ჩვენ დავუკავშირდით სოფელ კონჭკათის რწმუნებულს გელა აროშიძეს, რომელმაც აღნიშნული ფაქტი დაგვიდასტურა. მისი განცხადებით საეჭვო კომპანია უკრაინულია და სოფელში ყოველგვარი გაფრთხილების გარეშეა შემოსული.
“როგორც მე ვიცი, ამის შესახებ არ იცის არც ოზურგეთის მუნიციპალიტეტის გამგებლის მოვალეობის შემსრულებელმა კოტე შარაშენიძემ და არც მისმა მოადგილემ. საქმის კურსში არც გამგეობის იურისტია.
არ ვიცით, რა ხდება, რას ეძებენ ეს ადამიანები სოფელში. თუ ნავთობს ეძებენ, ამას რა უნდა დასახლებაში? არც საკონტაქტო ნომერი გვაქვს მათი, რომ დაგაკავშიროთ”, _გვითხრა კონჭკათის რწმუნებულმა გელა აროშიძემ.
აღნიშნული ინფორმაცია სხვა სოფლის რწმუნებულებმაც დაგვიდასტურეს.
ჩვენ ასევე ხელში ჩაგვივარდა ხელშეკრულებად წოდებული ფარატინა ფურცელი, სადაც ამობეჭდილია კრაკოვშის სააქციო საზოგადოებად წოდებული იურიდიული პირის შეთანხმება ვიღაცასთან თბილისში.
“გურია ნიუსს” ამ ფაქტთან დაკავშირებით დაუკავშირდა გამგებლის მოადგილე გიორგი ღურჭუმელიძე, რომელმაც გვითხრა, რომ აღნიშნულმა პირებმა გამგეობას ცნობის სახით მიაწოდეს ინფორმაცია, რომ რამდენიმე სოფელში იმუშავებენ ნავთობის საძებნელად.
ამ თემაზე “გურია ნიუსი” განაგრძობს მუშაობას და ოპერატიულ ინფორმაციას მკითხველს მალე მივაწვდით.
