რომლებიც სოფელში მოსახლეობასთან სიტყვიერი შეთანხმების საფუძველზე, მიწაში არჭობენ სოლებს, ხალხს კი ეუბნებიან, რომ ეძებენ ნავთობს და სადაც სოლია, ის ადგილი უნდა ააფეთქონ. ეს ინფორმაცია “გურია ნიუსს” ოზურგეთის მუნიციპალიტეტის ერთ-ერთი სოფლიდან მიაწოდეს.
ჩვენ დავუკავშირდით რამდენიმე სოფლის რწმუნებულს, რომლებმაც აღნიშნული ინფორმაცია დაადასტურეს. მათი განცხადებით, საეჭვო კომპანიას არ აქვს ხელშეკრულება, რის საფუძველზეც არის შესული სოფლებში.
ჩვენ ხელთ ჩაგვივარდა ხელშეკრულებად წოდებული ფურცელი, სადაც ამობეჭდილია, “კრაკოვის სააქციო საზოგადოებად” წოდებული იურიდიული პირის შეთანხმება ვიღაცასთან, თბილისში.
“გურია ნიუსი” ოზურგეთის მუნიციპალიტეტის სოფელ კონჭკათის მოსახლეობას გაესაუბრა, რომლის წარმომადგენლებიც აცხადებენ, რომ არ იციან, რა ხდება მათ სოფელში.
_ იციან, რომ ნავთობს ეძებენ. არიან უცხოელები და დაჰყვებიან ქართველებიც, ამოდიან ჯიპებით, ამბობენ, მიწაში გადის დენი, რომელიც უნდა აფეთქდეს; სადაც აფეთქდება იქ ნავთობიაო… ერთი რამ გვაკვირვებს _ თუ ნავთობს ეძებენ, დასახლებულ უბანში რა უნდათ? _ აცხადებენ კონჭკათის მცხოვრებლები.
ისიდორე შავაძე, სოფელ კონჭკათის მცხოვრები: _ ჩვენც არ ვიცით არაფერი. მოვიდნენ, მითხრეს, ნავთობს ვეძებთ, სახლთან არ ავაფეთქებთ. მიწაში დევს 12-ვოლტიანი დენის კაბელი და სადმე აქ თუ აფეთქება მოხდა და რაიმე ზიანი მოგადგა, აგინაზღაურებთო(?!). ასე მითხრეს და წავიდნენ. თქვეს, ეს საშიშროებას არ წარმოადგენსო და დაასვეს სოლები, თან წითელი ლენტები შეაბნიეს. არ უთქვამთ, რომელ კომპანიას წარმოადგენენ.
გელა აროშიძე, სოფელ კონჭკათის რწმუნებული: _ ვერაფერი ვერ დავადგინეთ. ვკითხეთ ოზურგეთის გამგებელს შარაშენიძეს, მის მოადგილეს _ ღურჯუმელიძეს. არც გამგეობის იურისტია საქმის კურსში, ამბობენ, რომ მათ არანაირი ინფორმაცია არ აქვთ.
ჩვენ დავუკავშირდით სოფელ ბაილეთის რწმუნებულს სპარტაკ მამულაიშვილს, რომელმაც თქვა, რომ საეჭვო კომპანიის წარმომადგენლებმა განუცხადეს, სახელმწიფო დაკვეთასა და ინტერესებს ვასრულებთო, თუმცა, რა დოკუმენტის საფუძველზე, ამის შესახებ არც თვითონ არის საქმის კურსში:
_ ამ კომპანიას “ჯეო-ფიზიკა” ჰქვია. იგი ატარებს გეგმიურ სამძებრო დაზვერვით სამუშაოებს. როცა შევხვდი მის წარმომადგენლებს, სახელი და გვარი არ მიკითხავს, მომერიდა. ასე მითხრეს, გეგმიურიაო. ვკითხე, რას შვებით, რამე არ მოხდეს,-მეთქი. ჩვენ ნავთობს ვეძებთ, ვბურღავთ მიწას 60 მეტრის სიღრმეზე, ვიღებთ მიწის სინჯებს და ვაგზავნით სათავო ოფისში, თუ რაიმე იქნება, შემდეგ გაცნობებენო.
_ ბატონო სპარტაკ, ხომ არ იცით მათი კოორდინატები? ან თუ იცით, აღმოაჩინეს ნავთობი თუ არა? ბურღვა ისევ მიმდინარეობს?
_ არა, არ ვიცი მათი კოორდინატები, ჯერ არც ინფორმაცია მოუწოდებიათ, ნახეს ნავთობი თუ არა. უბრალოდ, ბურღავენ მიწას 60 მეტრზე.
_ თქვენ არ მოითხოვეთ რაიმე დოკუმენტი, რის საფუძველზე შემოვიდა საეჭვო კომპანია თქვენს სოფელში და ჰკითხეთ თუ არა ოზურგეთის გამგებელს ამის შესახებ?
_ არაფერი არ მომითხოვია, არც გამგებლისთვის მითქვამს რამე. უბრალოდ, მითხრეს, რომ სახელმწიფოს დაკვეთას ვასრულებთ, ასეა საჭირო. კოსმოსიდან ინტერნეტით მიღებულ ინფორმაციებს, ნიშნულებს ვაკეთებთ და იმ ადგილებში იმიტომ ვბურღავთო. ეს ხდება ჩემს სამეზობლოშიც და სხვა სოფლებშიც.
ამასთან დაკავშირებით საქმის კურსში არ აღმოჩნდა ოზურგეთის მუნიციპალიტეტის საკრებულოს თავმჯდომარე ავთანდილ სურგულაძე. მან გვითხრა, რომ გადაამოწმებდა ინფორმაციას და დაგვიკავშირდებოდა. რამდენიმე წუთში სურგულაძე მართლაც დაგვიკავშირდა და გვითხრა, რომ ამ ფაქტთან დაკავშირებით ოზურგეთის მუნიციპალიტეტის გამგებლის მოადგილე გიორგი ღურჯუმელიძე ფლობდა ინფორმაციას.
გიორგი ღურჯუმელიძის თქმით, აღნიშნულმა პირებმა გამგეობას ცნობის სახით მიაწოდეს ინფორმაცია _ ისინი რამდენიმე სოფელში იმუშავებენ ნავთობის მოძიებისთვის. მათ ხელშეკრულება ოზურგეთის მუნიციპალიტეტის გამგეობასთან არ გაუფორმებიათ.
ცნობის შინაარსი ასეთია: “საქართველოს ნავთობისა და გაზის შესახებ” კანონის, სახელმწიფოსთან 2011 წლის 10 ნოემბერს გაფორმებული პროდუქციის წილობრივი განაწილების ხელშეკრულებისა და სათანადო წიაღთსარგებლობის ლიცენზიის თანახმად, საოპერაციო კომპანია შპს “ვი პი ჯორჯიას” დასავლეთ საქართველოს მერვე ბლოკზე, მიმდინარე წლის სექტემბრიდან 2014 წლის ჩათვლით ახორციელებს სიესმო-საძიებო გეოფიზიკურ სამუშაოების ჩატარებას, ბურღვა-აფეთქების მეთოდით”.
ცნობაში, ასევე, აღნიშნულია, რომ “ამ სამუშაოებს ატარებს ტენდერში გამარჯვებული პოლონური კომპანია “გეოფიზიკა კრაკოვის წარმომადგენლობა საქართველოში”, რომელსაც აღნიშნული სამუშაოების წარმოების დიდი გამოცდილება გააჩნია.”
ჩვენ აუცილებლად დავუკავშირდებით შპს “ვი პი ჯორჯიას” და “გეოფიზიკა კრაკოვის წარმომადგენლობას”, რის შემდეგაც მკითხველს დეტალურ ინფორმაციას მივაწვდით იმის შესახებ, თუ რა სამუშაოებს აწარმოებენ ისინი, რომლის შესახებ არ ადგილობრივმა ხელისუფლებამ იცის არაფერი და არც მოსახლეობამ.
