საქართველოში ოდითგანვე არსებობდა ფხალის 160-ზე მეტი სახეობა და აქ ვერავის გააკვირვებ მისი გემოთი და მრავალფეროვნებით. თუმცა, ჩვენ მაინც გთავაზობთ იმერეთში მინდვრის ფხალად წოდებული მცენარეული კერძის რეცეპტს, რომლის გაკეთებაც წელიწადის ამ დროს ადვილად შესაძლებელი და ხელმისაწვდომია. თან ეს ძალიან გემრიელი და სასარგებლოა.
საკმაზი: გატარებული ნიგოზი, ნედლი ქინძი, ნიორი, წიწაკა და მარილი, ცოტა კვაწარახი, რომელიც ფხალის ასეთ კერძს განსაკუთრებულ არომატს აძლევს. საჭიროა ნახევარი ჩაის კოვზი კვაწარახი ერთ გაკეთებაზე.
მოვკრიფოთ ჭინჭარი მომეტებული რაოდენობით; ცოტა ნაკლები კი კამა, ოხრახუში, წითელი ფხალი, პრასი; ცოტ-ცოტა მრავალძარღვას და იის ნორჩი ფოთლები; ცოტაც _ ჟოლოს დუყები, ვაზის ნორჩი თავები, რამდენიმე ღერი ნიახური. შეგიძლიათ გამოიყენოთ სხვადასხვა სახის მინდვრის მცენარე, თუ დარწმუნებულები ხართ, რომ ეს მცენარე საჭმელად ვარგისია.
როცა ყველა ამ მცენარეს შევაგროვებთ, ყველა ერთად მოვხარშოთ. ხარშვისას ჩავამატოთ 2-3 ცალი მწვანე ტყემალი. ჭინჭარი რომ მოიხარშება, ყველა დანარჩენი მცენარეც მოხარშული იქნება.
მოხარშული მასა გადავიტანოთ საცერზე. გავწუროთ და შევკმაზოთ ნიგვზით, მოვაყაროთ წვრილად დაჭრილი ქინძი, ოხრახუში და კამა.
იგივე ფხალეული, შეიძლება, მოვამზადოთ ნიგვზის გარეშეც _ მოვხრაკოთ სამი თავი ხახვი ზეთში ან ერბოში, ჩავყაროთ შიგ ფხალის მასა და დავუმატოთ დანარჩენი სანელებლები; ჩავახალოთ ორი ცალი კვერცხი და ვშუშოთ 15-20 წუთის განმავლობაში, რის შემდეგაც კერძი უკვე მზადაა.
