“მინდა გამოვეხმაურო მედიის საშუალებით გავრცელებულ ინფორმაციას, მომავალი მთავარი პროკურორის, ოთარ ფარცხალაძის ახალი სახლის შესახებ. ასევე მის განცხადებას, რომ ეს სახლი ბანკიდან აღებული 10 წლიანი 100 000 დოლარიანი კრედიტით შეიძინა.
რეესტრის ამონაწერის თანახმად, ბატონმა ოთარმა, 10 დღის წინ დაჩქარებული წესით შეიძინა 150 კვ.მ ფართი ჯანაშიას ქუჩაზე. ეს ოპერცია ჩატარდა ერთ დღეში და პროცედურების დასაჩქარებლად ფარცხალაძემ გადაიხადა 205 ლარი.
ჩვენ არ დავინტერესდებოდით ამ ფაქტით, ეჭვს რომ არ იწვევდეს ამავე პიროვნების მიერ 5თვის წინ შევსებული ქონებრივი დეკლარაცია. დეკლარაციის თანახმად, 5 თვის წინ ფარცხალაძეების საკუთრებაში იყო 1994 წელს გამოშვებული “ტოიოტას” მარკის ავტომანქნა, 76 კვ.მ ბინა საბურთალოზე და ბევრი ვალი. უფრო კონკრეტულად – კრედიტი 30 000 და ოვერდრაფტის დავალიანება, რომელიც 10 000 ლარს აღემატებოდა. ოჯახი არ ეწეოდა კომერციულ საქმიანობას და არ ჰქონდა ნაღდი ფული.
ჩვენს კითხვას ასეთი ფორმულირება აქვს – რა მოხდა ჩინოვნიკის ცხოვრებაში ისეთი, რომ მან 5 თვეში მოახერხა 45 000 ლარის გასტუმრება?!
როგორ მოახერხა ვალებით დატვირთულმა ადამიანმა დამატებით 100 000 დოლარის შოვნა სახლის შესაძენად. ფარცხალაძის განცხადებით, მან ბანკისგან აიღო ასი ათასი, ჯანაშიას 17-ში მდებარე ბინის საბაზრო ღირებულება კი დაახლოებით 200 000 დოლარია.
როგორ მოახერხა მომავლმა მთავარმა პროკურორმა ბანკის კრედიტის აღება იპოთეკის გარეშე. სახლი ჯანაშიაზე არაა იპოთეკით დატვირთული.
იმ არითმეტიკით, რომელი ფარცხალაძემ შემოგვთავაზე, კვადრატული მეტრი მას შეძენილი აქვს 600 დოლარად. ამ პრესტიჟულ უბანში კი კვადრატულის ღირებულება 1300 დოლარიდან იწყება.
გამოიყენა თუ არა ახლანდელი და მომავალი სამსახურებრივი მდგომარეობა შეღავათების მისაღებად ბანკთან და ბინათმშენებლებთან?
ამ კითხვებზე დამაჯერებელი და არგუმენტირებული პასუხების შემთხვევაში “ნაციონალური მოძრაობა” თემას ამოწურულად ჩათვლის. წინააღმდეგ შემთხვევაში ჩნდება ლეგიტიმური ეჭვი, რომ მომავალ მთავარ პროკურორს ჩვენთვის უცნობმა პირმა დიდი ფინანსური დახმარება გაუწია.
გასარკვევი იქნება, რისთვის მიიღო ეს საჩუქარი ფარცხალაძემ. უკვე გაწეული სამუშაოებისთვის, როგორიცაა მინარეთის მოგლეჯვა, მერიისა და სკარებულოს 22 წევრის დაკავება, საქმეების აღძვრა უგულავასა და კეზერაშვილის წინააღმდეგ?
თუ ეს არის ავანსი მომავალში პოლიტიკური დაკვეთების შესასრულებლად?!”, _ წერს ნადირაშვილი.
