას არავინ არ იცნობდა და გაკვირვებას ვერ მალავდა მისი შესაძლო დანიშვნის გამო, თან ამბობდა, საარჩევნოდ ეს კარგი არ იქნებოდა. თუმცა, აღსანიშნავია, რომ მერაბ ჭანუყვაძემ სოფელ შემოქმედში საპრეზიდენტო არჩევნებზე ძალიან მაღალი შედეგი დადო. ის მარგველაშვილის მხარდამჭერთა დარბაზის ოზურგეთის გუნდის წევრი იყო, სწორედ მისი მუშაობით გახდა შესაძლებელი არჩევნებზე შემოქმედის თემში შემავალ სოფლებში „ქართული ოცნების“ საპრეზიდენტო კანდიდატის გიორგი მარგველაშვილის მაღალი შედეგით გამარჯვება.
30 წლის მერაბ ჭანუყვაძე ოზურგეთის მუნიციპალიტეტის სოფელ შემოქმედიდანაა. შემოქმედის საჯარო სკოლის დამთავრების შემდეგ, მან განათლება საქართველოს ფიზიკური აღზრდისა და სპორტის სახელმწიფო აკადემიაში მიიღო, 2000–2004 წწ. დაამთავრა პედაგოგიური ფაკულტეტი და სპორტული ჟურნალისტიკის სრული კურსი.
გურიის გუბერნატორობის (ამ თანამდებობას მალე სხვა სახელი დაერქმევა) კანდიდატი, დავით დარჩია ამჟამად თბილისში იმყოფება. ჩვენ მას დავუკავშირდით და სავარაუდო მოადგილის შესახებ კომენტარი ვთხოვეთ:
დავით დარჩია: _ არაფერი არ ვიცი და არც გამიგია მერაბ ჭანუყვაძის შესახებ.
_ ბატონო დავით, თქვენ რამდენიმე თვის წინ, მერაბ ჭანუყვაძის საარჩევნო შტაბის ხელმძღვანელად დანიშვნის წინააღმდეგი წახვედით და თითქმის გადაწყვეტილი საკითხი, ფაქტობრივად, თქვენ დაბლოკეთ. როგორც ჩვენი წყარო ამბობს,, მერაბ ჭანუყვაძე თქვენი ერთ-ერთი მოადგილე გახდება. დაუჭერთ მხარს მას თუ ისევ “დაბლოკავთ“?
_ ვერაფერს ვერ გეტყვით, არ ვფიქრობ მაგაზე. საიდან მოგაქვთ ეს ინფორმაცია? მე პირველად მესმის.
_ ბატონო დავით, როგორც ვიცი, მან როგორც მარგველაშვილის მხარდამჭერი დარბაზის წევრმა, ძალიან ბევრი გააკეთა არჩევნებში „ქართული ოცნების“ გასამარჯვებლად.
_ არ ვფიქრობ მაგაზე, რაზეც არ მიფიქრია, როგორ გიპასუხოთ? თქვენ მეკითხებით, გაფრინდები თუ არა კოსმოსშიო და ამაზე რა გიპასუხოთ? რომ მოხდება ეს საქმე, მერე ვილაპარაკოთ.
_ მე მგონი, კოსმოსში გაფრენაზე არაფერი მიკითხავს…
_ ძალიან კარგი და დიდი მადლობა. თუ ამ ადამიანმა იბრძოლა, ყველას დიდი მადლობა, მერაბი იყო თუ მეორე მერაბი, პეტრე, პავლე თუ სხვა, ყველას მადლობა, _ გვითხრა დარჩიამ.
დავით დარჩია მერაბ ჭანუყვაძე
