“ვლადიმერ პუტინი ასევე დაპირდა რუსებსა და მსოფლიოს, რომ 2018 წლისთვის ამ რეიტინგებში მისი ქვეყანა მე-20 ადგილზე გადაინაცვლებს, თუმცა ექსპერტების უმეტესობას ეს გეგმა სასაცილოდ არ ჰყოფნის. ყოველივე ამას იმიტომ ვყვები, რომ 2004 წლიდან 2013 წლამდე საქართველომ იმავე რეიტინგებში 127-ე ადგილიდან მე-8 ადგილზე გადაინაცვლა კორუფციის დამარცხების, ბიუროკრატიული პროცედურების გამარტივების, ე.ი. მოქალაქეთა ცხოვრების გაადვილების გზით. მსოფლიო ბანკის მონაცემებით, ჩვენ გავხდით მსოფლიოს ნომერ პირველი რეფორმატორი ქვეყანა.
ბევრ საკითხში, რომელიც კორუფციის რისკის შემცირებასთან დაკავშირებულ თემებს შეეხება, საქართველო პირველ ადგილზეა და მსოფლიოს ყველა განვითარებულ ქვეყანას უსწრებს. ჩვენ გავხდით ისტორიაში პირველი განვითარებადი და ჯერ კიდევ ღარიბი ქვეყანა, რომელიც მოხვდა ამ რეიტინგების პირველ ათეულში, სადაც აქამდე მხოლოდ განვითარებული და მდიდარი ქვეყნები ინაწილებენ ადგილებს. ახლა ვიღაც იტყვის, რომე მე ვტრაბახობ, მაგრამ ის, რითიც მე ვამაყობ, ეფუძნება ყველა სერიოზული საერთაშორისო ორგანიზაციის მხრიდან ჩვენი სიტუაციის კრიტიკულ შესწავლას.
მათ, ვისაც შეიძლება აღიზიანებდეს, რომ ამით “ვტრაბახობ”, მინდა ვუთხრა: “იტრაბახეთ”, უფრო სწორად, იამაყეთ თქვენც! ეს სააკაშვილის თემა კი არა, საქართველოს და ე.ი. ყოველი ქართველის მიღწევაა, შესაბამისად, იმის შანსიც, რომ ხვალ და ზეგ უკეთესად ვიცხოვროთ. იმ ძველ კორუმპირებულ ჩინოვნიკებს, რომლებიც მაჩანჩალა რუსეთს მისტირიან თავიანთი მოსკოვის 37-მანეთიანი ბილეთებით, მარტო იმიტომ, რომ კორუმპირებულ სისტემაში უკეთესად გრძნობენ თავს, არ უნდა მივცეთ შესაძლებლობა საქართველო უკან დააბრუნონ. ჩვენი გადარჩენა და გაძლიერება მხოლოდ უკვე მიღწეულის შენარჩუნებასა და განვითარებაშია. ჩვენი გზა მიდის არა წარსულისა და გადაჩეხვისკენ, არამედ მომავლისა და კეთილდღეობისკენ”, _ წერს მიხეილ სააკაშვილი.
